Գյումրիում մեկնարկել է «Հայաստան» համահայկական հիմնադրամի  բնակարանաշինության ծրագրի երկրորդ փուլը․ կառուցվում է 9 հարկանի 2 շենք

Գյումրիի Մուշ 2-2 թաղամասում ավարտվել է «Հայաստան» համահայկական հիմնադրամի միջոցներով կառուցվող երկու շենքերի շինարարությունը, այժմ կառուցապատողն իրականացնում է տարածքի բարեկարգման աշխատանքները։ Զուգահեռ, նորակառույց շենքերի հարևանությամբ, մեկնարկել են ևս 2 բազմահարկ շենքի հիմքերի փորման աշխատանքները։ Նշենք, որ հիմնադրամ բնակարանաշինական երկու ծրագրերով 88-ի երկրաշարժից հետո առաջին անգամ Գյումրիում կառուցվում են բարձրահարկ շենքեր։ Երկրորդ փուլով մեկնարկած շիննախագծով երկու շենքերը լինելու են 9 հարկանի՝ ընդհանուրը 72 բնակարանով:

Մուշ 2-2 թաղամասում կառուցված 2 շենքերը ևս առաջիններից են, որոնք 88-ից հետո, 33 տարի անց, կառուցվել են քաղաքաշինական այլ չափորոշիչներով և համարվում են առաջին բարձրահարկերը, երկու շենքերը վեցհարկանի են։ Տարածքի բարեկարգումը միայն եզրաքարերի տեղադրումով և մայթերի սալապատումով չի սահմանափակվելու, որոշ հատվածներում սևահող են լցնելու, որոնք բնակիչներին ծառայելու են որպես փոքրիկ հողամասեր կամ բակային ծաղկանոցներ։

2 շենքերում ներքին հարդարման աշխատանքները չէին դադարեցրել ձմռան ամիսներին։ Բնակարանները հանձնվելու են խոհանոցային գույքով։ 36 բնակարանները շահառուներին են տրամադրվելու մասնակի կահավորված։

«Խոհանոցում կահույքով, ջեռուցման համակարգով, սառնարանով, լվացքի մեքենայով, բոլոր հարմարություններով հանձնելու ենք բնակարանները, հիմնականում նախատեսված են անապահով ընտանիքների համար»,- նշում է «Ախուրյանի կոոպշին» ընկերության աշխղեկ Վարդան Տոնոյանը։

Շենքերի գազաֆիկացման աշխատանքները նոր են սկսվել։ Տանիքի թեքությունը հնարավորություն է տալիս շենքերի վերին հարկերը որպես ձեղնահարկ օգտագործել, որոնք ծառայելու են որպես արհեստանոցներ ու խմբակների համար նախատեսված տարածքներ։ Թեք տանիքներին արևային մարտկոցներ են տեղադրվելու, բնակարաններում տաք ջուրը և ջեռուցումը կապահովվի արևային էներգիայով։ Թաղամասում կառուցվում է նաև 80 երեխայի համար մանկապարտեզ։ Գործը հասել է ներքին հարդարմանը։

Շինարարը կառուցված բնակելի շենքերի հարևանությամբ սկսել է ևս 2 նոր շենքերի նախապատրաստական հիմնային աշխատանքները։ Ինչպես շինարարության առաջին փուլում էր, հիմա էլ հիմքերի փորման ընթացքում դարձյալ տուֆային շերտ է բացվել, ինչն էլ դժվարացնում է աշխատանքը։

«Հիմքը տուֆային է, դժվարությամբ ենք քանդում, բայց նախորդ շենքերի ժամանակ էլ նման խնդրի հանդիպել ենք։ Արդեն նախապատրաստական աշխատանքներն ավարտում ենք, շուտով կսկսենք շենքերի ժապավենային հիմքերի կառուցման աշխատանքը»,- նշում է «Ախուրյանի կոոպշին» ընկերության փոխտնօրեն Վաչիկ Ղազարյանը։

Բնակարանաշինական ծրագրի երկրորդ փուլի նախագծով կառուցվող երկու շենքները լինելու են 9 հարկանի։ Մոտ 10 օրից կսկսեն հիմքերի բետոնալցման աշխատանքները։ Նոր կառուցվող 9 հարկանիները կունենան 72 բնակարան։

«Սեյսմիկ տեսանկյունից կայուն, ամուր շենքեր են կառուցվում, նախատեսված ու հաշվարկված են սեյսմիկ գոտու համար»,- ասում է շինարարը։

Իսկ առաջին փուլով ավարտված շենքերի 36 բնակարանների շահառուների ընտրությունը հիմնադրամը չի ավարտել, ընտանիքների փաստաթղթային ուսումնասիրություններն են դեռ ընթանում։ Հիմնադրամը հավանական շահառուների ցանկում է դիտարկում 88-ին բնակարան կորցրած անօթևան ընտանիքներին, նրանց, ովքեր բնակվում են տնակներում, հաշվի է առնվում նաև բազմազավակ լինելու հանգամանքը, հիմնադրամը նախատեսում է նաև հատկացումներ Արցախյան երկրորդ պատերազմում վիրավորում ստացած զինվորների ընտանիքներին։ Երկու շենքերի շահագործման ժամկետ է նշվում հուլիսը։ Իսկ նոր հիմնվող թաղամասն ամբողջությամբ պատրաստ կլինի 2024 թվականին: