Շիրակի մարզի գյուղերում 21 ընտանիք չի կարողացել իրացնել բնակարանի գնման վկայագրերը

Շիրակի մարզի 20 գյուղական համայնքներում հաշվառված է 683 ժամանակավոր կացարան։ Սրանք հիմնականում այն տնակներն են, որոնք գյուղերում հայտնվել են ընտանիքների բաժանման և ժամանակավոր կացարանը որպես միակ այլընտրանք գտնելու արդյունքում։ Այս թվի մեջ շատ քիչ են երկրաշարժից անօթևանները, որոնք դեռ բնակարանային փոխհատուցում չեն ստացել։ Գյուղական 7 բնակավայրերում այժմ 25 տուն է կառուցվում, իսկ 2020-ին գյուղերում 86 անօթևան ընտանիքների ԲԳՎ տրամադրվեցին։ Այս ծրագրից չեն կարողացել օգտվել 21 ընտանիքներ։ Վկայագիրը վերադարձնելու ու մարելու պատճառները տարբեր են։

Երկրաշարժից անօթևան ամենաշատ ընտանիքներ ունեցող գյուղերից մեկը Շիրակն է։ Այստեղ մինչև 2020 թվականը հաշվառված էր 30 ընտանիք։ Ըստ ընտրության հնարավորության՝ Շիրակ գյուղում միայն 3 ընտանիք է բնակարանաշինություն պահանջել, մյուս 27-ը վկայագրեր են ստացել։ 6 ընտանիք չի կարողացել վկայագրի արժեքին համապատասխան տուն գնել ու շարունակում են ապրել տնակներում։  Վկայագրերի ժամկետը լրացել է, ու եթե չեն կարողացել տուն գնել, նշանակում է, այս տնակները դեռ անորոշ ժամանակով էլի են ծառայելու, որպես ժամանակավոր կացարան։

Մեկ ընտանիք  Շիրակ գյուղում վկայագրի արժեքը գրեթե կրկնապատկել ու գյուղում եղած 3 վաճառքի տներից մեկը կարողացել է գնել ։ 3 սենյակի համար են վկայագիր ստացել, բայց գնել են 5 սենյականոց տուն։ ԲԳՎ ծրագիրը թույլ տալիս է կորցրածից ավելի շատ սենյակներով տուն գնել, հակառակն անել, այսինքն՝ ավելի քիչ սենյակներ գնել, քան վկայագրով նախատեսված է, ծրագիրն արգելում է։

« 27 ընտանիքից 2-ը ունեցել են փաստաթղթային խնդիրներ, 6 ընտանիք չի կարողացել գնել բնակարան։ Մեկը չէր ցանկանում տնակը քանդել, մյուսներին էլ գումարը չի բավականացրել։ Իրենք մնում են անօթևանների հերթացուցակում, հերթացուցակից դուրս չեն մնացել։ Եթե հետագայում կառավարությունը որոշի ինչ-որ ծրագիր իրականացնել, այդ դեպքում կքննարկվի այս ընտանիքների հարցը»,- SHANTNEWS-ին ասել է Շիրակ գյուղի վարչական ղեկավար Համլետ Ասատրյանը։

Նրանք, որոնք հրաժարվել են տնակը կամ վթարային տունն ապամոնտաժել ևս ծրագրից դուրս են մնացել։ Շիրակ գյուղում ընդհանուր հաշվով 6 ընտանիք չի կարողացել վկայագրերը իրացնել։

Այս տարի ևս ԲԳՎ-ներ մարզում տրամադրվել են, բայց շատ քիչ քանակով։ Անօթևանության կարգավիճակը դատարանում վիճարկած և բնակապահովման իրավունքը վերականգնած ընտանիքներն են, որոնց վկայագիր կամ դրամական աջակցություն է տրամադրվել։

«Այս տարի բնակապահովման ծրագիրը չի շարունակվել, պարզապես դատական որոշումներով 3 ընտանիքներ վերականգնվել են ցուցակներում։ Նրանց տրամադրվել են ԲԳՎ-ներ։ 2 ընտանիք գնել է բնակարան, մեկը՝ դեռ ոչ։ 2 ընտանիքի էլ Բասեն գյուղից տրամադրվել է 3 մլն դրամ աջակցություն»,- SHANTNEWS-ին ասել է Շիրակի մարզպետարանի  քաղաքաշինության վարչության պետի պարտականությունները կատարող Խաչատուր Խնձրցյանը։

Դրամական աջակցություն ստացել են միայնակ բնակվող անօթևանները։ Իսկ նրանք, որոնք վկայագրերով տուն չեն գնել, մնում են հերթացուցակներում ու էլի կսպասեն բնակապահովման նոր ծրագրերի։ Ընդհանուր Շիրակի մարզում 3547 տնակ է հաշվառված։ Համապատասխան հանձնաժողովը դեռ ուսումնասիրում է, թե դրանցից քանիսն է բնակեցված,  քանիսի նկատմամբ պետությունը բնակարանային պարտավորություն ունի։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։