Ընտանի կենդանիների պաշտպանության համար նոր օրենք է մշակվում

«Դինգո թիմ» ՀԿ նախագահ Օվսաննա Հովսեփյանը և «Դինգո թիմ» ՀԿ կոորդինատոր Գոհար Մանուշակյանն օգոստոսի 9-ին անդրադառնալով շնամարտերին՝ ասել են, որ բոլոր այն երկրներում, որտեղ կենդանիների պաշտպանության օրենքը գործում է, շնամարտերն արգելվում են և շատ խիստ պատժվում են՝ ընդհուպ մինչև քրեական պատիժ է սահմանվում:  Բանախոսներն ասել են, որ օրինագիծ են մշակում և երբ այն օրենք դառնա, խստացումներ են լինելու:

«Եվ մենք հիմա օրենքի նախագծով հանդես ենք եկել, և դա ընթացքի մեջ է, կանենք մեզնից հասանելի ամեն ինչ, որպեսզի դրանք ցանկացած անվան տակ կրեն հնարավորինս խիստ պատիժ», – ասել է Օվսաննա Հովսեփյանը՝ հավելելով, որ օրենքի նախագիծն այս պահին մշակում են ԱԺ պատգամավոր Լենա Նազարյանի հետ՝ ԱԺ ներկայացնելու համար:

«Սկզբի համար վերահսկողությունը թե՜ ոստիկանությունը պետք է անի, թե՜ մենք մեզ վրա որոշակի պարտականություններ կվերցնենք՝ որպես հասարակական կազմակերպություն: Մենք հիմա փորձում ենք 92 հոդվածը շատ-շատ խստացնել՝ այսինքն  կենդանիների նկատմամբ դաժան վերաբերմունքը,  և դրա մեջ ներառվեն նաև որոշակի կետեր, որոնք չեն ներառվել: Պետք է քրեական պատասխանատվություն լինի, կամ այնպիսի մեծ տուգանքներ, որ մարդիկ վախենան և կամաց-կամաց սկսեն դադարեցնել»,- ասել է նա:

Shantnews.am-ի հարցին՝ արդյո՞ք օրենքը կարող է որևէ բան փոխել, բանախոսներն այսպիսի պատասխան են տվել.

«Գիտեք, մեր հիմիկվա ունեցածը շատ ծիծաղելի է: Դու կարող ես կենդանուն ամենադաժան ձևով սպանել և տուգանվել 5000 դրամ: Սա աբսուրդ է, և դրանից ոչ ոք չի քաշվի: Իսկ եթե դրա համար տուգանվեն, օրինակ, 1 մլն դրամ,  և լինեն այնպիսի մարդիկ, ինչպիսին մենք ենք, որ ընկնեն նրանց հետևից, որպեսզի տուգանքը տան, վստահ եմ, որ դրանից շատ բան կփոխվի», – ասել է «Դինգո թիմ» ՀԿ նախագահ Օվսաննա Հովսեփյանը:

«Դինգո թիմ» ՀԿ կոորդինատոր Գոհար Մանուշակյանի հավելմամբ էլ՝ օրենքը կարգավորելու է նաև այն հարցը, թե ով է  իրավունք ունենալու կենդանիներ բուծել.

«Ամեն մարդ չի կարողանալու զույգեր բուծել, որպեսզի այդ կենդանիները հետո հայտնվեն դրսում: Որովհետև ամենաթանկարժեք ցեղատեսակն էլ այսօր հայտնվում է դրսում: Հայաստանում լուրջ մոդա են հասկիները: Դրանք բավական թանկ արժեն, մենք միայն մեկ ամսվա մեջ 8 հասկի փողոցից գտանք, գտանք տերերին, որոնց շներն արդեն պետք չէին՝ ուղղակի դուրս էին գցել: Մենք նաև Բենգալյան կատուներ ենք գտել, որոնք 3000 դոլարից են սկսվում և Հայաստանում գրեթե չկա՝ 5-6 կատու կա: Օրենքը պետք է սահմանի, որ ամեն մարդ իրավունք չունի բուծելու, դրա համար պիտի լինի լիցենզիա, ձագերը պետք է գրանցված լինեն, ինքը պիտի դրա համար հարկ վճարի, վաճառքն էլ ցույց տա, որպեսզի և՜ գլխաքանակին կարողանանք հետևենք, և՜  փողոցներում այսքան կենդանի չլինի», – հավելել է Մանուշակյանը: