Քննարկվել է պետական բյուջեի առաջին կիսամյակի կատարման ընթացքի վերաբերյալ տեղեկանքը

Մենք գործում ենք բարձր անորոշությունների պայմաններում և հաճախ ստիպված ենք լինում իրավիճակից պահանջվող որոշումներ կայացնել, որն էլ կառավարությունը մեծ հաջողությամբ կատարում է: Այսինքն՝ մենք փորձում ենք արձագանքել ընթացիկ հարցերին և տվյալ իրավիճակում պահանջվող լուծումներ գտնել՝ տնտեսական ակտիվությունը բավարար բարձր պահելու համար: Այս մասին ասել է ՀՀ ֆինանսների նախարար Տիգրան Խաչատրյանը 2022 թ. պետական բյուջեի առաջին կիսամյակի կատարման ընթացքի վերաբերյալ տեղեկանքի քննարկման ընթացքում:

Ինչպես տեղեկացնում  ՀՀ ԱԺ պաշտոնական կայքէջը, քննարկումը տեղի է ունեցել սեպտեմբերի 5-ի ՀՀ ԱԺ ֆինանսավարկային և բյուջետային հարցերի մշտական հանձնաժողովի նիստում՝ Գևորգ Պապոյանի նախագահությամբ, որին մասնակցել են Հաշվեքննիչ պալատի նախագահ Ատոմ Ջանջուղազյանը, ներկայացուցիչներ ԿԲ-ից և ՊԵԿ-ից:

Ըստ Տիգրան Խաչատրյանի՝ 2022 թ. հունիսի 30-ի դրությամբ մոլիբդենի արժեքը 65,8 տոկոսով ավելի բարձր է եղել նախորդ տարվա նույն ամսաթվի համեմատ՝ կազմելով 45.892 դոլար: 2022 թ. առաջին կիսամյակում պղնձի միջազգային գներն աճել են 7.3 տոկոսով՝ կազմելով 9.753 դոլար մեկ տոննայի համար: Պարենի միջազգային գների ինդեքսը կազմել է 154, որը նախորդ տարվա նույն ժամանակահատվածի դրությամբ 54 տոկոսով բարձր է եղել՝ ազդելով գնաճի ցուցանիշի վրա:

Ներկայացնելով տնտեսական ակտիվության ցուցանիշները՝ նշվել է, որ 6 ամիսների ընթացքում 38,7 տոկոս ակտիվություն է արձանագրվել ֆինանսական և ապահովագրական գործունեության բնագավառում, տեղեկատվության և կապի բնագավառում՝ 27,2 տոկոս: 29 տոկոսով աճել է կացության և հանրային սննդի կազմակերպությունների և 43,2 տոկոսով տրանսպորտային ծառայությունների բնագավառի տնտեսական ակտիվությունը: Ֆինանսների նախարարի խոսքերով՝ ունեցել ենք նաև արդյունաբերության աճ, որը հիմնականում պայմանավորված է եղել մշակվող արդյունաբերության 15,1 տոկոս տնտեսական ակտիվությամբ: Տնտեսական ակտիվության ցուցանիշները գյուղատնտեսության բնագավառում նվազել են 8,8 տոկոսով, իսկ անասնաբուծության բնագավառում՝ 3 տոկոսով: Շինարարության մեջ գրանցվել է 27,2 տոկոս աճ, առևտրում՝ 15,4 տոկոս աճ: Արձանագրվել է 11 տոկոս ՀՆԱ-ի աճ:

Անդրադառնալով սպառողական գներին՝ Տիգրան Խաչատրյանը նշել է, որ 12-ամսյա գնաճը կազմել է 10,3 տոկոս: Նրա դիտարկմամբ՝ հուլիս ամսվա արդյունքներով արձանագրվել է սպառողական գների նվազեցված ցուցանիշ:

Հարկային եկամուտներում, ըստ ֆինանսների նախարարի, նախատեսվածից բարձր աճ է արձանագրվել. 6 ամսվա արդյունքներով գրանցվել է 17-18 տոկոս անվանական աճ:

2022 թ. հունիսի 30-ի դրությամբ ՀՀ պետական պարտքը կազմել է 4 տրլն 55 մլրդ դրամ (9 մլրդ 932 մլն ԱՄՆ դոլար):

ՊԵԿ նախագահի տեղակալ Արտյոմ Սմբատյանը հանձնաժողովին ներկայացրել է հունվար-օգոստոս ամսվա ամփոփումը, ըստ որի՝ նշված ամիսներին ՊԵԿ-ի կողմից հավաքագրվել է 1 տրիլիոն 232 մլրդ դրամ հարկային եկամուտ, որը նախորդ տարվա նույն ժամանակաշրջանի համեմատությամբ ավելի է 250 մլրդ դրամով կամ 25,2 տոկոսով: Նրա դիտարկմամբ՝ հարկերի հավաքագրման տեմպը չի զիջում ՀՆԱ-ի մակրոտնտեսական ցուցանիշների տեմպին:

Ֆինանսների նախարար Տիգրան Խաչատրյանը, ԿԲ նախագահի տեղակալ Ներսես Երիցյանը, ՊԵԿ նախագահի տեղակալ Արտյոմ Սմբատյանը ներկայացրել են պարզաբանումներ եկամուտների ավելացմանը զուգահեռ ծախսերի ավելացման խնդրի, փոխարժեքի վրա ներմուծման և արտահանման աճի ազդեցության վերաբերյալ, անդրադարձել են տնտեսական աճի տեմպին, գնաճին, հարկեր-ՀՆԱ հարաբերակցությանը:

Պատգամավոր Միքայել Թումասյանը ներկայացրել է իր դիտարկումներն ու առաջարկությունները՝ աշխատանքների կատարման ավելի սահուն ընթացք ապահովելու նպատակով: Ֆինանսների նախարար Տիգրան Խաչատրյանն առաջարկել է կազմակերպել աշխատանքային քննարկումներ, գույքագրել խնդիրները ու փորձել լուծել առաջացած հարցերը: