Գյումրին դարձել է ամենապահանջված զբոսաշրջային ուղղություններից մեկը․ խնդիր կա սպասարկման ծառայությունների ընդլայնման և որակական փոփոխությունների

Գյումրին համարվում է ամենապահանջված զբոսաշրջային ուղղություններից մեկը, թերևս ամենագրավիչն իր հին պատմական, ճարտարապետական արժեք շենքերով, կոլորիտային անկյուններով ու թանգարաններով։ Հին քաղաքի նեղլիկ փողոցներում օրվա պիկ ժամերին նույնիսկ ազատ տեղաշարժվելու հնարավորություն չես գտնի։ Ներքին տուրիզմը զարգանում է։

Առանց հատուկ հետազոտության՝ նկատելի է, շեշտում է Հայաստանի Ամերիկյան համալսարանի հյուրանոցային և հյուրընկալության կառավարման ծրագրի ղեկավար Զարմինե Զեյթունցյանը, այցելուների մեծ հոսք կա, զուգահեռ ավելանում են սրճարանները, հյուրատներն ու հյուրանոցները:

Ծառայությունների որակ ապահովելու համար մարքեթինգում գրագետ մոտեցումներ են անհրաժեշտ, որը թույլ կտա դիրքավորվել ոլորտում: Աննա Շաբոյանը որոշել է ավանդական սպասարկման մոտեցումը փոխել:

«Օրինակ՝ մեզ մոտ գալիս են ընտանիքներով։ Մտածում էինք, որ դե ընտանիքներ են, ջերմ հյուրընկալելը, հյուրասիրելը բավարար է, բայց ոչ․ հիմա հասկացանք, որ պետք է ընտրենք թիրախային խմբերի։ Գալիս են նրանք Գյումրին տեսնելու, պետք է հասկանանք՝ ինչպես ուղղորդենք իրենց, ինչ են նախընտրում»։

«Մարքեթինգ անելու հմտությունը պակասում է»,- նշում է հյուրանոցային և հյուրընկալության կառավարման ծրագրի ղեկավար Զարմինե Զեյթունցյանը: Ըստ նրա՝ Գյումրիից Շիրակի մարզի այլ բնակավայրեր տուր այցերը ընդլայնել է պետք, քաղաքից զբոսաշրջիկին ուղղորդել մարզի հետաքրքրական վայրեր, որոնք ևս ոչ պակաս գրավչություն ունեն։

«Ցավոք, պետք է ասեմ, որ խնդիրն այն է, որ ամեն ինչ կենտրոնացված է Գյումրիում, թեև Շիրակում բազմաթիվ հետաքրքրական վայրեր կան, կլաստերներ, օրինակ՝ Աշոցք, Ամասիա, Արթիկ, Պեմզաշեն, Հառիճ, որտեղ շատ հետաքրքիր վայրեր կան, արգելոցներ։ Իրականում պակասում են որպես այցելավայր մարքեթինգ անելու և ճանաչելու հմտությունները»,- նշում է հյուրանոցային և հյուրընկալության կառավարման ծրագրի ղեկավար Զարմինե Զեյթունցյանը»։

Զբոսաշրջության ակտուալ ձևերից մեկը նաև փորձառնական զբոսաշրջությունն է, պարզ ասած, վառ անհատականությունները, արվեստագետները, այլ բնագավառի տարբերվող մարդիկ կարող են իրենց խոսք ու զրույցով հետաքրքրություն առաջացնել: Խնդիրը ունեցած պոտենցիալը սահուն ռեալիզացնելն է:

«Պրոդուկտը գոյություն ունի, մենք չունենք պրոդուկտը փաթեթավորմամբ հանրաճանաչ դարձնելու, մեր պրոդուկտը զբոսաշրջիկներին ներկայացնելու ունակությունները և դա բոլոր մակարդակներում է»,- նշում է Զեյթունցյանը։

Ամռան ամիսներին Հանրապետության երկրորդ քաղաքում տուրիստների մեծ հոսք է լինում: Գյումրիի դիտարժան վայրերից գոնե մեկ լուսանկար ունենալու համար մի քանի ժամով են գալիս, հաճախ էլ տարբերվող քաղաքում այլ բնակավայրերի նորապսակներն իրենց հարսանիքներն են անում, կոլորիտային միջավայրն ու անգամ խոհանոցն այստեղ համատեղելի են։

Գյումրիից դուրս զբոսաշրջային ուղղություններ ծավալելու համար սպասարկման ծառայությունների մի ամբողջ շղթայի զարգացում է անհրաժեշտ ապահովել նաև։ Մարզի պոտենցիալն այս ոլորտում մեծ է, բայց սպասարկման հնարավորություններն են թերի։ Ըստ ծրագրի փորձագետների՝ դրա համար անհրաժեշտ է գոնե երեք հիմնական բաղադրիչներով առաջնորդվել՝ շարունակ աշխատել նորամուծությունների ուղղությամբ, ընտրել ճիշտ թիրախային խմբեր և ճիշտ ներկայացնել պոտենցիալը։