Ինչ նորամուծություններ կկիրառվեն հոկտեմբերի 17-ի ՏԻՄ ընտրությունների ժամանակ

Գյումրիի տեղական ինքնակառավարման մարմինների ընտրություններում նորամուծություններ կկիրառվեն: Դրանք վերաբերում են ընտրողների ցուցակներին և ընտրատեղամասերում վստահված անձանց թույլատրելի քանակի ներկայությանը: Ըստ նոր կարգի՝ նույն կուսակցության միայն մեկ վստահված անձ կարող է գտնվել ընտրատեղամասում: Տեղամասային ընտրական կենտրոններում փակցված են Գյումրիի ընտրողների նախնական ընտրացուցակները: Համաձայն դրանց՝ Գյումրին ունի 123 հազար 115 ընտրող: Ընտրացուցակները դեռ վերջնական չեն, բայց անձնագրային բաժանմունքները հասցրել են արդեն մեկ անգամ դրանք փոփոխության ենթարկել: 7000 անուն ցուցակներից դուրս է եկել: Թիվ 31 տարածքային ընտրական հանձնաժողովի նախագահը բացատրում է, թե որ ընտրողների անունները ցուցակներում չեն ընդգրկվել:

«Եթե քաղաքացին ունի անձը հաստատող փաստաթուղթ, որի վավերականության ժամկետը ընտրության պահին 6 ամսից ավելի արդեն անցել է, նրա անունը չի լինի ցուցակում: Միակ ելքը այդ մարդու համար այն է, որ տվյալ օրը կարող է դիմել անձնագրային բաժանմունք, ստանալ տեղեկանք ու այդ տեղեկանքով ընդգրկվել լրացուցիչ ընտրացուցակներում: Ոչ ոք նրան չի զրկում ընտրելու իրավունքից»,- SHANTNEWS-ին ասել է թիվ 31 ՏԸՀ նախագահ Տիգրան Ղազարյանը:

Սա, ըստ թիվ 31 տարածքային ընտրական հանձնաժողովի նախագահի, նշանակում է, որ Հանրապետությունից երկար ժամանակ բացակայողների անունները ընտրացուցակներում չեն լինի: Իսկ նրանց համար, ովքեր Գյումրիից չեն բացակայում ու անձնագրի վավերականության ժամկետը 6 ամսից ավելի լրացած է, այլընտրանքային տարբերակ է առաջարկվում: ՏԻՄ ընտրություններին քվեարկությանը կարող են մասնակցել նրանք, որոնք առնվազն 6 ամիս հաշվառում ունեն Գյումրիում:

Ընտրությանը մասնակցելու իրավունք տրված է նաև օտարերկրյա քաղաքացիներին, որոնք առնվազն 1 տարի հաշվառված են Գյումրիում: Եվս մեկ նորամուծություն վերաբերում է ընտրության օրը տեղամասերում վստահված անձանց ներկայությանը: Մեկ կուսակցությունը կարող է գրանցել 3 վստահված անձ, բայց տեղամասում միաժամանակ նրանց ներկայությունը թույլատրելի չէ, տեղամասում կարող է գտնվել միայն մեկը:

Միայն քվեարկության արդյունքների ամփոփմանը դիտորդի կարգավիճակով կարող են մասնակցել նաև ավագանու թեկնածուները: 290 ավագանու թեկնածու էր առաջադրվել, երկուսը ինքնաբացարկ են ներկայացրել, մեկը մահացել է: Վստահված անձանց, դիտորդների ու թեկնածուների ներկայությունը տեղամասերում վերահսկողության միակ տարբերակն է ՏԻՄ ընտրություններում: Տեղամասերում տեսախցիկներ այս անգամ չեն լինելու: Մասնակից կուսակցությունները բանավոր են դիմել ու պարզաբանումներ ստացել տեսախցիկները չգործարկելու մասին:

«Կուսակցությունները գրավոր չեն դիմել: Միայն բանավոր, հեռախոսազրույցով են ինձ դիմել, ես էլ զրուցել եմ ԿԸՀ նախագահի հետ, պարզաբանվել է, որ տեսախցիկները տեղամասերում գործում են միայն համապետական ընտրությունների ժամանակ: Նախորդ ՏԻՄ ընտրությունների ժամանակ դրանք նույնպես չեն գործել: Տեսախցիկները վերահսկողության միջոց են, ինչպես վերահսկողության միջոց են վստահված անձինք ու դիտորդները»,- ասել է Տիգրան Ղազարյանը:

Քարոզարշավի ընթացքում ահազանգեր, բողոքներ տարածքային ընտրական հանձնաժողովը չի ստացել և թեև նշում է՝ խախտումներ քաղաքում կան: Դրանք վերաբերում են նախընտրական պաստառներին: Կան այնպիսիք, որոնք փակցվել են արգելված տեղերում։

Անթույլատրելի տեղում փակցված պաստառի համար պատասխանատվություն սահմանված չէ, այն պարզապես հեռացնում են: Քարոզչական նյութերի տարածման կարգի պահպանմանը ՏԸՀ-ն հետևելու է մինչև քարոզարշավի ավարտը՝ հոկտեմբերի 15-ը: Ընտրություններից 3 օր առաջ՝ հոկտեմբերի 14-ին, կհրապարակվեն վերջնական ընտրացուցակները: Ընտրությունների նախօրեին կհատկացվի  82 տեղամասային կենտրոնների գույքը, և դրանք կկահավորվեն: