Ծեփեք, որ իմանան` չի կարելի, ընտրություններից է ամեն ինչ սկսվում. Տիգրան Ուրիխանյան

ԱԺ պատգամավոր Տիգրան Ուրիխանյանը հոկտեմբերի 22-ին խորհրդարանում նոր Ընտրական  օրենսգրքի նախագծի քննարկման ժամանակ ընդգծեց` ընտրությունները պիտի լինեն կատարյալ արդար, թափանցիկ, որակյալ, գործընթացի կազմակերպումը և դրա նկատմամբ հսկողությունը պիտի կատարի պետությունը, իսկ մասնակից ընտրվողները ոչ մի առնչություն պետք է չունենան կամ հնարավորինս քիչ առնչություն պիտի ունենան կազմակերպիչների հետ, որ կարողանան ներկայացնել իրենց ծրագրերը, առաջարկները, կենսագրությունը, ներկան, ապագան: Դիմելով ՀՀ արդարադատության նախարարի պաշտոնակատար Արտակ Զեյնալյանին` Ուրիխանյանը հետաքրքրվեց.

«Ըստ համապատասխան բաժանման, ՀՀԿ-ն ունենալու է, օրինակ, նախագահների, քարտուղարների, անդամների մեծամասնություն հանձնաժողովներում, անհրաժեշտ չէ, որ ես հիմա նկարագրեմ, թե ինչ ընտրություններ ենք ունեցել նախորդ իշխանությունների կողմից դրանք կազմակերպելու ընթացքում: Ի՞նչ վստահություն կա, որ հասարակությունը, մասնակից քաղաքական ուժերը, վստահելով այլևս ընտրության որակյալ պրոցեսին, ավելի մեղմ հսկողություն կանեն կամ չեն անի ընդհանրապես ու հետո տեղի չի ունենա այն, ինչ իրենք սովոր են միշտ անել»:

Զեյնալյանը պատասխանեց, որ պետք է չնույնականացնել օբյեկտիվ ճշմարտությունը և բնական ճշմարտությունը: Նա նշեց` ընտրական իրավունքն ունի առանձնահատկություն, դրա դրսևորումներից մեկն այն է, որ ընտրական վեճերի ժամանակ չեն ապահովում դատարանի մատչելիության իրավունքը երեք ատյանում, այլ բավարարվում են մեկ ատյանով:

«Կատարյալ արդար ընտրություն ասելով` եթե մենք պատկերացնում ենք ամբողջ համակարգի տեսական, մաթեմատիկական ճշգրտությունը, դա օբյեկտիվ իրականության մեջ հնարավոր չէ ապահովել, կան որոշակի խաղի կանոններ, ինչ-որ մի իրավիճակում ընդունվում է դրա լեգիտիմությունը, դադար է առնում վիճարկումն ընտրական արդյունքների: Քաղաքական ուժերը, դիտորդական առաքելությունները, արտախորհրդարանական ուժերը, քաղաքացիները նաև պատասխանատվություն են կրում ընտրությունների նկատմամբ վերահսկողություն իրականացնելու` որպես իշխանության իրենց մասի կրողներ: Ընդունվել են մեխանիզմներ, որոնք ոչ միայն այստեղ չեն եղել, այլև չեմ հանդիպել երկիր, որտեղ եղել են, վարչական պատասխանատվության հայց ներկայացնելու հնարավորություն է տրվել այն անձանց նկատմամբ, ովքեր թույլ են տվել վարչական ռեսուրսի խախտում»,- ասաց նա:

Զեյնալյանն ընդգծեց`պետք է մարդիկ պաշտպանեն իրենց իրավունքը: Տիգրան Ուրիխանյանն արձագանքեց` հիշեցնելով, որ իրենք գաղափարակից գործընկերներ են, ընդդիմադիր դաշտում են աշխատել, իրականությունը լավ գիտեն:

«Մարդիկ լսում են հիմա Ձեզ, պիտի մտածեն` այ, ընկնելու ենք դատարաններ, վեճեր… ավելի լավ չէ՞ կոնկրետ ասել` ով հանկարծ տեղամասում փորձեց մեկի քվեաթերթիկների տրցակը վերցնել, դնել մյուսների տակ, ինչպես ասում է հարգարժան վարչապետը, «ծեփելու ենք ասֆալտին», ավելի լավ չէ՞ ասել` փող բաժանող բռնեցինք, տեղում ձեռքից քաշելու ենք, տանենք միանգամից բանտ, տեղամասերում հսկողությունն այնպիսին է լինելու իրավապահների, ԿԸՀ, ԸԸՀ, կառավարության այլ մարմինների կողմից, որ որևէ մեկը, ով ուզենա ապականել այս ընտրությունները, հայտնվելու է ճաղերի հետևում: Ծեփեք, որ իմանան` չի կարելի, ընտրություններից է ամեն ինչ սկսում»,- ասաց նա: