Տպավորություն է՝ կազմավորել էին «թշնամու» թիկունքում գործողություններ անելու հատուկ խմբեր. ՀՔԾ պետը՝ 0038 հրամանի մասին

Ռոբերտ Քոչարյանին առաջարկված մեղադրանքն առանձնապես ծանր հանցագործությունների շարքին է դասվում: Հանրային հեռուստաընկերության «Օրակարգից դուրս» հաղորդմանն այս մասին ասել է Հատուկ քննչական ծառայության պետ Սասուն Խաչատրյանը:

Նա նշել է, որ ըստ մեղադրանքի՝ կատարվել է սահմանադրական կարգի տապալում՝ զինված ուժերը ներքաղաքական խնդիրները լուծելու համար օգտագործելով:

Սասուն Խաչատրյանն անդրադարձել է հայտնի հույժ գաղտնի թիվ 0038 հրամանին: Նա նշել է, որ պաշտպանական կողմից ասվել է, որ եթե փաստաթղթի ձևը պահպանվել է, ստացվում է, որ դրա բովանդակությունը կարևոր չէ, սակայն դա նույնն է, եթե հրամանագիր ընդունվեր ու որոշվեր, որ 15 անձի պետք է կախաղան հանեն, սակայն հրամանագրի ձևը պահպանվեր:

Սասուն Խաչատրյանի խոսքով՝ օրենքով հստակ սահմանվում է, թե ինչ է նշանակում սահմանադրական կարգ տապալել, դա այն է, երբ դադարում են գործել Սահմանադրության 1-5-րդ և 6-րդ հոդվածի 1-ին մասի նորմերը:

Ապա ՀՔԾ պետը նշել է, որ հույժ գաղտնի թիվ 0038 հրամանը, պաշտոնական տվյալներով՝ քրեական գործում չի եղել, չնայած որ այս հրամանի մասին խոսվել է: «Պատահական չի, որ այս հրամանը չի եղել այս գործում, սա ինքնին լուրջ հիմք է, այն խոսում է այն մասին, որ զինված ուժերը ներգրավված են եղել Մարտի 1-ի գործում, ընդ որում դրանք ներգրավվել են ոչ թե հենց մարտի 1-ին»,-հավելել է նա, ապա նշել, որ այդ հրամանով, պաշտպանական կողմի խոսքով, զորքը բերվել է պատրաստի վիճակի:

«Ինձ համար անհասկանալի է, որ պաշտպանական կողմն, ունենալով այս նույն հրամանը, այդպիսի հայտարարություններ է անում, թե զորքը մնալու էր զորանոցում»,-ասել է նա:

Ըստ ՀՔԾ պետի՝ այդ հրամանի 3-րդ կետով հրամայվել է ՀՀ ՊՆ ԶՈւ վարչությունների պետերին ու բանակային կորպուսների հրամանատարներին ստեղծել բարձր շարժունակության բարդ իրավիճակներում արդյունավետ գործելու ունակ հավաքական ստորաբաժանումներ, ըստ դասակների կազմակերպել, զինել հրաձգային զենքով:

«Իսկ 10-րդ կետով նախատեսված է, որ այս ստորաբաժանումները պետք է համալրվեն առավելապես պատրաստված, հոգեպես կայուն ենթասպաներով ու զինծառայողներով: Ինձ մոտ տպավորություն է ստեղծվում, որ կազմավորել են հատուկ խմբեր, որոնք ինչ-որ դիվերսիոն գործողություններ պետք է կազմակերպեին «թշնամու» թիկունքում»,-նշել է նա:

Դիտարկմանը, թե սա չի փաստում, որ որևէ գործողություն եղել է ՊՆ զենքերով, ինչի մասին երկրորդ նախագահ Ռոբերտ Քոչարյանն է հայտարարել, Սասուն Խաչատրյանն արձագանքել է, որ Ռ. Քոչարյանը չէր կարող իմանալ՝ արդյոք զենքերն օգտագործվել են, թե ոչ: «1700-ից ավել պարկուճ է առգրավվել, իդենտիֆիկացվել է 1400-ը, 300-ը չի իդենտիֆիկացվել: Հույս ունեմ, որ կկարողանանք գտնել սպանությունները կատարած անձանց»,-ասել է նա՝ խոստանալով նոր բացահայտումներ: