Շիրակի մարզպետարանը հաշվառել է հրատապ լուծում պահանջող խնդիրները․ փաթեթում է ավելի քան 150 առաջարկ

Շիրակի մարզի հրատապ լուծում պահանջող խնդիրների ցանկն հայտնի է, պետական ֆինանսավորման չափը հաստատվելու դեպքում արդեն Շիրակի մարզպետարանը կառանձնացնի ամենահրատապները։ Մարզի 6 համայնքներից ստացվել են ենթակառուցվածքների նորոգումների փաթեթներ, դրանց թիվը 150-ից ավելին է` ճանապարհաշինություն, շենքերի տանիքների նորոգում, ջրահեռացման և ջրամատակարարման համակարգերի նորացում, կրթական, մշակութային և մարզական օբյեկտների հիմնանորոգում և այլն։ Գյումրիում, որպես հրատապ լուծում պահանջող, առանձնացվել են միջպետական նշանակության 2 փողոցի և մոտ 160 բնակելի շենքերի տանիքների նորոգումներ։

Գյումրիի Շիրակացի փողոցն ունի միջպետական նշանակություն, այն ճանապարհներից մեկն է, որը տանում է հայ-վրացական սահման՝ Բավրայի անցակետ։ Ծանրաբեռնվածությունը փողոցի բեռնափոխադրումների առումով է նաև մեծ, նման կարևորության փողոցի 3 կմ-ից ավելի հատվածը գարուն-ամառ-աշուն սեզոններին երթևեկելի են պահում ընթացիկ՝ փոսային նորոգումներով, իսկ ասֆալտած փոսի կողքին մեկ ուրիշն է բացվում։

Մարզի հրատապ խնդիրների լուծման այս տարվա ցանկը կազմելիս քաղաքապետարանն առաջնահերթ առաջարկել է ընդգրկել Շիրակացի փողոցը։ Հրատապ է հիմնանորոգումը, մասնավորապես, Դուդկոյից մինչև Անի թաղամասի վերջ ձգվող 3,2 կմ երկարության հատվածում։ Փողոցն ամբողջությամբ հիմնանորոգելու անհրաժեշտություն ունի, բայց խնդիրն այն է, որ ջրամատակարարման ցանցը հինն է մնացել ու վատ վիճակում  է։

«Պլանավորված է, ծրագիր կա՝ մինչև էս տարվա կես էդ հատվածն էլ ամբողջությամբ փոխել, մնում է որոշակի հատվածներում կոյուղու ցանցը նորոգել։ Փողոցաշինության ժամանակ ջրամատակարարման ցանցն ամբողջությամբ կարդիականանա, իսկ կոյուղին հատվածաբար, որտեղ կարիք եղավ»,- ShantNews.am-ի հետ զրույցում նշել է Գյումրիի քաղաքապետարանի բնակկոմունալ և շրջակա միջավայրի պահպանության բաժնի պետ Սուրեն Ջանոյանը։

Փոսային նորոգումները Շիրակացիում երկար չեն ձգում նաև այն պատճառով, որ փողոցը չունի ջրահեռացման ցանց, ձյան հալվելուն պես փողոցում խոռոչներ են առաջանում, իսկ հորդ անձրևներին ջրածածկվում է։ Դրենաժային համակարգի կառուցումը այս փողոցի առաջնային հարց է դիտարկվում։

Վազգեն Սարգսյան 6 բազմաբնակարան շենքի ծակ ու վնասված տանիքի հետևանքները բնակարաններում են։ Հրատապ խնդիրների լուծման ծրագրում հաշվառված շենքերից մեկն է, իսկ այդպիսիք, որոնց տանիքների նորոգումը հրատապներից են, 159-ն են։ Ամեն տարի հրատապ խնդիրների լուծման ծրագրի փաթեթ ներկայացնելիս այս շենքը հայտնվում է այդ ցանկում։ 1959 թվականից բնակեցված շենքում թեկուզ մասնակի վերանորոգումներ չեն եղել։ Շենքի վերին՝ չորրորդ հարկում, արդեն ապրողներ չկան, ժամանակավոր հեռացել են կաթող տանիքի պատճառով։

Շիրակի մարզպետարանում ավարտել են մարզի բոլոր՝  6 համայնքներում առկա հրատապ լուծում պահանջող խնդիրները հաշվառել, ցանկը պատրաստ է։ Ընդհանուր առմամբ, մոտ 160 տեսակի խնդիր է գույքագրվել, ըստ մարզպետարանի քաղաքաշինության վարչության պետի, բոլորն էլ առաջնային են համարվում համայնքների համար։

 «Մասնավորապես առանձնացվել են ճանապարհաշինություն, կրթական օբյեկտների հիմնանորոգում կամ վերանորոգում, մարզական օբյեկտներ, ջրամատակարարում, ջրահեռացում և այլ մշակութային օբյեկտներ։  Հրատապ լուծում պահանջող խնդիրները միշտ ֆինանսավորվում են պետական բյուջեով, բայց նաև եթե լինեն դոնորային կազմակերպություններ, ներկայացված ցանկից կընտրվի ամենահրատապը, և կներկայացնենք դոնորներին, որը լինի՝ միանշանակ կօգտագործենք»,- նշում է Շիրակի մարզպետարանի քաղաքաշինության վարչության պետ Խաչատուր Խնձրցյանը։

Իսկ հրատապների մեջ կան նաև խիստ հրատապ լուծում պահանջողները, բայց ֆինանսական ռեալ  կամ մոտավոր հաշվարկներ չկան, թե ինչ չափի միջոցներ են հարկավոր դրանց լուծման համար։ Մարզի հրատապ լուծման խնդիրներից 30-ը զուգահեռ ներկայացրել են նաև այս տարվա նոր սուբվենցիոն փաթեթում, համայնքներին առաջարկվել է կազմել նախագծանախահաշվային փաստաթղթերը։