«Դասական ուրբաթ» Գյումրիում․ երիտասարդ արվեստագետները բացահայտում են իրենց ստեղծագործական ձիրքը

Ժողովրդական երաժշտական նվագարանը՝ դուդուկը, դասական երաժշտության մոտիվներով է ներկայանում՝ նորովի կամ նոր ընկալումներով: Երիտասարդ դուդուկահարների համույթը քաղաքի տարբեր երաժշտական դպրոցներից ընտրված լավագույն կորիզն է: Հնչեց Կոմիտաս, Եկմալյան, Սայաթ-Նովա, և  ջազ երաժշտության հետ դուդուկը նվագակցեց։ Կարապետ Շաբոյանի դուդուկահարների համույթի գեղարվեստական ղեկավարը՝ Կարապետ Շաբոյանը, դուդուկի առանձնահատկություններից է խոսում։ Այն մարդիկ սովորաբար ասոցացնում են տխրության հետ ,սակայն երաժիշտը կարծում է, որ երաժշտական այս գործիքով հնարավոր է ստանալ նաև դասական մեղեդի։

«Փորձեցինք եվրոպական ստեղծագործությունները քառաձայն  գործիքավորումով ստանալ, բայց վախվորած էինք, որ հնարավոր է հանդիստաեսը չընդունի, բայց ինչպես տեսաք բավական լավ արձագանք եղավ»։

Երաժշտական նվագարան ծիրանափողը աշուղական կամ ժողովրդական երաժշտության, համար է նախատեսված, բայց և իմպրովիզներ էլ անելիս երիտասարդ դուդուկահարները գործիքի, այսպես ասած, հատկանշական կողմը չեն խաթարում՝ ազգային ավանդականի գիծը դասականի հետ համադրելիս պահպանել են: Հարությունն իրեն հմուտ դուդուկահարների շարքը չի դասում: Դուդուկն ինքնին դժվար գործիք է, ինքն էլ ՝ նորեկ:

«Դուդուկը շատ բարդ գործիք է, ես ինքս լիարժեք չեմ տիրապետում գործիքին։ Այս միջոցառմանը ճիշտ է դասական երաժշտություն ենք ստացել դուդուկի միջոցով, բայց պահպանել ենք այդ աշուղական ավանդական տեսակը»։

«Կոտրվում են մի շարք կարծրատիպեր արվեստի մեջ, որ սահմանազատում է դրված սա կարելի է, սա ոչ, բայց ամեն բան թեական է և, այո, հնարավոր է ժողովրդական գործիքով դասական երաժշտություն նվագել»,- շեշտում է Գյումրիի քաղաքապետարանի մշակույթի և երիտասարդության հարցերի բաժնի պետ Լիլիթ Թովմասյանը։

Դասականությունը երաժշտությունում զուգորդվեց նաև արվեստի մեկ այլ ճյուղով, այն լրացրեցին Գյումրիի հին ու նոր պատկերներով Արթուր Մուրադյանի գրաֆիկական աշխատանքները: Նկարչի աչքը Գյումրիի տնակային թաղամասերը, ցեխոտ փողոցներն ու կիսավեր շինությունները մռայլ գունապնակով է դիտել ու հենց այս միջավայրից էլ Արթուրն իմպուլսներ է ստանում ստեղծագործելու: 11 աշխատանք է ցուցադրված՝ բոլորը քաղաքային պատկերներ են և՛ հինը, և՛ վերանորոգվածը:

«Ճիշտ է, այստեղ ֆիգուրներ չկան, հերոսներ չկան, բայց նրանք այն մարդիկ են, որոնք տարիներով ապրել են դոմիկներում, համբերատար սպասել են։ Հուսով եմ, որ ավելի ուրախ պատկերներ կնկարե, վառ գույներ վազվզող երեխաներ»,- ասում է գեղանկարիչ Արթուր Մուրադյանը։

Ամեն ամսվա վերջին ուրբաթն այս նույն ճեմասրահում էլի դասական կլինի: Մշակույթի և երիտասարդության հարցերի բաժինն այս նախագիծը 2019 թվականից է իրականացնում։ Քաղաքի գրավչությունն ու նրա հանդեպ ունեցած հետաքրքրությունների մշակութային բաղադրիչը, այն էլ  դասականի շրջանակներում, ևս տարբերվող է: Ամեն «դասական ուրբաթ»-ին երիտասարդ ստեղծագործողների նոր անուններ են բացահայտվում: