Շիրակի մարզի համայնքները ծանոթանում են գյուղատնտեսության պետական աջակցության այս տարվա ծրագրերին, իսկ գյուղատնտեսության վարչությունը նախորդ տարվա ցուցանիշներն է ներկայացնում

2018 թվականից սկսած կառավարությունը գյուղացիական տնտեսություններին, փոքր ու միջին ձեռներեցներին, ֆերմերներին առաջարկում է գյուղատնտեսության աջակցության ծրագրեր, որոնք ուղղված են ոլորտի տարբեր ճյուղերի զարգացմանը։ Շիրակի մարզում հիմնականում օգտվում են գյուղվարկերի տոկոսադրույքների սուբսիդավորման, տավարաբուծության զարգացման, լիզինգով գյուղտեխնիկայի ձեռք բերման, խելացի անասնաշենքերի կառուցման ծրագրերից։

Գարնան գյուղատնտեսական աշխատանքների մեկնարկից առաջ պետությունը դարձյալ օժանդակության տարբեր ծրագրեր է առաջարկում գյուղացուն։ Աջակցության այս տարվա ծրագրերին գյուղացին դեռ նոր է ծանոթանում։ Մարզի գյուղվարչությունը նախորդ տարվա ցուցանիշներն է ներկայացնում։ 2021-ին մեծամասամբ օգտվել են գյուղտեխնիկայի լիզինգի աջակցության ծրագրից, արդյունքում համայնքները ձեռք են բերել 49 միավոր տեխնիկա․ ընդհանուրը՝ 423 մլն դրամ արժողության։ Բայց և պահանջվածներից է մնում վարկերի սուբսիդավորումը։

«Վարկերը տրամադրվում են 5 տոկոս տոկոսադրույքով, այսինքն՝ պետության կողմից սուբսիդավորվում է վարկը, իսկ քաղաքացին վճարում է 5 տոկոսը, այլ վարկատեսակների համեմատ՝ ինքը շահավետ է ու մրցունակ»,- նշում է Շիրակի մարզպետարանի գյուղատնտեսության և բնապահպանության վարչության պետ Ռոման Համայակյանը։

Նախորդ տարի խելացի անասնագոմերի կառուցման ծրագիրը ևս ակտիվ է գործել։ Այս դեպքում «խելացի» բնութագիրը վերաբերում է անասնաշենքերի կառուցման եղանակին, հարմարություններին։ Գյուղերում շատ գլխաքանակ ունեցող տնտեսությունները փորձում են հրաժարվել անասնապահության հին եղանակներից։

«Այս անասնագոմի խելացիությունը այն է, որ անասունի համար շատ հարմարավետ է, առանձին տեղում նստում է, մյուսում՝ կերն ուտում, լուսավոր է, ու օդը մաքուր, կթարանն առանձին է՝ ավտոմատացված, հետո մարդկային գործոնն է քիչ։ Ծրագրով 50 տոկոսը պետությունն էր տալիս, 50-ն էլ ֆերմերը պետք է դնի, այնպես ստացվեց, որ 45 գլխի համար պետությունը ինձ տրամադրեց 17 ու կես մլն դրամ, 22 մլն էլ մենք ծախսեցինք էս գոմի վրա»,- ասում է Նոր Կյանքի բնակիչ Վարազդատ Հայրապետյանը։

Վարազդատ Հայրապետյանը Նոր Կյանքում նախկին կոլխոզներին պատկանող հին ու ավերված անասնագոմի տարածքը 2000-ականների սկզբին է մտադիր եղել վերածել մեծ անասնաֆերմայի, բայց միջոցները չեն բավարարել։ Պետական գյուղաջակցության ծրագիրը հնարավորություն է տվել այն իրականացնելու և մեկ տարում ավարտել  է աշխատանքները։ Խելացի անասնաշենքն ամբողջությամբ պատրաստ է շահագործման, մնում է անասունների ձեռքբերման հարցը։ Տևական ժամանակ է՝ բանկերը մերժում են վարկ տրամադրել, տնտեսվարողը պատրաստ է անասնաշենքի հետ լրացուցիչ այլ անշարժ գույք գրավադրել։ Պայմանավորվածություններ էլ ունի տոհմային բարձր կաթնատվությամբ կովեր գնելու համար։

«Հենց դա է խնդիրը, որ անասունները մեկ առ մեկ ընտրել ենք․․․ Ճիշտ է, պետությունը  թույլ է տալիս, որ անասնաշենքը գրավ դրվի, բայց բանկը ասում է, որ ռիսկ է տեսնում, հնարավոր է աշխատես, ու հանկարծ կովերը սատկեն, չկարողանաս պահել, էդ դեպքում ի՞նչ է լինելու»,- նշում է ֆերմերը։

Նոր Կյանքի բնակիչ ֆերմերը միակը չէ մարզում, որ բախվում է ֆինանսավորման, վարկավորման խնդիրների։ Պետական աջակցությունից ավելի շատ է եղել սեփական ներդրումը, անասնագլխաքանակի ձեռք բերման հարցում ևս մտադիր է ֆինանսական տարբեր միջոցների ներգրավմամբ գործն ավարտին հասցնել։