Հանրապետությունում մեկնարկել է ուսուցիչների պարտադիր ատեստավորման գործընթացը․ այս տարի կվերապատրաստվի 14 000 ուսուցիչ

Հանրապետությունում մեկնարկել է հանրակրթական դպրոցների ուսուցիչների հերթական կամ պարտադիր ատեստավորման գործընթացը։ Ամառային արձակուրդների  ընթացքում տարբեր առարկաներ դասավանդող մանկավարժները  կվերապատրաստվեն, որից հետո կհանձնեն գիտելիքների ստուգման թեստային քննություններ, ըստ այդմ՝ կորոշվի մասնագետի պատրաստվածությունն առարկայի դասավանդման գործում։

Պարտադիր ատեստավորման համար ավելի քան 14 000 ուսուցիչներ վերապատրաստում են անցնելու, որոնք անցկացնում են ԿԳՄՍ նախարարությունից երաշխավորված կազմակերպությունները, իսկ ընտրությունը թողնված է ատեստավորվող ուսուցչի հայեցողությանը։

Գյումրիի թիվ մեկ ավագ դպրոցի մեկ լսարանում մարզի հանրակրթական դպրոցների «Կենսաբանություն», «Քիմիա», «Ֆիզիկա» և «Մաթեմատիկա» առարկաների ուսուցիչները մասնակցում են պարտադիր ատեստավորմանը նախորդող վերապատրաստումներին։ Մինչ բուն մասնագիտական նորամուծություններին անդրադառնալը, նախ ուսումնասիրում են  «Հոգեբանություն» առարկայի առանձնահատկությունները։ Ամեն դեպքում, այս առարկան ուսուցչի մասնագիտությունում համարվում է էական, մոտեցումներն ու մեթոդները անհրաժեշտ են կիրառել աշակերտների հետ աշխատանքում։

Հինգ տարին մեկ անգամ պարտադիր վերապատրաստումը մասնագիտական ոլորտում ուսուցման նոր մեթոդներին  ծանոթանալու հնարավորություններից է։ Նոր սերնդին կրթելու, դասապրոցեսը հետաքրքիր դարձնելու համար շարունակական փոփոխությունների պահանջ կա միշտ։

«Պատմություն», «Հասարակագիտություն» և «Նախնական զինվորական պատրաստություն» դասավանդող մասնագետները ուսումնասիրում են կրթության ոլորտի օրենսդրությունը, կատարված փոփոխություններն ու աշակերտ-մանկավարժ փոխհարաբերություններում իրավունքների և պարտականությունների, կիրառվող բռնությունների դեպքում իրավական մոտեցումներն ու կարգավորումները։ Մանկավարժների համար  նոր սերնդի հետ աշխատանքը դարձել է ավելի բարդ։

Պարտադիր վերապատրաստմանը հատկացված 110 ժամերի ընթացքում կուսումնասիրեն նաև տեղեկատվական հաղորդակցության տեխնոլոգիաների կիրառման մեթոդները կրթական ոլորտում, համընդհանուր ներառման առանձնահատկություններն ու առարկայի դասավանդման մեթոդիկան։ Այս ընթացքում ուսուցիչները հավաքելու են միավորներ, որոնք որոշիչ են հավաստագրման, դպրոցում դասավանդելու իրավունք ստանալու համար։

«Բոլոր բաղադրիչներն ավարտվում են ստուգիչ թեստով, յուրաքանչյուր բաղադրիչ ենթադրում է մեկ կրեդիտ, միայն երկու կրեդիտ ենթադրում է մասնագիտական վերապատրաստումը։ Վերջում հանձնում են հետազոտական աշխատանք, հետազոտական  աշխատանքը ևս  գնահատվում է մեկ կրեդիտ։ Առավելագույնը 11 կրեդիտով ավարտվում է վերապատրաստումը»,- նշում է  Գյումրիի թիվ մեկ ավագ դպրոցի տնօրեն Նաիրա Թադևոսյանը։

Նախորդ տարի Գյումրիի թիվ 1 ավագ դպրոցում կազմակերպված պարտադիր ատեստավորմանը մասնակցած ուսուցիչներից միայն մեկն է դուրս մնացել ատեստավորման գործընթացից։ Դասավանդող մանկավարժներն են փաստում, որ դպրոցներում սերնդափոխության խնդիր կա։ Միայն մեկ տարվա ընթացքում Հանրապետության դպրոցներից  900 ուսուցիչ է հեռացել, 65-ից բարձր տարիք ունեցող ուսուցիչների թիվը դպրոցներում մոտ 3600-ն է։

«Կոնկրետ «Քիմիա» առարկայի ուսուցիչ աշակերտները խուսափում են դառնալ, մանկավարժական բուհերի համապատասխան բաժիններ չեն ցանկանում  ընդունվել։ Ընդհանրապես, դպրոցներում հիմա մանկավարժների կարիք կա։ Ե՛վ վարձատրությունն է քիչ, և՛ աշակերտների հետ աշխատելն է չափազանց դժվար։ Հենց այդ խնդիրներն են, որ այս առարկայի նկատմամբ մի փոքր սառնություն ու անտարբերություն են առաջ բերում»,- կարծում է քիմիայի ուսուցչուհի Կարինե Գասպարյանը։

Պարտադիր ատեստավորումը լիցենզավորված կազմակերպություններում կշարունակվի մինչև նոյեմբեր։ Ատեստավորման վերապատրաստումից կարող են դուրս մնալ նաև այն  մանկավարժները, որոնք յուրաքանչյուր բաժնին հատկացված ժամաքանակի 2/3-ին կամ 60 տոկոսին չեն մասնակցել և ունեն անհարկի բացակայություններ։