Վարչապետ Նիկոլ Փաշինյանը ներկայացրել է կառավարության ծրագրի 2021թ. կատարման մասին զեկույցը

«2021թ. հետպատերազմական առաջին տարին է եղել, որի ընթացքում մեր երկիրն ունեցել է լրջագույն ձախողումներ և լրջագույն ձեռքբերումներ»,- ՀՀ ԱԺ հասարակայնության հետ կապերի և հաղորդակցության վարչության փոխանցմամբ՝ այս մասին ապրիլի 13-ի ԱԺ նիստում ՀՀ կառավարության 2022 թվականի փետրվարի 28-ի «Հայաստանի Հանրապետության կառավարության ծրագրի (2021-2026 թթ.) 2021 թվականի կատարման ընթացքի և արդյունքների զեկույցի մասին» N 234-Ա որոշմամբ հավանության արժանացած զեկույցի ներկայացման ժամանակ ասել է Հայաստանի Հանրապետության վարչապետ Նիկոլ Փաշինյանը:

Խոսելով ձեռքբերումների մասին՝ վարչապետն ընդգծել է արտահերթ խորհրդարանական ընտրությունները՝ հավելելով, որ ընտրական գործընթացով Հայաստանը ոչ միայն հաղթահարել է ներքաղաքական ճգնաժամը, այլև միջազգային ինստիտուտների գնահատմամբ՝ ընտրական ավտորիտարիզմ ունեցող երկրների շարքից անցել է ընտրական ժողովրդավարությամբ երկրների շարք: Ըստ վարչապետի՝ կարևորագույն ձեռքբերում է եղել նաև մակրոտնտեսական կայունության ապահովումը: 2021թ. պետական բյուջեի հարկային եկամուտները տարեսկզբին պլանավորվածի նկատմամբ գերակատարվել են 147 մլրդ դրամով: «Հետպատերազմական ճգնաժամային տարում կառավարությունը ոչ միայն չկրճատեց ծախսերը, այլև լրացուցիչ ծախսեր ֆինանսավորելու հնարավորություն ունեցավ»,- նշել է կառավարության ղեկավարը՝ հավելելով, որ դրանց զգալի մասն ուղղվել է Արցախի սոցիալ-տնտեսական խնդիրների լուծմանը:

Նիկոլ Փաշինյանը բարձրաձայնել է, որ 2020թ. նոյեմբերից մինչև 2021թ. ավարտը Հայաստանի կառավարությունն Արցախում իրականացրել է 136 մլրդ դրամի ծրագիր, իսկ 2022թ. բյուջեով 144 մլրդ դրամի ֆինանսավորում է նախատեսել: ՀՀ վարչապետ Նիկոլ Փաշինյանը վստահեցրել է, որ Հայաստանը նախկինում երբեք այնքան աջակցություն չի ցուցաբերել Արցախին, որքան հիմա:

Հաշվետու տարում կապիտալ ծախսերի աննախադեպ ծավալ է իրականացվել՝ տարեսկզբի պլանավորվածի նկատմամբ 100 տոկոս: Փաշինյանի խոսքերով՝ Հայաստանի պատմության մեջ նման ցուցանիշ երբեք չի եղել:

Խոսելով պատերազմի և դրա հետևանքների մասին՝ վարչապետն ասել է. «Ես ի սկզբանե ընդունել եմ իմ մեղքն ու պատասխանատվությունը թե՛ պատերազմի և թե՛ պարտության համար: Բայց չեմ ընդունել ու չեմ ընդունում այն մեղադրանքները, որ ինձ հասցեագրում են ընդդիմադիրները 2020թ. նոյեմբերի 9-ից հետո՝ մեղադրելով հողեր հանձնելու և այդպիսով նաև դավաճանության մեջ»:

ՀՀ վարչապետն արձանագրել է, որ Հայաստանը երբեք Ադրբեջանից տարածքային պահանջներ չի ունեցել, և Ղարաբաղի հարցը ոչ թե տարածքի, այլ իրավունքի հարց է:

ՀՀ վարչապետը մանրամասն անդրադարձել է Ադրբեջանի վարած ռասիստական քաղաքականությանը: Խոսելով խաղաղության բանակցությունների բուն գործընթացից՝ Նիկոլ Փաշինյանն ասել է, որ Բրյուսելում Հայաստանի և Ադրբեջանի արտաքին գործերի նախարարներին հանձնարարվել է սկսել ապագա խաղաղության պայմանագրի նախապատրաստական աշխատանքները:

Վարչապետն արձանագրել է, որ այսօր միջազգային հանրությունը գործընթացին աջակցելու պատրաստակամություն է ցուցաբերում:

Նիկոլ Փաշինյանը նշել է, որ Հայաստանը բազմիցս հայտարարել է խաղաղության պայմանագրի գործընթացը սկսելու պատրաստակամության մասին:

Անդրադառնալով 2021թ. ձախողումներին՝ կառավարության ղեկավարը խոսել է ադրբեջանական ստորաբաժանումների Հայաստանի Հանրապետության ինքնիշխան տարածք՝ Սոթք-Խոզնավար հատված ներխուժելու մասին:

«Ինչո՞ւ այդ ձախողումը տեղի ունեցավ: Այս հարցի պատասխանը ստանալու համար թերևս տեղի ունեցածը պետք է դիտարկել դրան նախորդած մի շարք կարևոր իրադարձությունների խորապատկերում:

2021թ. մայիսի 10-ին Հայաստանի Հանրապետության Ազգային ժողովն արձակվեց իրավունքի ուժով, և մեր երկիրը թևակոխեց արտահերթ խորհրդարանական ընտրությունների շրջափուլ և միանշանակ է, որ դրանից երկու օր անց տեղի ունեցած ներխուժման մոտիվացիաներից մեկը Հայաստանի պետական ինստիտուտները և պետականությունը կաթվածահար անելն էր, նախընտրական և հետընտրական քաոսի հարուցումը և ընտրությունների արդյունքների վրա կոնկրետ ազդեցություն ունենալը: Կարող ենք ուղիղ ասել, որ դա հարձակում էր նաև Հայաստանի ժողովրդավարության վրա:

Բայց մայիսյան ներխուժման համատեքստը կիսատ կմնա, եթե հաշվի չառնենք փետրվարին տեղի ունեցած իրադարձությունները, երբ Հայաստանի զինված ուժերի գլխավոր շտաբը բացահայտ կերպով քաղաքականության մեջ ներքաշվեց, Կառավարության հրաժարականը պահանջող հայտարարություն տարածելով: Պետք է արձանագրել, որ ընդդիմությունը, որի երբեմնի առաջնորդի խոստովանությամբ, ինքը դեռ պատերազմի ժամանակ էր գեներալներին կոչ անում հրացանափողերն ուղղել ոչ թե հակառակորդի, այլ Հայաստանի կառավարության շենքի վրա, ի վերջո հասավ իր նպատակին և պարզվեց, որ բանակում կան ուժեր, որոնց ավելի շատ հետաքրքրում է ոչ թե այն, թե ինչ է կատարվում սահմանին, այլ այն, թե ինչ է կատարվում Հանրապետության հրապարակում, Բաղրամյան պողոտայում, Մելիք-Ադամյան փողոցում»,- նշել է վարչապետը:

Չնայած ձախողումերին՝ 2021թ. բարեփոխումների տեսանելի արդյունքներ ևս կան:

Նիկոլ Փաշինյանն արձանագրել է, որ 2018թ. ոչ բռնի, թավշյա, ժողովրդական հեղափոխությունից հետո Հայաստանը շարունակում է մնալ կիսադատարկ քրեակատարողական հիմնարկների երկիր:

«Նախորդ շաբաթ հրապարակվեց Եվրոպայի խորհրդի 2021թ. քրեական վիճակագրությունը: Ըստ այդմ՝ 100 տեղի հաշվով բանտային բնակչության խտությամբ Հայաստանը դասվում է ամենացածր ցուցանիշն ունեցող երկրների շարքին՝ 36.8 անձ, այսինքն՝ մեր երկրում 100 բանտային տեղից զբաղված է 36.8-ը: Այս ընթացքում Հայաստանում փակվել է երկու քրեակատարողական հիմնարկ: Չեմ կարող չընդգծել այս ցուցանիշի քաղաքական իմաստը, և սա իրոք ժողովրդավարական երկրին հատուկ և ժողովրդավարական երկրին վայել ցուցանիշ է»,- ասել է Նիկոլ Փաշինյանը:

Վարչապետը նշել է, որ անսովոր և գերբնական ջանքեր են պահանջվում մեր պետականությունը, անկախությունը, ինքնիշխանությունն ու տարածքային ամբողջականությունը պաշտպանելու և պահպանելու համար:

«Մեզ հարկավոր է մեր պետական շահի շուրջ կառուցված քաղաքացիական և ազգային միասնություն: Մեզ հարկավոր են մտածողության նոր բանաձևեր, ու մենք պիտի այս փոթորկված աշխարհքաղաքական օվկիանոսի մեջ հայտնված մեր նավը հասցնենք խաղաղ հանգրվանի: Եվ համոզված եմ՝ մենք դա կանենք: Եվ դա է մեր պատմական առաքելությունը»,- ելույթն ամփոփել է վարչապետ Նիկոլ Փաշինյանը: