Սեպտեմբերից կգործի վաղաժամկետ ազատման նոր կարգը. ի՞նչ խնդիր այն կլուծի

Քրեակատարողական հիմնարկներում հասարակական վերահսկողություն իրականացնող հասարակական Դիտորդների խումբն աշխատանքային գործունեության ընթացքում հանդիպում է մի շարք խոչընդոտների: Խնդիրների մասին այսօր բարձրաձայնել են խմբի անդամները:

ԱՆ ՔԿՀ-ներում հասարակական վերահսկողություն իրականացնող հասարակական դիտորդների խմբի նախագահ Հասմիկ Հարությունյանն իր մտահոգությունը հայտնեց, մասնավորապես, պայմանական վաղաժամկետ ազատման խնդիրների շուրջ:

«Այս տարվա մայիսին օրենսդրական փոփոխություններ տեղի ունեցան, սակայն այն նոր մտահոգություններ ու ռիսկեր առաջ քաշեց: Եթե նախորդ տարիներին բողոքներ էին ստացվում անկախ հանձնաժողովների գործունեության հետ կապված, որ մերժման որոշումները պատճառաբանված ու հիմանվորված չեն, ապա 2017թ. տեղի ունեցած փոփոխություններով անկախ հանձնաժողովի ներսում ենթահանձնաժողովի ինստիտուտը հանվեց: Արդյունքում, վաղաժամկետ պայմանական ազատման աճ արձանագրվեց: 2016-ին 115 ազատում, 2017-ին ՝ 365, սակայն կային ընթացակարգային խնդիրներ և այդ խնդիրները բերեցին նոր փոփոխության՝ 2018թ. մայիսին: Անկախ հանձնաժողովը վերացվեց»,- ասաց Հասմիկ Հարությունյանը։

Փոփոխության համաձայն` հիմնական դերակատարները, վարչակազմի հետ միասին, հանդես են գալու քրեակատարողական և պրոբացիոն ծառայությունները:

Սեպտեմբերից կալանավորված անձը պետք է դիմում ներկայացնի վարչակազմին: Այն ներկայացվում է պրոբացիոն և քրեակատարողական ծառայություն, և վերջիններս պետք է տրամադրեն զեկույց: Հենց այստեղ էլ թաքնված է մտահոգության առիթը:

«Զեկույց տալու համար հիմնական աղբյուր հանդիսանալու է անձնական գործը, սակայն քրեակատարողական վարչությունը ամենօրյա կտրվածքով, դինամիկ աշխատանքներ ազատազրկվածների հետ չի տանում և ստացում է, որ երկրորդային աղբյուրի հիման վրա տրվում է տեղեկություն, որի հետ դեմ առ դեմ հանդիպումներ, աշխատանքներ տեղի չեն ունեցել: Սա կարող է հանգեցնել նախորդ իրավիճակին, երբ անկախ հանձնաժողովը առանց անձին ճանաչելու տալիս էր կարծիք, որը հիմնականում լինում էր բացասական»,- ասաց Հարությունյանը:

Մտահոգություն կա նաև պրոբացիոն ծառայության հետ կապված: Այսօրվա կադրային հնարավորությունները, տարվող աշխատանքների բնույթը բավարար մակարդակի վրա չէ՝ վստահաբար ասելու համար, որ տրամադրվող զեկույցները կարող են արդյունավետ լինել և հիմք հանդիսանալ վաղաժամկետ ազատման համար:

«Այս տարիներին բոլոր փոփոխությունները, խնդրի լուծման ճանապարհների որոնումը մի խնդիր է ունեցել՝ միշտ քիչ տեղ է հատկացվել ՔԿՀ վարչակազմերին, մինչդեռ հիմնական ամենօրյա աշխատանքն ու հիմնական գործառույթը կատարում են հենց վարչակազմերը, բայց որոշման կայացման գործընթացում նրանց դերակատարումը քիչ է, ինչն էլ իր հերթին մի շարք այլ խնդիրներ է առաջ քաշում»,- նշեց Հասմիկ Հարությունյանը: