Ցանկանում եմ մեր առաջ խնդիրներ դնենք, ունենանք վճռականություն՝ հատել մեկնարկ կոչվող գիծը և ի վերջո հասնել նպատակակետին. վարչապետ

Վարչապետ Նիկոլ Փաշինյանն Էջմիածնում մասնակցել է «Հայաստանի Հանրապետության Վարչապետի գավաթի» 2-րդ մարզաձևի` սիրողական կրոսավազքի մրցաշարի մրցանակաբաշխության արարողությանը:

Կրոսավազքն անցկացվել է Երևան-Էջմիածին ճանապարհին, որին մասնակցել են շուրջ 1500 քաղաքացիներ տարբեր տարիքային խմբերում` 15-17 տարեկան աղջիկներ և տղաներ, որոնք հաղթահարել են 3 կմ, 18-35 տարեկան կանայք և 18-40 տարեկան տղամարդիկ, որոնք վազել են 10 կմ, և 36 տարեկանից բարձր տարիքի կանայք ու 41 տարեկանից բարձր տարիքի տղամարդիկ, որոնց վազքի երկարությունը նույնպես 10 կմ էր:

Տարբեր տարիքային խմբերում հաղթողներին մրցանակները հանձնել են վարչապետ Նիկոլ Փաշինյանը, Վարչապետի աշխատակազմի ղեկավար Արայիկ Հարությունյանը, Կրթության, գիտության, մշակույթի և սպորտի նախարար Վահրամ Դումանյանը, Առողջապահության նախարար Անահիտ Ավանեսյանը, Արմավիրի մարզպետ Համբարձում Մաթևոսյանը և Էջմիածնի քաղաքապետ Դիանա Գասպարյանը: Վարչապետը պարգևներ է հանձնել նաև կանանց և տղամարդկանց մրցավազքին մասնակցած ամենատարեց վազորդներին՝ 73-ամյա Շուշանիկ Պողոսյանին և 79-ամյա Խաչատուր Փրխոյանին:

Վարչապետ Փաշինյանը շնորհավորել է մրցաշարի բոլոր հաղթողներին, մրցանակակիրներին, մասնակիցներին և արձանագրել, որ այս մրցաշարը նույնպես կարող ենք համարել կայացած:

«Այս ընթացքում անընդհատ մի հարցով էի հետաքրքրվում, թե քանի քաղաքացի է մասնակցելու հայտ ներկայացրել: Այդ հարցի պատասխանն ինձ անհրաժեշտ էր ոչ թե որպես վիճակագրություն, այլ հասկանալու՝ արդյոք այս նախաձեռնությունն անհրաժեշտ է ՀՀ քաղաքացիներին: Այն փաստը, որ այսօր 1500-ից մասնակից ենք ունեցել՝ տալիս է այդ հարցի պատասխանը. այո, այս նախաձեռնությունն անհրաժեշտ է քաղաքացիներին: Ճիշտ է՝ մրցաշարը կոչվում է «Վարչապետի գավաթ», բայց կարծում եմ ակնհայտ է, որ այն կառավարության անդամների համար չենք անցկացնում, այլ անցկացնում ենք ՀՀ քաղաքացիների և ոչ միայն նրանց համար, որովհետև ուզում ենք մեր հայրենակիցներին աջակցել, խթանել, որպեսզի նրանք իրենց առաջ խնդիրներ դնեն և լուծեն դրանք:

Երբ անցնում էի այս ճանապարհը՝ արձանագրեցի, որ կարևոր է ոչ միայն մարզաձևը, սպորտը, այլև բովանդակությունը: Ցանկանում եմ այստեղ ուշադրություն դարձնել բովանդակության վրա, որովհետև մարդը հայտ է ներկայացնում, խնդիր դնում իր առաջ, հատում է գիծը, որը կոչվում է մեկնարկ, հաղթահարում է արգելքը՝ տվյալ դեպքում ճանապարհը և լուծում իր առաջ դրած խնդիրը, հասնում իր նպատակակետին և հատում մյուս գիծը, որտեղ գրված է վերջնարկ: Ուզում եմ, որ մեր երկրի կյանքը կազմակերպվի հենց այս տրամաբանությամբ՝ մենք մեր առաջ խնդիրներ դնենք, ունենանք համարձակություն և վճռականություն՝ հատել մեկնարկ կոչվող գիծը և ունենանք հետևողականություն, վճռականություն, ուժ, կամք՝ հաղթահարել ճանապարհը և ի վերջո հասնել նպատակակետին»,- նշել է Նիկոլ Փաշինյանը:

Վարչապետը շնորհակալություն է հայտնել բոլոր այն քաղաքացիներին, ովքեր արձագանքել են այս նախաձեռնությանը և հավելել, որ այն լինելու է շարունակական: Կառավարության ղեկավարի խոսքով՝ տարվա ընթացքում ունենալու ենք առնվազն 4 այսպիսի մրցաշար՝ մրցանակային հիմնադրամներով: Վարչապետը տեղեկացրել է, որ արդեն ունենք մասնակից, ով վերջին երկու ամսվա ընթացքում 1 մլն դրամից ավելի մրցանակ է ստացել:

«Առաջիկայում անցկացվելու է նաև սեղանի թենիսի մրցաշար, իսկ լողի մրցաշարը կկազմակերպվի հաջորդ ամռանը՝ Սևանա լճում: Այս մրցաշարերն այս տարի նվիրված են Հայաստանի 30-ամյակին և դրանցով պիտի ի ցույց դնենք մեր նվիրվածությունը մեր պետականությանը, մեր ինքնիշխանությանը, մեր անկախությանը: Մենք պետք է կարողանանք առաջադրել խնդիրներ, հաղթահարել ճանապարհը և հասնել նպատակակետին: Այսօր ընդգծվում է այս փիլիսոփայությունը և հայեցակարգը»,- նշել է գործադիրի ղեկավարը:

Առաջին տարիքային խմբի մրցանակակիր տղաները և աղջիկները ստացել են համակարգիչներ: Երկրորդ և երրորդ տարիքային խմբերում առաջին տեղի համար սահմանված է 1 մլն դրամ մրցանակ, երկրորդ տեղի համար` 600 հազար դրամ, երրորդ տեղի համար` 400 հազար դրամ, չորրորդ տեղի համար` 150 հազար դրամ, հինգերորդ տեղի համար` 100 հազար դրամ: Դրամական խրախուսումներ են նախատեսված նաև 6-10-րդ տեղեր գրավածների համար` 75 հազարական դրամ, 11-20-րդ տեղերի համար` 50 հազարական դրամ: Բացի դրանից՝ մրցաշարի 3 տարիքային խմբերում 1-3-րդ տեղեր գրաված մասնակիցները պարգևատրվել են ԿԳՄՍ նախարարության հավաստագրերով, գավաթներով, մեդալներով:

«Վարչապետի գավաթ» մրցաշարի անցկացման նպատակը հանրապետությունում վազքի և առողջ ապրելակերպի մասսայականացումն է, բնակչության շրջանում ֆիզկուլտուրայի և սպորտի խրախուսումը:

Ընթացիկ տարվա սեպտեմբերի 19-ին տեղի էր ունեցել նաև «Հայաստանի Հանրապետության վարչապետի գավաթ» խճուղային սիրողական հեծանվավազքի մրցաշարը: