ՀՀ վաստակավոր մարզիչ Գևորգ Ալեքսանյանն արժանացել է Գյումրիի պատվավոր քաղաքացու կոչմանը

Այսօր Գյումրիի պատվավոր քաղաքացու կոչում է շնորհվել ՀՀ վաստակավոր մարզիչ, հունահռոմեական ոճի ըմբշամարտի Հայաստանի հավաքականի մարզիչ, Արթուր Ալեքսանյանի անվան մարզադպրոցի տնօրեն Գևորգ Ալեքսանյանին։

Պատվավոր քաղաքացու կոչումը վաստակավոր մարզիչին տրվել է հայկական ըմբշամարտի զարգացման ու տիտղոսակիր մարզիկներ կրթելու գործում ունեցած առանձնահատուկ ավանդի համար։ Գևորգ Ալեքսանյանը Գյումրիում  այս կոչմանն արժանացած մարզաշխարհի յոթերորդ ներկայացուցիչն է։

Օլիմպիական չեմպիոն Արթուր Ալեքսանյանն իր անձնական մարզիչին կշնորհավորի տանը։ Ընտանիքում սա Գյումրիի  պատվավոր քաղաքացու երկրորդ  կոչումն է, կրում են հայր և որդի Ալեքսանյանները։ Որդու օլիմպիական ու չեմպիոնական հաղթանակները իր հպարտությունն են ու աշխատանքի արդյունքը, և ավելացնում՝ տարիներ առաջ Արթուրին ճանաչում էին ինձանով, հիմա կարծես թե  հակառակն է։

«Պիտի որդին անցնի  ծնողի արած աշխատանքից ու էլ ավելին անի, միշտ չպիտի մնա մարդ իր հոր անունով, այսինքն՝ իմ դեպքում Գևորգի տղա։ Մի պահ պիտի գա, որ տղան կայանա և լինի Արթուրի պապա։ Այ, էս պրոցեսը երբ գնում է, ուրեմն ծնողը երջանիկ է»,- ասում է Գյումրիի պատվավոր քաղաքացի Գևորգ Ալեքսանյանը։

Որդու Օլիմպիական ոսկին իր մարզչական գործունեության  ամենամեծ  ձեռքբերումն է համարում, միևնույն ժամանակ շեշտում՝ իր նվիրված աշխատանքով  դեպի մեծ սպորտ ճանապարհ է հարթել գյումրեցի շատ ըմբիշների համար։

Գևորգ Ալեքսանյանը 15 տարեկանում է սկսել է մարզվել, ինքն էլ հետևել է եղբոր օրինակին։ Ընդամենը երեք տարի անց՝ 1981 թվականին  դարձել է սպորտի վարպետ։ Եվրոպայի ու աշխարհի չեմպիոն չի հասցրել հռչակվել, իրեն նվիրել է մարզչական գործունեությանը։ ՀՀ վաստակավոր մարզիչը միջազգային կարգի մրցավար է։ Գյումրիի պատվավոր քաղաքացու կոչումը  համարում է իր նվիրական աշխատանքի  գնահատականը։

«Պիտի հիմի ավելի շատ ձգտենք բարձր արդյունքների, որպեսզի էդ ամեն ինչը լսելով՝ մարդիկ ասեն՝ հալալ է, մեր գյումրեցուն հալալ է, այ, ըդպես բդի էղնի, էդ ամեն ինչը մարդուն եթե տրվում է, պիտի հալալ էղնի»,- ասում է ՀՀ վաստակավոր մարզիչ Գևորգ Ալեքսանյանը։

58 ամյա մարզչի համար ըմբշամարտն ու սպորտը  վաղուց արդեն դարձել են ապրելակերպ։ Ասում է՝ դա իմ ընտրությունն է, մարզադահլիճներում ավելի  երկար ժամանակ եմ անցկացնում, քան տանը։ Իսկ նպատակը այնպիսի  ըմբիշներ պատրաստելն է, որոնք Գյումրի կբերեն  չեմպիոնական մեդալներ ու կգերազանցեն Արթուրի ցուցանիշները։