Կառավարության օրենսդրական նախաձեռնությամբ կբարձրանա ընդերքօգտագործման ոլորտում ներդրումային գրավչությունը. Հովհաննես Հարությունյան

Կառավարության օրենսդրական նախաձեռնությամբ փորձ է արվում կարգավորել ՀՀ Ընդերքի մասին օրենսգրքում առկա մի շարք խնդիրներ, այդ թվում՝ ընդերքօգտագործման իրավունքի փոխանցման և անհաղթահարելի ուժի առաջացման հետևանքով ընդերքօգտագործման իրավունքի ժամկետի երկարաձգման հետ կապված իրավահարաբերությունները:

Անհաղթահարելի ուժ են համարվում հրդեհները, ջրհեղեղները, երկրաշարժերը, փոթորիկները կամ այլ բնական աղետները, ինչպես նաև պայթյունները, պատերազմը, ահաբեկչությունը, քաղաքացիական պատերազմը, քաղաքացիական զանգվածային անհնազանդությունը, որոնք ընդերքօգտագործողը չէր կարող կանխատեսել, կանխարգելել և որոնց հետևանքով ընդերքօգտագործողը չի կատարել կամ ոչ պատշաճ է կատարել պարտավորությունները: Այս մասին նշել է ՀՀ տարածքային կառավարման և ենթակառուցվածքների նախարարի տեղակալ Հովհաննես Հարությունյանը:

Անհաղթահարելի ուժի առաջացման դեպքում իրավունքի ժամկետները երկարաձգվում են առավելագույնն այդ հանգամանքների գործողության ժամկետով, ինչը հնարավորություն է տալու ընկերություններին պատշաճ կատարել այն պարտավորությունները, որոնք չէին կատարվել՝ աշխարհում և ՀՀ-ում վերջին տարիներին ստեղծված անկանխատեսելի և արտակարգ պայմաններում:

Այս դրույթի առնչությամբ փոխնախարարը նշել է, որ այն ներդրողների համար կապահովի գործունեություն կազմակերպելու կանխատեսելիությունը, ինչպես նաև կբարձրացնի ներդրումային գրավչությունը:

Օրենքի նախագծով ընդերքօգտագործման իրավունքի փոխանցման առնչությամբ ընկերություններին առաջարկվում է դիմում ներկայացնել լիազոր մարմին, որն էլ պարզելու է փոխանցման հետ կապված բոլոր հարցերը:

Կարգավորվելու են նաև ընդերքաբանական փորձաքննության ներկայացվող նյութերի հետ կապված իրավահարաբերությունները: Ամրագրվելու է օգտակար հանածոների պաշարների շարժի վերաբերյալ տարեկան հաշվետվության ներկայացման կարգի, ձևերի և լրացման ուղեցույցների, ինչպես նաև մասնագիտական առումով ավելի ճշգրիտ կտրվի «օգտակար հանածոյի կանխատեսումային ռեսուրսներ» հասկացության սահմանումները:

Հանձնաժողովի նախագահի տեղակալ Բաբկեն Թունյանի հարցին ի պատասխան Հովհաննես Հարությունյանը նշել է, որ հարցերը նախօրոք քննարկվել են ոլորտի շահագրգիռ կազմակերպությունների ներկայացուցիչների հետ, որոնք դրական են արձագանքել:

Քննարկման ընթացքում հանձնաժողովի անդամներ Ծովինար Վարդանյանը և Մխիթար Զաքարյանը ներկայացրել են առաջարկություններ, որոնք հիմնական զեկուցողի կողմից համարվել են ընդունելի: Առաջին առաջարկը վերաբերել է անհաղթահարելի ուժի առաջացման դեպքում իրավունքի ժամկետների երկարաձգմանը, իսկ երկրորդը՝ սահմանային հողերի օգտագործման ժամանակ դրանց կարգավիճակի փոփոխությանը:

Հանձնաժողովականները դրական եզրակացություն են տվել օրինագծին:

Նշենք, որ մինչև օրակարգային հարցին անդրադառնալը, մշտական հանձնաժողովի նախագահ Վահե Հակոբյանն առաջարկել է հետաձգել օրինագծի քննարկումը, քանի որ օրենսդրական նախաձեռնությունը, ըստ նրա, պատշաճ ձևով չի ներկայացվել հանձնաժողով. լրամշակված տարբերակն ուղարկվել է նիստը սկսվելուց մի փոքր առաջ, և բավարար ժամանակ չի եղել այդ տարբերակին ծանոթանալու համար: «Անթույլատրելի է նման մոտեցումը»,- ասել է հանձնաժողովի նախագահը:

Հիմնական զեկուցողը նպատակահարմար չի գտել հարցի քննարկման հետաձգումը՝ նշելով, որ բովանդակային առումով փոփոխություն չի եղել. ընդամենը մի քանի տերմինի բացատրություն է ավելացվել: Փոխնախարարը համաձայնել է պագամավոր Հովիկ Աղազարյանի առաջարկին, և քննարկման է դրվել նախագծի նախնական տարբերակը: Պարզաբանումներից հետո Բաբկեն Թունյանը նշել է, որ օրինագծի տնտեսական նպատակահարմարության հետ կապված խնդիր չի տեսնում և հավելել, որ հարցը հետաձգելու բավարար պատճառներ չկան, հատկապես՝ պատգամավորները մեկ ամիս ժամանակ են ունեցել իրենց դիտարկումները ներկայացնելու համար: Նա նաև հիմնական զեկուցողին խորհուրդ է տվել ԱԺ իրավաբանական վարչության հետ շարունակել որոշ դրույթների վերաբերյալ համատեղ քննարկումները: