«Նվիրիր կյանք» հիմնադրամն իր գործունեությունը չի դադարեցնում

««Նվիրիր կյանք» հիմնադրամը երկու ամսով սառեցրել է գործունեությունը, սակայն չի դադարեցրել այն: Դա նշանակում է, որ երկու ամիս մենք նոր շահառուներ չենք վերցնի, սակայն այն երեխաները, ովքեր բուժում են ստանում հիմնադրամի միջոցներով, շարունակելու են ֆինանսավորվել»,- այսօր՝ մայիսի 21-ին, լրագրողների հետ հանդիպման ժամանակ ասել է հիմնադրամի տնօրեն Վերժինե Ոսկանյանը՝ Ռիտա Սարգսյանի օգնականը:

Այն բանից հետո, երբ հիմնադրամի տնօրենն այս մասին հրապարակում արեց, մամուլում լուրեր տարածվեցին, որ հիմնադրամը դադարեցնում է գործունեությունը, սակայն հոգաբարձուների խորհրդի անդամներն այսօր հերքեցին լուրերը՝ պարզաբանելով, որ աշխատանքի կազմակերպման համակարգն է փոխվելու երկրում տեղի ունեցած իշխանափոխությունից հետո, սակայն հիմնադրամը որևէ կերպ իր գործունեությունը չի դադարեցնելու: 

«Քանի որ Ռիտա Սարգսյանն այլևս առաջին տիկինը չէ և նա դեռևս չի էլ հայտարարել հիմնադրամից դուրս գալու մասին, մենք հավաքվեցինք և որոշեցինք, որ մեր կազմակերպությունը չի ունենա նախագահ: Ամբողջ հարցերը կլուծենք մենք: Կուզենա՞ արդյոք Ռիտա Սարգսյանը՝ որպես հայ կին, որպես հայ մայր, օգնել հիմնադրամին, իսկ ես կարծում եմ, որ կուզենա, կշարունակի օգնել, բայց չենք ունենա նախագահ»,- ասաց հոգաբարձուների խորհրդի անդամ Շուշանիկ Արևշատյանը: 

Ինչ վերաբերում է նորընտիր վարչապետի տիկին Աննա Հակոբյանին, ապա Շուշանիկ Արևշատյանը պարզաբանեց, որ նա հանդիպել է «Նվիրիր կյանք» հիմնադրամին աջակցող փոքրիկ հիմնադրամների ներկայացուցիչների հետ, սակայն «Նվիրիր կյանք»-ի անդամները հրավիրված չեն եղել: Թե ո՞րն է եղել չհրավիրվելու պատճառը, Շուշանիկ Արևշատյանը դժվարացավ ասել, սակայն նշեց, որ հանդիպման ընթացքում Աննա Հակոբյանը ասել է, որ հիմնադրամի նախագահ չի ուզում դառնալ, բայց պատրաստ է աջակցել:

««Նվիրիր կյանքը» ամենախոշոր հիմնադրմն է եղել, կա և կլինի: Տարիներ շարունակ մեծ աշխատանք ենք իրականացրել, հիմա ավելի շատ ենք աշխատելու, ավելի մեծ ջանքեր ենք ներդնելու, և հիմնադրամը աշխատելու է: Պետք չէ քաղաքականացնել: Եկեք այդ տհաճ խոսակցությունները դադարեցնենք, հասկացե՛ք, որ ամեն անզգույշ խոսքի հետևում կանգնած է մի ընտանիք, որն ունի շատ մեծ դժբախտություն, չասեմ՝ հոգս, և որ կարդում են նման բաները, պանիկայի մեջ են ընկնում, մտածում են՝ ո՞նց են անելու: Համաձայնեք, աշխարհում չկա ավելի թանկ բան, քան երեխայի ժպիտը»,- ասաց Շուշանիկ Արևշատյանը: 

Հոգաբարձուների խորհրդի անդամները նաև նշեցին, որ Ռիտա Սարգսյանի դերակատարությունը մեծ էր հիմնադրամում հատկապես գումարներ ներգրավելու հարցում և հիմա պետք է հասկանան, թե ինչ կերպ են այդ հարցերը կարգավորելու:

Հիշեցնենք, որ «Նվիրիր կյանք» հիմնադրամը ստեղծվել է 2009թ.-ին՝ Ռուսաստանում: Հիմնադիրներն են Մարինե (Ալես) Համբարձումյանը, Լևոն Իգիթյանը և Լևոն Մալխասյանը: 2010թ.-ին հիմնադիրների խնդրանքով հոգաբարձուների խորհրդի պատվավոր նախագահ դարձավ առաջին տիկին Ռիտա Սարգսյանը: Բարեգործական հիմնադրամի ֆինանսական մասը ապահովվել է հետևյալ կերպ՝ 2 տարին մեկ անգամ նամակներ են ուղարկվել 1000 խոշոր հարկատուներին, կազմակերպվել են բարեգործական համերգներ, նկարների ցուցահանդես վաճառքներ: Եղել են նաև մշտական հովանավորներ: Հիմնադրամը հոգում է արյան սուր հիվանդություններով տառապող երեխաներին: Հիմնադրամում ընդգրկված է 685 երեխա, որից 7 տարիների ընթացքում լիարժեք առողջացել են 150-ը: