Շիրակի մարզում ամփոփվել են ՏԻՄ ընտրությունների նախնական արդյունքները և մանդատների հաշվարկը

Շիրակի մարզի Ախուրյան, Ամասիա, Աշոցք և Արթիկ խոշորացվող  համայնքներում ընտրությունները համակարգում են թիվ 30, 32 և 33 տարածքային ընտրական հանձնաժողովները, որոնք ամփոփել են ՏԻՄ ընտրությունների նախնական արդյունքները։ Համաձայն դրանց՝ Շիրակի մարզում ՏԻՄ ընտրություններին մասնակցած բոլոր կուսակցություններն ու դաշինքները հաղթահարել են անցողիկ շեմը։ Հիշեցնենք, կուսակցությունների համար 4, իսկ դաշինքների համար 6 %-ն է։

4 խոշորացվող համայնքներում ընտրապայքարը  մրցակցային լինելու առումով տարբեր էր։ Աշոցքում ամենաքիչը՝ 2 ուժ էր պայքարում, Արթիկում էլ ամենաշատը՝ 6 կուսակցություն և դաշինք։ Ինչքան առաջադրված ուժերը, հետևաբար նաև թեկնածուները, շատ են, այնքաՆ ՏԻՄ ընտրությունների նկատմամբ հետաքրքրությունը մեծ է։ Ըստ այդմ՝ Շիրակի մարզի 4 համայնքներում մասնակցության ցուցանիշը տարբեր է։ Ամենաակտիվը Ամասիան է, որն ընդգրկում է 26 բնակավայր։

Աշոցքում ընդամենը 2 կուսակցություն էր մասնակցում ընտրություններին։ Մասնակցությունն այստեղ քիչ է եղել։ Աշոցքը Շիրակի մարզում միակ համայնքն է, որտեղ մասնակից ուժերից մեկը՝ «Քաղաքացիական պայմանագիր» կուսակցությունը քվեների բացարձակ մեծամասնությունն է ստացել` 66,03 %:

«Աշոցքի ՏԻՄ ընտրություններին մասնակցում է երկու ուժ՝ «Քաղաքացիական պայմանագիր» կուսակցությունը և ԲՀԿ-ն։ ԲՀԿ-ն ստացել է 1090 ձայն կամ 31,08 %, իսկ «Քաղաքացիական պայմանագիր» կուսակցությունը՝ 2316 ձայն կամ 66,03%: Այսինքն՝ Աշոցքում 50+1 տոկոս է և միանձնյա կարող է կատարվել համայնքի ղեկավարի ընտրություն»,- SHANTNEWS-ին ասել է թիվ 30 տարածքային ընտրական հանձնաժողովի նախագահ Արթուր Խաչատրյանը։

Ախուրյանի 38 տեղամասերից գրանցամատյանում ենթադրյալ խախտման մասին 3 արձանագրություն կա։ Թե ինչպիսի խախտումներին են դրանք վերաբերում, հանձնաժողովը դեռ ուսումնասիրելու է։ Չնայած Ախուրյանում ընտրապայքարը թեժ էր ու լարված, բայց թիվ 32 տարածքային ընտրական հանձնաժողովի նախագահն է նշում՝ տեղամասերում այնպիսի խախտումներ թույլ չեն տրվել, որոնք կազդեին ընտրությունների արդյունքների վրա։ Ախուրյանում ընտրողների մոտ 42 տոկոսն է մասնակցել քվեարկության։ Միջին հաշվարկով՝ Ախուրյանի ամեն տեղամասում մոտ 10 քվեաթերթիկ անվավեր է եղել։

«370 անվավեր քվեաթերթիկներ կան։ Քանի որ այս անգամ քվեաթերթիկի վրա նշումներ են կատարել ընտրողները, սպասում էի, որ ավելի շատ են լինելու անվավեր քվեաթերթիկները։ Կոպիտ խախտումներ չեն արձանագրվել և դիմում-բողոքներ չունենք։ Գրանցամատյանում 3 գրառում կա։ Դեռ պետք է ճշտենք, թե ինչ պատճառով են արվել այդ գրառումները»,- SHANTNEWS-ին ասել է թիվ 32 տարածքային ընտրական հանձնաժողովի նախագահ Ներսես Մարգարյանը։

Արթիկում 5 կուսակցություն և 1 դաշինք էր ընտրապայքարում։ Բոլորը կարողացել են հաղթահարել անցողիկ շեմը։ Պատկերը նույնն է Շիրակի մարզի մյուս խոշորացվող համայնքներում ևս։ ՏԻՄ ընտրություններն առաջին անգամ էին համամասնական ընտրակարգով և ավագանու կազմում մանդատ չստացած որևէ ուժ Շիրակի մարզում չկա։

«Արթիկը քաղաքականացված շրջան է։ Մրցակցությունը թեժ էր։ Մասնակցում էին 5 կուսակցություններ և 1 դաշինք, սակայն ընտրություններն ընթացել են առանց լուրջ խախտումների։ ՏԻՄ ընտրությունների նկատմամբ հետաքրքրությունը մեծ է։ Բոլոր ուժերը պայքարեցին իրենց քվեների համար և բոլորն էլ հասան հաջողության»,- SHANTNEWS-ին ասել է թիվ 33 տարածքային ընտրական հանձնաժողովի նախագահ Գոռ Պետրոսյանը։

Տարածքային ընտրական հանձնաժողովները ընտրությունների նախնական արդյունքներն ամփոփել են, ըստ այդմ՝ մանդատների նախնական բաշխում կատարել։ Մանդատների հաշվարկը կատարվում է ընտրական օրենսգրքով սահմանված բանաձևով։ Հայտնի է մանդատների բաշխումն՝ ըստ ընտրությունների նախնական տվյալների․

Ամասիա

Ամասիա-Արփի – 6 մանդատ

ՔՊ – 6 մանդատ

ՀՀԿ – 3 մանդատ

Աշոցք

ՔՊ – 10 մանդատ

ԲՀԿ – 5 մանդատ

Արթիկ

« Ազատական» կուսակցություն – 3 մանդատ

« Հանուն Հանրապետության» կուսակցություն – 4 մանդատ

« Ապրելու երկիր» կուսակցություն  – 1 մանդատ

ՀՅԴ – 2 մանդատ

«Միասնական Արթիկ» դաշինք – 6 մանդատ

ՔՊ – 11 մանդատ

Ախուրյան համայնքում մանդատների հաշվարկը դեռ չի ներկայացրել թիվ 32 տարածքային ընտրական հանձնաժողովը։ Վերահաշվարկի մասին դիմում-բողոքներ են ընդունելու մինչև վաղը։ Քանի դեռ այս ժամկետը չի լրացել, ասում է տվյալներն ու հաշվարկները վերջնական  համարվել չեն կարող։ Տարածքային ընտրական հանձնաժողովները ընտրությունների արդյունքների վերջնական ամփոփում ու մանդատների բաշխում կատարելու են 1 շաբաթից՝ դեկտեմբերի 12-ին, որից հետո խոշորացվող համայնքներում ավագանու առաջին նիստերն են կայանալու և ընտրվելու են համայնքների ղեկավարներ։ Համայնքի ղեկավարի ընտրությունը կանխատեսելի է միայն Աշոցքում, մյուս համայնքներում կոալիցիաներ են ձևավորվելու։