Գյումրիի քաղաքապետի լիազորությունների ժամկետը լրացել է․ նշանակվել է քաղաքապետի պաշտոնակատար

Գյումրին, մինչև ՏԻՄ ընտրությունների ավարտն ու նոր քաղաքապետի և ավագանու լիազորությունների ստանձնումը, կղեկավարի համայնքի ղեկավարի պաշտոնակատարը:  Շիրակի մարզպետի տեղակալ Հովհաննես Զոհրաբյանը քաղաքապետարանի աշխատակազմին այսօր ներկայացրել է համայնքի ղեկավարի պաշտոնակատարին: Նա մարզպետարանի քաղաքաշինության վարչության արդեն նախկին պետ Ալբերտ Մարգարյանն է:

Գյումրիի քաղաքապետ Սամվել Բալասանյանի պաշտոնավարման ժամկետը երկու օր առաջ՝ հոկտեմբերի 10-ին է լրացել: Ինքը՝ քաղաքապետը, մոտ 2 ամիս Հանրապետությունում չէ: Այս ընթացքում այսօր առաջին անգամ նրա աշխատասենյակի դուռը բացվեց հանդիպման համար:

Քաղաքապետարանի աշխատակազմին համայնքի ղեկավարի պաշտոնակատարին ներկայացնելու էին եկել մարզպետի տեղակալն ու մարզպետարանի մի քանի ներկայացուցիչներ: Գյումրի համայնքի ղեկավարի պաշտոնակատարը նրանց գործընկերն է:

«ՀՀ վարչապետի որոշմամբ՝ այսօր պարոն Մարգարյանը նշանակվել է Գյումրիի համայնքի ղեկավարի պաշտոնակատար: Պարոն Մարգարյանին երկար ներկայացնելու կարիք չկա: Պարոն Մարգարյանն ունի պետական կառավարման համակարգում աշխատանքի ու կառավարման երկարատև փորձ»,- նշել է Շիրակի մարզպետի տեղակալ Հովհաննես Զոհրաբյանը:

Ալբերտ Մարգարյանը հայտնի շինարար է, մարզպետարանի քաղաքաշինության վարչության երկարամյա պետը, ավելի ճիշտ՝ արդեն նախկին պետը: Երկու օր առաջ Շիրակի մարզպետն է իրեն առաջարկել ժամանակավորապես ստանձնել քաղաքապետի պարտականությունները: Համաձայնել է և վարչության պետի պաշտոնից ազատման դիմում է ներկայացրել:

Եթե չլիներ քաղաքապետի պաշտոնակատարի լիազորությունները ստանձնելու առաջարկը, Ալբերտ Մարգարյանը մարզպետարանում վարչության պետի պաշտոնը թողնելու էր նոյեմբերի 5-ին: Լրանում է նրա կենսաթոշակային տարիքը: Սա նշանակում է, որ քաղծառայության կամ համայնքային ծառայության պաշտոններ չի կարողանալու զբաղեցնել: Իսկ քաղաքապետի պաշտոնակատարի լիազորություններն ավելի վաղ է ավարտելու, երբ ընտրությունների արդյունքներով ընտրված ավագանին ու քաղաքապետը ստանձնեն պարտականությունները։

«Կարճ ժամանակահատված է տևելու իմ պաշտոնավարումը, որպես Գյումրիի քաղաքապետի փոխարինող, ժամանակավոր պաշտոնակատար: Բայց այս կարճ ժամանակահատվածում շարունակելու եմ համայնքի, քաղաքապետարանի բնականոն գործունեությունը, որպեսզի թե՛ ընտրական գործընթացների ժամանակ, թե՛ հետագայում հետընտրական ժամանակահատվածում, նոր ավագանու ձևավորումը և քաղաքապետի  ընտրությունը լինեն համահունչ, ու բնականոն գործընթացը շարունակվի»,- ասել է Գյումրիի քաղաքապետի պաշտոնակատար Ալբերտ Մարգարյանը:

Ալբերտ Մարգարյան քաղաքային կառավարման փորձ ունի: Աշխատել է քաղսովետի գործկոմում, իսկ մարզպետարանում ղեկավարում էր վարչություն, որի գործառույթները, պարզվում է, մեծապես վերաբերում են Գյումրիի ենթակառուցվածքներին :

Քաղաքի ղեկավարումը ժամանակավորապես ստանձնելու համար պաշտոնակատարի ընտրությունն ինչպես է կատարվում կամ ինչու է ընտրությունը կանգ առել ոչ թե քաղաքապետարանի այլ մարզպետարանի պաշտոնյայի վրա, որոշումը Շիրակի փոխմարզպետը չի մեկնաբանում:

Համայնքի ղեկավարի պաշտոնակատարին ներկայացնելուց հետո քաղաքապետարանում այսօր ընդունման-հանձնման գործընթաց է կատարվել: Վաղվանից Ալբերտ Մարգարյանը կստանձնի ժամանակավոր պաշտոնը։