Հիվանդանո՞ց, թե՞ ռեստորանային համալիր. հանրային քննարկում Գյումրիի նախկին «Ճերմակ հիվանդանոցի» շենքի նպատակային օգտագործման շուրջ

Գյումրի քաղաքի սեփականություն հանդիսացող Շիրակացի 162 հասցեի հայտնի «Ճերմակ հիվանդանոցի» շենքը նախատեսվում է ներդրողի հանձնել՝ վարձակալական հիմունքներով։ Գյումրիի քաղաքապետարանում անցկացված հանրային լսմանը ներկայացվել են ներդրումային 3 ծրագրեր, որոնցից երկուսն ունի առողջապահական, իսկ մեկը՝ հյուրանոցային և ռեստորանային ծառայությունների մատուցման նպատակ։

Նախկին «Ճերմակ հիվանդանոցի» շենքը քաղաքի պատմական կենտրոնում է՝ Կումայրի արգելոց-թանգարանի տարածքում։ Այն ժամանակին եղել է քաղաքի առողջապահական առաջնային հաստատություններից մեկը։ Վերջին 15 տարիներին այն գործնականում ոչ մի նպատակի չի ծառայել, այժմ ներդրողների համար պատմական կառույցն ունի բավականին մեծ հետաքրքրություն, և ներկայացրել են  ներդրումային ծրագրեր։ Առաջին ծրագիրը, որը դրվեց հանրային լսման, հեղինակում էր «Կուրղինյան էնդոսկոպիկ վիրաբուժության կենտրոնի» համահիմնադիր Աշոտ Կուրղինյանը, որով առաջարկվում է Գյումրիում ժամանակակից բազմապրոֆիլ բժշկական կենտրոն հիմնել։

Ընկերությունը ենթավարձակալության իրավունքով 2020 թվականից տեղակայված է եղել նույն շենքի առաջին հարկում, որտեղ իրականացրել է մեծածավալ շինարարական և կապիտալ նորոգման աշխատանքներ, մոտ 300 քմ տարածքի համար կատարված ներդրումները կազմել են մոտ 50 մլն դրամ։

«Ունեմ ներքին համոզվածություն, որ մեր համաքաղաքացիների ճնշող մեծամասնությունը, եթե չասեմ բոլորը, կուզենային, որ այդ շենքը լիներ նորից առողջապահական գործող հիմնարկ, որովհետև 2-րդ ալտերնատիվը ունենալը տրամաբանական է և հիմնավորված։ Հատկապես, երբ 2020-ին եղավ համաճարակը, բոլորս տեսանք, թե մահճակալային ֆոնդը ինչպիսի կրիզիսի մեջ էր Հայաստանում և Գյումրիում»,- նշել է Աշոտ Կուրղինյանը։

Հաշվի առնելով շենքի ներկա վիճակը և ամբողջ հզորությամբ վերագործարկելու հնարավորությունները, ընկերությունը պատրաստ է ևս 1 միլիարդ դրամի ներդրում կատարել, մեծ մասն ուղղվելու է հիմնականում շենքի կապիտալ նորոգմանը։ Ընկերությունը նախատեսում է «Ճերմակ հիվանդանոցի» շենքն ամբողջությամբ, այսինքն՝ մոտ 2100 քառ մետր մակերեսով տարածքը տրամադրելու դեպքում, հիմնել բժշկության զարգացման պահանջներին համապատասխան, ժամանակակից մեթոդների կիրառմամբ բազմապրոֆիլ բժշկական կենտրոն։ Ըստ Աշոտ Կուրղինյանի՝ կենտրոնում կներդրվեն այնպիսի ծառայություններ, որոնք չկան Գյումրիում, կամ թերի են մատուցվում։

Առաջարկվող ծառայություններից Աշոտ Կուրղինյանն ամենակարևորն է համարում մարզերում, առաջինը՝ Գյումրիում, արտամարմնային բեղմնավորման լիարժեք լաբորատորիայի ստեղծումը։ Բազմապրոֆիլ ծառայությունների համար պատրաստ են ձեռք բերել գերժամանակակից բժշկական սարքավորումներ։ Նախատեսումներում 70 մահճակալ հզորության կենտրոն ունենալն է՝ 80-ից ավելի բուժանձնակազմով։

Հիվանդանոցի շենքը  առողջապահական նշանակությամբ օգտագործելու ներդրումային ևս մեկ հայտ էլ ներկայացրել էր «ՆԵՈՄԵԴ ՊՐՈՎԱՅԴԵՐՍ» ամերիկյան ընկերությունը, որը նախատեսում է համատեղել Հանրապետության և միջազգային լավագույն մասնագետների բժշկական ներուժը։

«Մեր աշխատանքները կազմակերպելու նպատակով, բժշկական ծառայություններ ենք մատուցելու ընդհանուր վիրաբուժության, գինեկոլոգիայի, ուռոլոգիայի, օրթոպեդիայի, դիմածնոտային վիրաբուժության, ակնաբուժության, անոթային, պլաստիկ և միկրովիրաբուժության ոլորտներում»,- նշել է ընկերության տնօրենի լիազոր ներկայացուցիչ Ռոբերտ Դարբինյանը։

Ներդրումների ծավալ է նշվում մոտ 400 մլն դրամը, բացի դրանից՝ ժամանակակից բուժսարքավորումների ձեռք բերմանն ուղղված անհրաժեշտ միջոցներ ևս ծախսելու են։

Գյումրիի պատմական միջուկում եղած շենքը ոչ թե բժշկական կենտրոնի, այլ հյուրանոցառեստորանային համալիրի վերածելու նպատակներ ունի ծնունդով շիրակցի, այժմ Ռուսաստանում բնակվող գործարար Արա Սարոյանը։ Իսկ մտահղացումը մեկ պարզ դիպվածով է բացատրում՝ ընկերների հետ ՌԴ-ից Գյումրի է եկել և գիշերելու տեղ չի գտել։ Այս ընթացքում հասցրել է ուսումնասիրել, հաշվարկել Գյումրիի հյուրանոցների հնարավորությունները։

Իր ներկայացրած առաջարկով  հիվանդանոցի շենքը վերանորոգելուց հետո հնարավոր է շահագործել որպես հյուրանոցային-ռեստորանային համալիր՝ շուրջ 60 մահճակալով։ Իսկ շենքը նախատեսում է վերանորոգել առնվազն 12 ամսում՝ այդ նպատակին ծախսելով մոտ 650 մլն դրամ։ Գործարարը, ամեն դեպքում, շենքի պատմական ու ճարտարապետական նշանակությունը դիտարկում է որպես հյուրանոցային ու ռեստորանային բիզնեսի տեսանկյունից, թեկուզ որ «Ճերմակ» շենքի պատմական ճանաչելիության ակունքներում առողջապահական նշանակությունն է։

Հանրային քննարկման արդյունքների ամփոփումը 5 օրից է։ Առաջարկների ուսումնասիրությունները դրանից հետո էլ կմնան քաղաքապետարանի իրավասու բաժինների օրակարգում։ Պատմական շենքի հետագա շահագործման ուղղվածությունն ու նշանակությունը որոշելու համար այն կներկայացվի ավագանու քննարկմանը։