Շիրակի մարզում ճանապարհների ձմեռային սպասարկումը սկսված է

Անցած գիշեր ձյուն է տեղացել Արթիկի տարածաշրջանի բարձրադիր հատվածներում և Աշոցքում։ Ճանապարհները աղով ու ավազով մշակելու կարիք է զգացվել։ Ճանապարհային ընկերությունները՝ համաձայն պայմանագրի, ձմեռային սպասարկումը պետք է սկսեն նոյեմբերի 15-ին ու ավարտեն ապրիլի 1-ին։ Բայց Շիրակի մարզի բնակլիմայական պայմանները չեն ենթարկվում պայմանագրային ժամկետներին։ Առաջին ձյունն Աշոցքում այս տարի հոկտեմբերի 25-ին է տեղացել։

Ձյան տեղումներ ու գետնաբուք․․․

Այսպիսին է եղել վիճակն անցած գիշերը Արթիկի բարձրադիր հատվածներում և Աշոցքում։ Տեղումներն առատ չեն եղել, բայց ուղեկցվել են ցածր ջերմաստիճանով ու քամիով, ինչի հետևանքով գետնաբուք ու մերկասառույց է առաջացել։ Աղ ու ավազ շաղ տվող մեքենաները նաև առավոտյան են աշխատել։ Աշոցքի տարածաշրջանում ձյուն տեղացել է միայն Վարդաղբյուրի հատվածում, բարձրադիր ու ամենաբարդ տեղանքն է։

« Գիշերն ունեցել ենք տեղումներ , տեղ-տեղ մերկասառույց։ Ավելի բարձրադիր հատվածում է մեր տարածաշրջանը գտնվում։ Վարդաղբյուրից մինչև Ղոչի աղբյուր կոչվող հատվածն է։ Քամին այստեղ հյուսիսային ու մշտապես առկա է։ Դրա համար այստեղ ամենաբարդ և ձմռանը դժվարանցանելի է։ Միայն Աշոցքի տարածաշրջանում շուրջ 100 կմ ճանապարհ ենք սպասարկում, նույնքան Ամասիայի տարածաշրջանում է։ Ձորի գյուղեր տանող ճանապարհներն ամեն օր սպասարկելու կարիք կա ձմռանը։ Մենք հոկտեմբերից մեր տեխնիկան պատրաստ ենք պահում, որովհետև գիտենք, որ Աշոցքում եղանակներն անկանխատեսելի են»,- SHANTNEWS-ին ասել է «Աշոցքի ԱՏՃ» ՓԲԸ աշխղեկ Վարդան Մովսիսյանը։

Նույն այս տեղանքում ձմռանը մեքենաներ են արգելափակվում։ Ծանր բեռնատարները վերելքները հաճախ չեն կարողանում հաղթահարել։ Ձնաբքի տակ մնացած մեքենաներին ավելի արագ օգնության հասնելու համար Գյումրի-Բավրա ճանապարհին սպասարկող ընկերությունը հենակետ է կառուցել։ Այստեղ 24 ժամյա ռեժիմով հերթապահում են ճանապարհը սպասարկող բրիգադները, նաև առանձին հատվածներ են հատկացված ձմռանն օգնության կարիք ունեցող վարորդների ու ուղևորների համար։ Եվս մեկ հենակետ Աշոցքում է գործում։

Ճանապարհների ձմեռային սպասարկման ամենամեծ ծավալները Աշոցքում ու Ամասիայում են։ 1կմ-ի սպասարկման վճարն էլ այս տարածաշրջաններում ամենաբարձրն է։ Պայմանագրային ժամկետներն ու եղանակային պայմանները չեն համապատասխանում։ Ձմեռն Աշոցքում ու Ամասիայում միշտ ավելի շուտ է գալիս։ Ըստ պայմանագրերի ընկերությունները պարտավոր են սպասարկումն ապահովել, անկախ ժամկետներից ու ֆինասավորման չափից։

«Շիրակի մարզում ձմեռային շրջանում ճանապարհների սպասարկման գումարները յուրաքանչյուր տարի չեն բավարարել պայմանագրային պարտավորությունների կատարմանը, սակայն ընկերություններն ամբողջությամբ ձմեռային աշխպատանքներն իրականացնելիս պետք է բոլոր համայնքները մարզկենտրոնին և գլխավոր մայրուղիներին կապող ճանապարհները մաքրեն։ Բնականաբար, դա անում են իրենց շահույթների հաշվին, իսկ գլխավոր ճանապարհների սպասարկումն ամբողջությամբ ֆինանսավորվում է»,- SHANTNEWS-ին ասել է Շիրակի մարզպետարանի քաղաքաշինության վարչության  պետի պարևտականությունները կատարող Խաչատուր Խնձրցյանը։

Շիրակի մարզի 5 տարածաշրջաններում ճանապարհները սպասարկում են 4 կազմակերպություններ։ Նրանց բոլորի պայմանագրային ժամկետներն այս տարի լրանում են։ Մինչև տարեվերջ նոր մրցույթ է հայտարարվելու, ընտրվելու են նոր կազմակերպություններ։ Համաձայն գործող կարգի սպասարկող մրցույթում ուշադրության կենտրոնում է լինելու ընկերությունների տեխնիկական հագեցվածությունը։ Նոր մրցույթի արդյունքում ճանապարհների ձմեռային սպասարկման արժեքները վերանայվելու են։