Ինչպե՞ս ամրացնել երեխաների իմունիտետը. բժշկի խորհուրդները

Ալերգոլոգ-իմունոլոգ, բժշկական գիտությունների թեկնածու, «Սեմեյնայա» կլինիկաների ցանցի գլխավոր մասնագետ Օլգա Վասիլևնա Գրոմադինան Gazeta.ru-ին պատմել է, թե ինչպես բարձրացնել երեխայի օրգանիզմի դիմադրողականությունը վիրուսային վարակների նկատմամբ։

Ինչպես հասկանալ, որ երեխան թույլ իմունային համակարգ ունի: Ըստ Գրոմադինայի՝ երեխաների և մեծահասակների իմունային համակարգը պաշտպանիչ ռեակցիաների համալիր է։ «Երեխաների իմունային համակարգը գործում է արգանդում պտղի հայտնվելու առաջին օրերից։ Եվ շատ դեպքերում դա շատ լավ է աշխատում,  մինչդեռ մենք դա չենք էլ նկատում»:

Հազվադեպ կարելի է ասել, որ իմունային համակարգն իրականում չի կարողանում կատարել իր գործառույթը, և օրգանիզմի վիրուսային վարակներին դիմակայելու ունակությունը նվազում է:

Նման դեպքերում նշանակում է՝ կան իմունային անբավարարությամբ պայմանավորված բնածին կամ ձեռքբերովի հիվանդություններ, երբ հնարավոր է օգնել միայն շատ լուրջ թերապիայի կիրառմամբ, ասել է բժիշկը:

Նրա խոսքով, իմունային անբավարարության նշանների մասին կարելի է կասկածել, երբ երեխան տարեկան երկուսից ավելի ծանր բակտերիալ (թարախային) վարակ է ունենում, երբ նրան անհրաժեշտ են հոսպիտալացումներ, երբ նշանակվում են հակաբակտերիալ դեղամիջոցների կրկնակի կուրսեր: Գրոմադինան հավելել է, որ այդպիսի երեխաներին պետք է հսկի մանկաբույժը իմունոլոգի հետ միասին՝ նրանց իմունային համակարգը կարգավորելու և բակտերիալ վարակներից պաշտպանվելու համար։

Ինչպես արագ բարձրացնել իմունիտետը

«Երեխաների իմունիտետի վիճակը կախված է բազմաթիվ գործոններից:  Ուստի, ցավոք, չկա մեկ «կախարդական կոճակ», որը սեղմելով  կարող եք ամրապնդել իմունային համակարգը»,- ասել է բժիշկը։

Հիվանդության դեմ իմունիտետի բնական պայքարի մեխանիզմների հիման վրա հորինվել է իմունային համակարգը խթանելու հեշտ միջոց՝ դա պատվաստումն է, ասել է իմունոլոգը։

Երեխաների իմունային պաշտպանության բնական ուժերը պահպանելու համար կարևոր է առողջ ապրելակերպ վարել՝ չմոռանալով մաքուր օդում քայլելու, լավ քնի մասին։

Կանոնավոր չափավոր ֆիզիկական ակտիվությունն օգնում է պահպանել առողջությունը և հիվանդությունից հետո ավելի արագ վերականգնման գործընթացը:

Բժիշկը նկատել է նաև, որ սթրեսը կարող է բացասաբար ազդել իմունիտետի վրա:

Ի՞նչ մթերքներ են ամրացնում երեխայի իմունիտետը

Ըստ Գրոմադինայի՝ ռացիոնալ բազմազան դիետան, որը հարուստ է վիտամիններով, միկրոէլեմենտներով, բջջանյութով և սպիտակուցներով, օրգանիզմին ուժ է տալիս ավելի արագ հաղթահարելու վիրուսներն ու բակտերիաները:

«Աշուն-ձմեռ ժամանակահատվածում իմունային համակարգի ամրապնդման համար անհրաժեշտ է բավարար քանակությամբ ասկորբինաթթու ստանալ, որը կա ցիտրուսային մրգերում, խնձորի ու մասուրի մեջ:

Սելենը և այլ վիտամիններ, ինչպիսիք են վիտամին E-ն, մանգանը, ցինկը և պղինձը, նույնպես օգնում են վարակիչ հիվանդությունների դեմ պայքարում։ Մեր օրգանիզմի բազմաթիվ համակարգերի, այդ թվում՝ իմունային համակարգի աշխատանքի մեջ ներգրավված կարևոր տարրը երկաթն է, որը մենք կարող ենք համալրել՝ ուտելով միս, լոլիկ, ընդեղեն և ծովամթերք: