Եթե միասին չէր լինելու, այդտեղ խնդիրներ էին առաջանալու․ Գյումրիի նորընտիր քաղաքապետը՝ ՔՊ-ի հետ համագործակցության մասին

Բացարձակ մեծամասնությունը ավագանու կազմում հնարավորություն կտա քաղաքի խնդիրներն ավելի արագ լուծել,- այս մասին այսօր լրագրողների հետ ճեպազրույցում նշել է Գյումրիի նորընտիր քաղաքապետ Վարդգես Սամսոնյանը։ Հիշեցնենք,Գյումրիի նորընտիր ավագանին այսօր անդրանիկ նիստում քաղաքապետ է ընտրել։ Միակ թեկնածուն «Բալասանյան դաշինք» սոցիալական կուսակցության ավագանու ցուցակը գլխավորող Վարդգես Սամսոնյանն է։

«Բալասանյան դաշինքն» ու «Քաղաքացիական պայմանագիրը» համագործակցության հուշագրով ամրագրել են, որ քաղաքապետի թեկնածու առաջադրում է «Բալասանյան դաշինքը», իսկ «Քաղաքացիական պայմանագրին» բաժին են հասնում երկու փոխքաղաքապետների պաշտոնները։ Ըստ այդմ, «Քաղաքացիական պայմանագիրը» քաղաքապետի թեկնածու չի առաջադրել և հայտարարել են, որ քվեարկելու են Վարդգես Սամսոնյանի օգտին։ Քաղաքապետի թեկնածուներ չառաջադրեցին նաև մյուս երեք ուժերը՝ «Զարթոնք» ազգային-քրիստոնեական, «Ապրելու Երկիր» և Հայաստանի հանրապետական կուսակցությունները։ Քվեարկությունը բաց էր, արդյունքները՝ պարզ։

Գյումրիի նորընտիր քաղաքապետը նշել է, որ քաղաքի խնդիրների լուծումը չի թողել այլընտրանք, քան միասնական աշխատանքը համերաշխ մթնոլորտում։

«Այն խնդիրների համախումբը, որն ունի Գյումրին, չի թողնում այլընտրանք, քան միասնական, թափանցիկ և համերաշխ մթնոլորտում  բոլոր կարող ուժերի օգտագործումը քաղաքի զարգացման ընթացքն ապահովելու համար։ Բացարձակ մեծամասնություն ստանալով, մենք կկարողանանք էլ ավելի արագ մեր Գյումրիի առջև ծառացած խնդիրները լուծել միասին։ Եթե միասին չէր լինելու, այդտեղ խնդիրներ էին առաջանալու՝ այլ, այլ հարցերից ելնելով»,- ասել է Գյումրիի քաղաքապետ Վարդգես Սամսոնյանը։

Գյումրիի ՏԻՄ ընտրություններում առավելագույն ձայներ ստացած «Բալասանյան դաշինք» սոցիալական կուսակցությունը և «Քաղաքացիական պայմանագիրը» համագործակցության հուշագրով ամրագրված իրենց պայմանավորվածությունները կատարեցին և Վարդգես Սամսոնյանի օգտին քվեարկեցին։ Մյուս երեք կուսակցությունները, որոնց մանդատների հանրագումարն ընդամենը 8-ն է, դեմ քվեարկեցին։ Ինչ կարող են անել Գյումրիի ավագանու ընդդիմադիր ուժերը իրենց քիչ մանդատներով․․․ «Զարթոնք» ազգային քրիստոնեական կուսակցության ավագանու անդամը կարճ պատասխանեց։

«Մենք ընդամենը աշխատելու ենք։ Ժողովուրդը մեզ տվել է 4 մանդատի քվե, և մենք աշխատելու ենք, փաստերը ներկայացնելով ենք աշխատելու»,- SHANTNEWS-ին ասել է Գյումրիի ավագանու «Զարթոնք» խմբակցության անդամ Վարդևան Հակոբյանը։

Գյումրիի նորընտիր քաղաքապետը պաշտոնապես լիազորությունները կստանձնի եռօրյա ժամկետում։ Նոյեմբերի 4-ին տեղի կունենա նրա երդմնակալության արարողությունը։ Իսկ ովքեր են լինելու փոխքաղաքապետները, որոնց ներկայացնելու է «Քաղաքացիական պայմանագիրը», այս մասին ոչինչ հայտնի չդարձավ։

«Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX, ARPINET, Opticom, SHIRAK telecom, HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։