Կապիտալ ծախսերի ծրագրով Շիրակի մարզում հիմնանորոգվում է ավելի քան 20 կմ ճանապարհ

Գյումրի-Հացիկ մարզային նշանակության ճանապարհը 30 տարուց ավելի միայն հարթեցումներով ու խճապատումներով է հնարավորինս երթևեկելի պահվել։ 2020 թվականին հիմնանորոգման նախագիծ-նախահաշիվ է կազմվել, բայց շինարարության մեկնարկը ձգձգվում էր երկրում համվարակային և պատրեազմական իրավիճակների պատճառով։  Շինարարական աշխատանքները սկսվել են մարտի 31-ից։ Սա 30 տարում  համարվում է առաջին կապիտալ նորոգման ծրագիրը, որն իրականացվում է մարզային նշանակության ճանապարհին։

Գյումրիից մինչ գյուղամեջ հասնող 4 կմ երկարության ճանապարհն ունի 6-ից 7,5 մետր լայնություն, հիմնային շերտն ամուր է, նորն անելու անհրաժեշտություն չկա, հենց դրա վրա էլ շինարարը խճապատում կկատարի, կկառուցի ասֆալտ-բետոնային ծածկույթը։ Գյուղամիջյան հատվածում կպահպանեն նաև մայթերը, որտեղ ևս նախատեսված է ասֆալտապում, եզրաքարերի կառուցում։

«Ճանապարհի գյուղային հատվածում իրականացվում է նաև մայթերի կառուցում մոտ 450 մետր, տեղադրվում են բազալտե եզրաքարեր, խճային հիմքը կլինի 10 սմ, ասֆալտ-բետոնե ծածկույթը կլինի 3 սմ», – ShantNews.am-ի հետ զրույցում նշել է  «ԱԱԲ քոնսթրաքշն» ՍՊԸ տեղամասի պատասխանատու Անտոն Միլիտոնյանը։

Մինչև երթևեկելի ճանապարհահատվածի ասֆլատապտումը, կփոխվի նաև ճանապարհի լայնքով անցնող ոռոգման խողովակը։ Ամբողջ ծրագրի արժեքը 497 մլն դրամ է, ֆինանսավորվում է պետական բյուջեի կապիտալ ծախսերի ծրագրով։ Ճանապարհի կառուցումը նախատեսված ժամկետում ավարտելու համար շինարարը խնդիրներ չի տեսնում։ Այս ընթացքում ճանապարհը կմնա երթևեկելի, երկու ամսից աշխատանքներն ավարտվելու են։ Կապիտալ ծախսերի ծրագրով ընթանում են ևս 4 ճանապարհի հիմնանորոգումներ Արթիկ, Ամասիա, Ախուրյան տարածաշրջաններում։

«Վարդաքարից մինչև Արևիկ 5,2կմ հատված է, 1,5 կմ-անոց Սպանդարյան փողոցն է Արթիկ համայնքում, 11,8 կմ Ամասիայի տարածաշրջանում են այս պահին իրականացվում ճանապարհաշինական աշխատանքներ։ Ընդհանուր, եթե գումարային տեսանկյունից վերցնենք, շուրջ 20 և ավելի կիլոմետր ընդհանուր երկարության ճանապարհահատվածներ այս պահին հիմնանորոգվում են»,- նշել է Շիրակի մարզպետարանի քաղաքաշինության վարչության պետ Խաչատուր Խնձրցյանը։

Գյումրի-Ամասիա և Ամասիա-Աշոցք հանրապետական նշանակության ճանապարհներին հիմնանորոգումները նախորդ տարվանից էին մեկնարկել։ Այս տարի ծրագրի ժամկետն ավարտվում է և մինչև տարեվերջ շահագործման է հանձնվելու մոտ 12 կմ ընդհանուր երկարության ճանապարհ։

Գյումրի-Արմավիր հանրապետական նշանակության ավտոճանապարհի 15, 9 կմ հատվածը ևս նախատեսվում է կապիտալ ծախսերի ծրագրով հիմնանորոգել։ Շիրակի մարզով անցնող 50 կմ ճանապարհի այդ հատվածում փոսայնությունը գերազանցում է թույլատրելի սահմանը և այդ պատճառով ամառային սպասարկման ցանկից հանված են։

«Այն ճանապարհները, որոնք կընդգրկվեն 2022թ․ պետական բյուջեով նախատեսվող կապիտալ ծախսերի ծրագիր, սպասարկման տարածքներից հանված են, մեր սպասարկող կազմակերպությունների կողմից ոչ մի աշխատանք չի իրականացվում, քանի որ ՀՀ կառավարության 1419Ն որոշմամբ կան սահմանված նորմատիվներ, ըստ որի, եթե գերազանցում է 4 տոկոսանոց արգելքը, ուրեմն ենթակա չէ սպասարկման», -նշում է Խաչատուր Խնձրցյանը։

Շիրակի մարզում շարունակվում են Հյուսիս-Հարավ մայրուղու՝ Տրանշ 3 Թալին-Լանջիկ, Լանջիկ-Գյումրի աշխատանքները։ Լանջիկ-Գյումրի 27 կմ երկարության ճանապարհի մի հատվածում դեռ ասֆալտային ծածկույթ չի կատարվում, ընթանում են հողային աշխատանքներ։ Լանջիկից մինչև Հոռոմի խաչմերուկ մեկ ուղղությամբ տրանսպորտային երթևեկությունը տեղափոխվել է նոր կառուցված ճանապարհահատված։ Հյուսիս-հարավի տարբեր տեղամասերում կատարվում են հողային, ջրատարի բետոնյա հիմքերի կառուցման, ճանապարհային ենթահիմքի ամրացման աշխատանքներ։