Մոնթե Մելքոնյանի վարժարանի սաները տեղափոխվել են Դիլիջան

Հիմնադրման օրվանից Մոնթե Մելքոնյանի անվան վարժարանի 1400 սաներն իրենց ուսումը ստացել են Երեւանում՝ Դավիթաշենում տեղակայված ուսումնական կենտրոնում: 1993 թվականից սկսած դպրոցի շրջանավարտների մեծ մասը՝ ավելի քան 90 տոկոսն ուսումը շարունակել է բարձրագույն ռազմաուսումնական հաստատություններում ու համալրել հայկական բանակի սպաների շարքերը: Վերջին անգամ սեպտեմբերի մեկը մոնթեականներն այստեղ դիմավորեցին նախկին ուսման վայրին հրաժեշտ տալու համար: Պատանի մոնթեականները տեղափոխվում են Դիլիջան:

Մոնթեական շրջանավարտները պիտի դառնան ոչ միայն մեր ապագա սպայակազմի մերանը, այլ նաեւ մեր հանրապետության ապագա տերերի, ղեկավարների մերանը: Եվ այդ արդյունքին հասնելու համար պետությունը մեր նորանկախ պատմության մեջ իր միանվագ ամենամեծ ներդրումը կատարեց կրթությունում՝ Դիլիջանի համալիրի կողմից, համալիր, որի զուտ ֆինանսական արժեքը մոտենում է 16 միլիարդ դրամի:

Դրոշի իջեցումով ազդարարվեց Դավիթաշենում ուսումնական գործընթացի ավարտը, որը նույն օրը վերսկսելու էր Դիլիջանում: Բայց մինչ մեկնումը մոնթեականները ստացան ծնողների մաղթանքները:

Դժվարությունները տղամարդու համար են: Երեխու ցանկությունն է, երեխեն ոնց ուզել է, թող աստված իրա հետ:

Ուսումս կշարունակեմ Ռուսաստանի Դաշնությունում: Բարձրագույն կրթություն կստանամ, երեւի թե հակաօդային:

Ինքը արդեն երկար տարիներ երազում էր հենց էտ համազգեստի մասին: Ստանալուն պես վայելեց մենակ:

Շատ հնարավոր է՝ սպայական:

Նոր ընդունված մոնթեականների համար եւ Երեւանի, եւ Դիլիջանի ուսումնական կենտրոնները անծանոթ են: Բայց թե նրանք, թե արդեն ավարտական դասարանների սաները ուրախ են Տավուշ տեղափոխվելու համար:

Ուզում էինք տեղափոխվեինք, այնտեղ կրթության մակարդակը ավելի բարձր կլինի: Հուսով եմ՝ կրթությունը բարձր կլինի, եւ մենք կարող ենք ընդունվել այնտեղ, որտեղ կուզենանք՝ բարձրագույն ուսումնական հաստատություններ:

Իսկ Դիլիջանի ուսումնական կենտրոնում արդեն փակցրել են խոստացված կարգախոսը՝ «Ճանապարհ դեպի բարձունք», եւ սպասում են սաներին: Այստեղ հանրապետության ու վարժարանի դրոշների հանդիսավոր բարձրացումով նշանավորվում է տեղափոխությունը: Վարժարանի տնօրենի պաշտոնակատարը նշում է, որ իրենք մտադիր են դպրոցը մրցունակ դարձնել ոչ միայն զինվորական ծառայություն ընտրողների համար:

Շեշտը դնելու ենք նրա վրա, որ պատրաստենք հայրենասեր, կրթված, լայն մտահորիզոն ունեցող սաներ, որոնք պատրաստ են լինելու իրենց գիտելիքներով զարմացնել: Ջանք չենք խնայելու, որպեսզի ստեղծենք էստեղ ամենալավ դպրոցներից մեկը, ամենալավ ուսումնական հաստատություններից մեկը:

Վարժարանի սաներին ողջունեց նաեւ պաշտպանության նախարարը: Վիգեն Սարգսյանը նշեց, որ պաշտպանության նախարարությունը եւ զինված ուժերի վարչությունները հաճախ երկրորդ պլան են մղել այլ, երբեմն ավելի կարեւոր աշխատանքներ, որպեսզի առաջ քաշեն վարժարանի տեղափոխման հարցերը:

Երնեկ մեզ, որ տեսանք մեր աչքով, թե ինչպես Հայաստանի ամենակարեւոր ուսումնական հաստատություններից մեկը կարողանում է տեղափոխվել ամենահարմարավետ պայմաններում, դրախտային մի անկյունում գտնվող այս հիասքանչ ուսումնական համալիրը: Որպես մարդ, որ տեսել է աշխարհի շատ առաջատար ուսումնական հաստատություններ՝ վստահեցնում եմ ձեզ, որ իր պայմաններով այս մեկը չի զիջում որեւէ մեկին:

Դիլիջանում կրկին հանդիպեցինք վարժարանի սաներից Դավթին, որն արդեն նոր ուսումնական կենտրոնը տեսնելուց հետո կիսվեց իր տպավորություններով:

Ակնկալիքներս արդարացված են, ավելի լավ է իմ պատկերացրածից, չէի պատկերացնում, որ սենց պայմաններ կլինեն: Սենյակներ կան, որ երեք հոգով են, սենյակներ կան, որ չորս հոգով են: Դասապրոցեսից հետո հանգիստ, միգուցե կարող ենք գիշերները, ստեղ տրամադրված են սեղան աթոռը, գիշերները միգուցե դաս էլ կարող են անել:

Տոնական օրվա ավարտին կատարվեց տնօրհնեքի արարողություն: Այնուհետ պաշտպանության նախարարը արիության դաս անցկացրեց ու իր պատգամը փոխանցեց վարժարանի սաներին. եթե կյանքում չկա փորձություն, երբեք չի կարող լինել արդյունք:

Գարիկ Հարությունյան, Լեւոն Խաչատրյան, Հորիզոն