Սիգարետի փոխարինիչների օրենքը Ֆիլիպիններում․ սպառողները ողջունել են առաջադեմ մոտեցումը

Ֆիլիպինների Ներկայացուցիչների պալատը օրեր առաջ ընդունեց սիգարետի համեմատ ավելի քիչ վնասակար փոխարինիչների (Juul, IQOS և այլն) արտադրությունը, վաճառքն ու օգտագործումը կարգավորող օրենք։

«Առանց այրման նիկոտին մատակարարող համակարգերը կարգավորող ակտը» 154 ներկայացուցիչների կողմից համահեղինակած օրենք է, որն ակնհայտ տարբերակում է նոր սերնդի արտադրատեսակները այրվող սիգարետից՝ ըստ էության, ճանաչելով դրանց ավելի քիչ վնասակար լինելը։
Օրենքն արտացոլում է վնասի նվազեցման սկզբունքը։

Հիշեցնենք, որ վնասի նվազեցումը հանրային առողջապահական մոտեցում է, որի համաձայն, եթե չի հաջողվում ամբողջությամբ բացառել վնասակար որևէ գործոն, նվազագույնի է հասցվում դրա ազդեցությունը։ Այսինքն՝ ծխելու դեմ պայքարի համատեքստում, եթե չի հաջողվում հասարակությունը զերծ պահել նիկոտինի օգտագործումից, կիրառվում է այդ նիկոտինը հնարավորինս քիչ վնասակար եղանակով ստանալու մոտեցում։ Պրակտիկորեն, քաղաքացիներին օգնում են սիգարետը փոխարինել ավելի քիչ վնասակար, առանց կրակի ու ծխի աշխատող սարքերով։ Ի թիվս այլ կառույցների, վնասի նվազեցման մոտեցումն է կիրառում նաև Մեծ Բրիտանիայի Բժիշկների թագավորական քոլեջը, իսկ Մեծ Բրիտանիան հայտնի է ծխելու դեմ պայքարում իր հաջողություններով։
Օրենքն ընդունելու անհրաժեշտությունը պայմանավորված էր նրանով, որ առկա օրենսդրությունը չէր կարգավորում նոր սերնդի նիկոտին պարունակող սարքերը, ինչպիսիք են էլեկտրոնային սիգարետն ու ծխախոտը տաքացնող սարքերը՝ IQOS-ները, իսկ դրանք այժմ մեծ ժողովրդականություն են վայելում ծխողների շրջանում։

Թե՛ սպառողները, թե՛ նոր սերնդի սարքերն արտադրող ընկերությունները հանդես եկան համատեղ հայտարարությամբ, որով ողջունեցին ընդունված կարգավորումը՝ այն որակելով որպես «օբյեկտիվ ու բալանսավորված»։ Ըստ վիճակագրության, Ֆիլիպիններում նոր սերնդի սարքերի մոտ մեկ միլիոն օգտատեր կա, որոնց ճնշող մեծամասնությունը նախկինում սիգարետ է ծխել։

Ֆիլիպինների Էլեկտրոնային սիգարետի արդյունաբերության ասոցիացիայի (PECIA) նախագահ Ջոի Դուլայը օրինագծի ընդունման կապակցությամբ նշել է, որ այս քայլով Ներկայացուցիչների պալատը վերջապես ճանաչեց իրենց՝ ավելի քիչ վնասակար արտադրատեսակներ ընտրելու իրավունքը։

«Մենք ողջունում ենք Ներկայացուցիչների պալատի կողմից օրինագծի ընդունումը, ինչով կառույցը ցույց տվեց իր պատրաստակամությունը՝ խթանել առողջապահական առաջադեմ քաղաքականություն, որը հարգում է նիկոտին սպառողների իրավունքներն ու միևնույն ժամանակ հնարավորություն տալիս անցում կատարելու այլընտրանքային նիկոտին պարունակող արտադրանքին»,- մեկնաբանեց Նիկոտին սպառողների միության նախագահ Անտոն Իսրայելը։

Նոր օրենքը արգելում է նիկոտին պարունակող սարքերի վաճառքը անչափահասներին․ խանութի աշխատակիցները պետք է գնորդներից պահանջեն անձը հաստատող փաստաթուղթ։ Արտադրանքի առցանց վաճառքը թույլատրվում է։ Էլեկտրոնային սիգարետի ու ծխախոտի տաքացման համակարգերի արտադրողները, ներմուծողներն ու դիստրիբյուտորները պետք է համապատասխանեցնեն արտադրանքը փաթեթավորման և առողջության մասին նախազգուշացման որոշակի պահանջներին։ Մասնավորապես, առողջության մասին նախազգուշացումը պետք է պարունակի հետևյալ բառերը «Այս արտադրանքը պարունակում է նիկոտին, որը կախվածություն առաջացնող նյութ է»։