Մեյ Մասկը՝ աշխատանքի, երեխաների դաստիարակության և Իլոն Մասկի մասին

SHANTNEWS-ը ներկայացնում է մի կնոջ հաջողության պատմությունը, որը դաստիարակել է աշխարհի միլիարդատերներից մեկին:

Մեյ Մասկը 69 տարեկան է, բայց շատ երիտասարդ մոդելներից ավելի պահանջված է, հանդիսանում է Swarovski-ի դեմքը, նկարահանվում է համաշխարհային հայտնություն ունեցող բրենդների գովազդներում: Նշվածներից զատ, Մեյ Մասկը հայտնի դիետոլոգ է, առողջ ապրելակերպի և առողջ սննդի մասին դասախոսություններ է կարդում աշխարհի տարբեր անկյուններում:

Երեք երեխաների մայր է և 10 թոռնիկների տատիկ: Նրա մեծ որդին՝ Քիմբալը, ռեստորանների ցանց ունի, դուստրը` Տոսկան, Հոլիվուդում բավական հայտնի ռեժիսոր է, իսկ նրա փոքր որդին աշխարհի ամենաբարձր վարձատրվող մարդն է՝ Իլոն Մասկը:

 

Where there’s smoke, there’s ‪????! ‬Couldn’t be prouder to share my newest COVERGIRL commercial. #JustGettingStarted #COVERGIRL #IAmWhatIMakeUp

A post shared by Maye Musk (@mayemusk) onMar 4, 2018 at 4:15pm PST

Միայնակ մայրը և միանգամից հինգ աշխատանքը

Մեյ Մասկը ծնվել է Կանադայում, բայց փոքր տարիքում ընտանիքը տեղափոխվել է Հարավաֆրիկյան հանրապետություն: 15 տարեկանում նա սկսել է մոդելային կարիերան, սակայն աշխատանքին զուգահեռ նաև շարունակել է լավ սովորել:

«Ես լավ էի սովորում, որպեսզի շատերին ապացուցեմ, որ ես խելացի եմ: Այդկերպ ես կոտրում էի մոդելների ապուշ լինելու կարծրատիպը»,- ասել է Մեյ Մասկը:

Մեյ Մասկը հիշում է, որ այդ տարիքում շատ էր գրքեր կարդում, նույնիսկ մարզանքների ժամանակ հասցնում էր և՛ վազել, և՛ գիրք կարդալ:

1969-ին Հարավային Աֆրիկայում անցկացվող գեղեցկության մրցույթում զբաղեցնում է երկրորդ հորիզոնականը, իսկ 1970-ին ամուսնանում է Էրրոլ Մասկի հետ: Նրանց ամուսնությունը տևում է ընդամենը 9 տարի: Բաժանումից հետո որոշակի ժամանակ Հարավաֆրիկյան Հանրապետությունում աշխատելուց հետո 1989-ին որոշում է երեխաների հետ միասին տեղափոխվել Տորոնտո՝ Կանադա: Կանադայում երեք երեխաներին հոգ տանելու համար միանգամից 5 աշխատանք է անում: Միաժամանակ աշխատել է Տորոնտոյի համալսարանում, դասընթացներ է անցկացրել առողջ ապրելակերպի և առողջ սննդի մասին, ինչպես նաև դիետոլոգ է աշխատել:

Այդ ընթացքում երեխաները նույնպես պարապ չեն եղել: Տոսկան դպրոցից հետո աշխատել է խանութում, իսկ Իլոնի համար մայրը աշխատանք է գտել Microsoft-ում:

«Երբ ես ստացա իմ առաջին աշխատավարձը մենք Տորոնտոյի տան համար գորգ գնեցինք: Մենք անգամ կահույք չունեինք: Իսկ հաջորդ աշխատավարձիս Իլոնի համար համակարգիչ գնեցի, համակարգիչը դրված էր հենց հատակին, և Իլոնը հատակին նստած էր աշխատում»,- պատմել է Մեյ Մասկը:

Երեխաների դաստիարակության գաղտնիքները

«Երեխաներս ինձ ճանաչում են որպես չափից շատ աշախատող մարդ: Նրանք նույնպես շատ են աշխատում»,- ասել է Մասկը և նշել, որ երբեք լավ կյանքի մասին դասախոսություններ չի կարդացել իր երեխաների համար, այլ սեփական օրինակով է ցույց տվել հաջողության հասնելու ճանապարհը: Մեյ Մասկը հարցազրույցում ասել է, որ իր երխաների հաջողություններն իրեն չի վերագրում.

«Ես երբեք իմ երեխաներին չեմ օգնել: Նրանք ամեն ինչին ինքնուրույն են հասել»:

Մեյ Մասկը հիշում է, որ իր 50-ամյակին նրա երեխաները դեռ հնարավորություն չունեին իրեն թանկարժեք նվերներ գնել և այդ ժամանակ նրանք պատրաստել էին թղթե փոքրիկ տուն:

«Նրանք ինձ նվիրեցին ու խոստացան, որ կգա մի օր, երբ կնվիրեն ինձ իսկական տուն: Եվ իհարկե հիմա ես ապրում եմ իմ երեխաների նվիրած մեծ տանը»:

1995-ին Իլոնն ու Քիմբալը հիմնադրել են Zip2 ընկերությունը: Մեյ Մասկը պատմում է, որ 6 շաբաթը մեկ անգամ այցելում էր որդիներին և շատ հաճախ նրանց օգնում էր բիզնես ծրագրերի կազմման աշխատանքներում:

«Հիշում եմ՝ մի անգամ մինչև գիշերվա 2-ը որդիներիս հետ ներդրողների հետ հանդիպման ելույթ էինք պատրաստում և ցանկանում էինք ընկերությունը ներկայացնել լավագույն կողմերով: Մենք այնքան էինք հոգնել այդ օրը, որ աշխատանքից հետո գնացինք լավագույն ռեստորաններից մեկը և ընթրեցինք: Ես այդ ժամանակ ասացի. «Սա վերջին անգամն է, որ ես եմ վճարում ընթրիքի համար»: Եվ իրոք, այդ օրվանից ի վեր ես այլևս չեմ վճարել ընթրիքի համար»,- հիշում է Մեյ Մասկը:

Մոր ներդրումը որդիների բիզնեսում

1996-ին Մեյ Մասկը իր բոլոր խնայողությունները՝ մոտ 10000 դոլար փոխանցել է իր որդիների Zip2 ընկերությանը, որպեսզի նրանք կարողանային վճարել գրասենյակի վարձակալության և այլ կարևոր բաների համար: 1999-ին ընկերությունը կարողացավ իրագործել մի շարք հաջողված նախագծեր, և Իլոն Մասկը այդ գործարքներից 22 մլն դոլար շահույթ ունեցավ: Մեյ Մասկը կատակել է, որ դա իր կյանքի ամենահաջողված ներդրումն է եղել:

Մեյ Մասկի երեխաները այս տարիների ընթացքում մեծ հաջողությունների են հասել: Նրա մեծ որդին` Քիմբալը, The Kitchen ռեստորոնների ցանց ունի, ինչպես նաև Tesla Motors, SpaceX և Chipotle Mexican Grill ընկերությունների բաժնետերերից մեկն է: Դուստրը` Տոսկան, զբաղվում է ֆիլմերի և մուլտֆիլմերի նկարահանումներով: Իսկ Իլոն Մասկը փորձում է փոխել աշխարհը և հեղափոխություն է անում տեխնոլոգիաների ու գիտության ոլորտում:

«Իմ ամբողջ կյանքի ընթացքում իմ երեխաներին սովորեցրել եմ, որ անհրաժեշտ է ամեն գործին ամենայն լրջությամբ մոտենալ և քրտնաջան աշխատել: Իմ կարծիքով՝ հենց աշխատանքն է մարդուն երջանիկ ու հաջողակ դարձնում և իհարկե չի թողնում, որ մարդը ծերանա»: