Տեղի է ունեցել «Միասին՝ ապագային ընդառաջ» հայ-վրացական երիտասարդական ֆորումը. ԿԳՄՍՆ

«Հայաստանի Հանրապետության սպորտի և երիտասարդության հարցերի նախարարության և Վրաստանի սպորտի և երիտասարդության հարցերի նախարարության միջև երիտասարդությանն առնչվող հարցերի բնագավառում համագործակցության մասին» համաձայնագրի շրջանակում նոյեմբերի 7-9-ը ՀՀ ԿԳՄՍ նախարարության նախաձեռնությամբ Վրաստանի մշակույթի, սպորտի և երիտասարդության նախարարության՝ երիտասարդության հարցերով գործակալության հետ իրականացվում է «Միասին՝ ապագային ընդառաջ» (Together Towards Tomorrow) հայ-վրացական երիտասարդական ֆորումը:

Նոյեմբերի 8-ին Աղվերանում տեղի է ունեցել ֆորումի պաշտոնական բացումը, որը մեկնարկել է Հայաստանում Վրաստանի դեսպանության առաջին քարտուղար Շալվա Սաբաուրիի և ՀՀ ԿԳՄՍ նախարարության երիտասարդական քաղաքականության, լրացուցիչ և շարունակական կրթության վարչության պետ Գոհար Մամիկոնյանի մասնակցությամբ:

Գոհար Մամիկոնյանը ԿԳՄՍ նախարարության անունից ողջույնի խոսք է հղել պատվիրակներին և ֆորումի մասնակիցներին՝ ընդգծելով, որ 2012 թվականին երկկողմ համաձայնագրի ստորագրումից գրեթե տասը տարի անց երիտասարդության ոլորտում կողմերի միջև իրականացվում է առաջին երիտասարդական ֆորումը, որի օրակարգն ընդգրկում է հետաքրքիր թեմաների լայն շրջանակ:

Վարչության պետի խոսքով՝ ֆորումի նպատակն է խթանել երիտասարդական աշխատանքը երկու երկրներում, տրամադրել տարածքներ, որտեղ երիտասարդները կարող են կիսվել իրենց փորձով, զարգացնել համայնքային երիտասարդական աշխատանքը, ձեռք բերել նոր կարողություններ և հմտություններ, ինչպես նաև ներգրավել համայնքային ռեսուրսները:

«Միջազգային համագործակցության և փոխանակման համար բաց լինելու առումով մենք անչափ գնահատում ենք ձեր այցը մեր ջերմ ու հյուրընկալ երկիր: Այս ժամանակներում, երբ բոլորս ձգտում ենք կայուն ապագա ստեղծելու, մենք հասկանում ենք, որ կայունությունն ու զարգացումը ձեռք կբերվեն միայն այն դեպքում, եթե մենք համագործակցենք և կառուցենք կամուրջներ հարևան երկրների միջև, հատկապես՝ երիտասարդության շրջանում»,- դիմելով գործընկերներին՝ նշել է Գոհար Մամիկոնյանը՝ մաղթելով հաջողություններ քննարկումներում և հաճելի հանգիստ Հայաստանում:

Միջոցառմանը ներկա էր երկու երկրների համապատասխան գերատեսչությունների և երիտասարդական կազմակերպությունների շուրջ 70 մասնակից, որից 40-ը՝ երիտասարդական աշխատողներ (յուրաքանչյուր կողմից՝ 20-ական ներկայացուցիչ):

«Միասին՝ ապագային ընդառաջ» (Together Towards Tomorrow) հայ-վրացական երիտասարդական ֆորումն ուղղված է երիտասարդական աշխատողների միջև փորձի փոխանակմանը, երիտասարդական ոլորտում հետագա համատեղ ծրագրերի իրականացման հնարավորության քննարկմանը: Հատկանշական է նաև, որ այս ֆորումը յուրօրինակ մի հարթակ է, որը հնարավորություն է ընձեռում ստեղծելու նոր կապեր, քննարկելու փոխադարձ հետաքրքրություն ներկայացնող հարցեր, փոխանակման ծրագրեր, որոնք կամրջում են երիտասարդներին և ակտիվացնում ոլորտային գործակցությունը Հայաստանի և Վրաստանի միջև: