Գյումրիում տնակային երկու մանկապարտեզներ նոր շենքեր կունենան, ևս մեկը կշարունակի գործել տնակում

75 երեխայի համար ու երեք խմբասենյակով նոր մանկապարտեզի շենքի կառուցումն ավարտված է, ներսի աշխատանքները ևս։ «Սուրբ Մարիամ» մանկապարտեզի շինաարությունը սկսվել էր 2020 թվականի ամռանը՝ Հայաստանի տարածքային զարգացման հիմնադրամի ֆինասնավորմամբ, որից 10%-ը Գյումրիի տեղական բյուջեի ներդրումն է։ Շենքն ավարտուն տեսք ունի, բայց լիարժեք ապահովված չէ գույքով։ Թեև սա չէ պատճառը, որ չեն վերաբացվում, շինարարական թերություններ են ի հայտ եկել։

«Եկան ուսումնասիրեցին, որ կտուրը խնդիր ունի, խոնավանում է պատը, դրա համար պետք է, որ շինարարը գա նորից շտկումներ անի»,-ասում է մանկապարտեզի տնօրեն Աշխեն Գևորգյանը։

Շիրակի մարզպետարանի քաղաքաշինության վարչության մասնագետները այլ թերություններ էլ են նկատել, որոնք շինարարը պետք է վերացնի։ Ջրհորդանը տեղադրվել է անհամապատասխան՝ շենքը ներսից ու դրսից խոնավանում է։ Մինչև խնդիրը չլուծվի, շենքը շահագործել չեն կարողանա։ Արդեն հերթագրված 50 սան ունեն, այս ընթացքում մյուսներն այլ մանկապարտեզներ են հաճախել, աշխատողների մի մասը հարկադիր պարապուրդում է, մի քանիսն էլ այլ մանկապարտեզներում են ժամանակավոր տեղավորվել աշխատանքի։ Իսկ այս պահին ունեցած գույքը Հայաստանի Տարածքային զարգացման հիմնադրամն է հատկացրել, որը համալրելու կարիք կա։

«Չկա գրապահարան, աթոռների քանակն է քիչ, յուրաքանչյոր խմբին տրվել է 2 աթոռ, բայց դահլիճում ոչ մի աթոռ չունենք, եթե միջոցառում լինի կամ ժողով, հյուրերի համար աթոռներ չունենք, խմբասենյակների համար էլ սպասքապահարան չկա, ինչը նույնպես կարևոր է»,-նշում է մանկապարտեզի տնօրենը։

Քաղաքապետարանը բյուջեից 638․000 դրամ է հատկացրել, որով կկարողանան խոհանոցի գույքը գնել։ Մնացածի համար ֆինանսական թե ինչ միջոցներ են պահանջվում և ում է դիմելու, ընթացիկ աշխատանքներից է կախված։ Ամեն դեպքում մանկապարտեզը վերաբացելու ժամկետներ չկան։

Ոչ հեռու թաղամասում,«Զանգակ» մանկապարտեզի համար է նոր շենք կառուցվելու։ Հիշեցնենք, 2020 թվականի հուլիսին ուժեղ ջրհեղեղի հետևանքով տնակային մանկապարտեզը փլվեց, ինչն էլ արագացրեց նորը կառուցելու ծրագիրը, բայց հիմնային աշխատանքները նոր են սկսվել։

Տնակային պայմաններում միակ գործող մանկապարտեզը շարունակում է մնալ «Ծիածանը»։ 30 տարում ու գրեթե ամեն տարի տնակի հատակ են նորոգում, տանիքի թիթեղները նորացնում, կոսմետիկ միջամտություններով երեխաների համար հաճելի միջավայր ստեղծում։

Տնակային լինելով հանդերձ՝ սաների թիվը չի նվազում։ Տնակ-մանկապարտեզ այժմ 110 երեխա է հաճախում։ Այն շենքը, որը Գյումրիի քաղաքապետարանը նախատեսել է հատկացնել «Ծիածանին», նախկին թիվ 10 մանկապարտեզի շենքն է, որտեղ մեկ ընտանիք է ապրում, իսկ առաջին հարկում սպասարկման օբյեկտներ են գործում։ Շենքը քաղաքապատկան է, բայց թե ինչ իրավաբանական լուծում է գտնվելու, դեռ հստակ չէ ։