Կառավարությունը ներկայացրել է Հայաստանում 2017 թվականին իրականացված ներդրումային ծրագրերի վերաբերյալ հաշվետվություն՝ ըստ ոլորտների և ֆինանսական աղբյուրների: Այն ներառում է պետական, վարկային և դրամաշնորհային միջոցներով, ինչպես նաև մասնավոր, պետություն-մասնավոր հատված համագործակցությամբ իրականացված՝ ընդհանուր՝ 856 միլիոն 500 հազար դոլար ծավալով ներդրումային ծրագրեր, որոնք իրականացվել են գերատեսչությունների համակարգման ոլորտներում: Առանձին հատվածով ներկայացվում են նաև մարզերում իրականացված ծրագրերը, ընդհանուր՝ 170 միլիոն 900 հազար դոլար ծավալով, որոնք ներառված չեն վերոնշյալ  856 միլիոն 500 հազար դոլարի ծրագրերում: 

ԲԱՇԽՈՒՄԸ՝ ԸՍՏ ԳԵՐԱՏԵՍՉՈՒԹՅՈՒՆՆԵՐԻ ՀԱՄԱԿԱՐԳՄԱՆ ՈԼՈՐՏՆԵՐԻ

ՀՀ կառավարության կողմից մի շարք ընկերությունների տարբեր արտոնություններ են տրամադրվել և տարվա ընթացքում ՀՀ տնտեսական զարգացման և ներդրումների նախարարությունն այդ ընկերությունների կողմից ներդրումային ծրագրով ստանձնած պարտավորությունների վերաբերյալ մոնիթորինգ է իրականացրել: Ըստ մոնիթորինգի արդյունքների՝ 2017թ. կատարվել է շուրջ 506 մլն. ԱՄՆ դոլարի ներդրում, որը ներառված է 856 մլն. դոլարի ներդրումների մեջ:

ԲԱՇԽՈՒՄԸ՝ ԸՍՏ ՖԻՆԱՆՍԱՎՈՐՄԱՆ ԱՂԲՅՈՒՐՆԵՐԻ

ՄԱՐԶԱՅԻՆ ԾՐԱԳՐԵՐ

Տարածքային կառավարման և զարգացման նախարարության կողմից մարզպետարանների աջակցությամբ մարզերում իրականացված շուրջ 170 մլն ԱՄՆ դոլարի ծրագրերը բաժանվում են 2 հիմնական մասի՝

• Բիզնես ներդրումներ՝ արտադրական հզորությունների զարգացում կամ վերանորոգման աշխատանքների իրականացում, նոր արտադրական և հասարակական նշանակության շենքերի կառուցում, ջերմոցների և ինտենսիվ այգիների հիմնում,

• Բնակարանաշինություն, ենթակառուցվածքներ, դպրոցներ, մանկապարտեզներ, առևտրի և սպասարկման օբյեկտներ և այլ ծրագրեր: Ընդհանուր առմամբ մարզերում իրականացվել է 614 ծրագիր: 

Ստորև ներկայացվում են մարզային ծրագրերը՝ ըստ ներդրումների ծավալի և տեսակի.

Իսկ գերատեսչությունների կողմից ներկայացված ներդրումների ծավալներին՝ ըստ ենթաոլորտների, կարող եք ծանոթանալ այստեղ: 

Վերջում նկատենք, որ դեռևս անցած տարվա սկզբին վարչապետ Կարեն Կարապետյանը խոստացել էր ապահովել 850 մլն դոլար ներդրումներ.

«Այս տարվա ընթացքում մեր տնտեսության մեջ կլինեն 850 միլիոն դոլարի ներդրումներ, առաջիկա երկու-երեք տարվա ընթացքում ներդրումների ծավալը կլինի 3.2 միլիարդ դոլար, իսկ ընդհանրապես, կառավարության տեսադաշտում կան ավելի քան 5 միլիարդ դոլարի ներդրումային ծրագրեր»,- նշել էր Կարապետյանը:

Երբ տարին արդեն ավարտին էր մոտենում վերլուծաբաններն ու տնտեսագետները, ուսումնասիրելով մինչ այդ կատարված ներդրումների ծավալները, հայտարարեցին, որ վարչապետը դժվար թե կարողանա իր խոստումը կատարել: Այս քննադատություններին հաջորդեց ՀՀ տնտեսական զարգացման և ներդրումների նախարարության տարածած հաղորդագրությունը: Այդ գերատեսչությունը բացատրում էր, թե որն է «ներդրումներ» եզրույթի տնտեսագիտական սահմանումը: 

«Խոսքը վերաբերում է 830-850 մլն դոլարի ինչպես պետական, այնպես էլ մասնավոր ներդրումներին, որոնք իրականացվելու են 2017 թ.: Դրանց մեջ ներառված են տարբեր գերատեսչությունների կողմից իրականացվող պետական, այդ թվում՝ վարկային կամ դրամաշնորհային միջոցներով իրականացվող, պետություն – մասնավոր համագործակցության ներդրումային ծրագրերը, ինչպես նաև մասնավոր այն ներդրումային ծրագրերը, որոնք պետության կողմից ստացել են հարկային, մաքսային կամ այլ արտոնություններ»,- ասված էր նախարարության տարածած հաղորդագրության մեջ: 

Սակայն այս հաղորդագրությունն էլ գրեթե ոչնչով չփրկեց գործադիրին. վերլուծաբանները նկատեցին՝ դրանք ընդամենը արդարացումներ են խոստացված ներդրումների փոխարեն: 

Ու հիմա նայելով կառավարության հաշվետվության մեջ ներկայացրած ներդրումների ընդհանուր ծավալին՝ 856 միլիոն 546 հազար 170 դոլար, ըստ էության համապատասխանում է Կարապետյանի խոստմանը, եթե հաշվի առնենք նաև ՀՀ տնտեսական զարգացման և ներդրումների նախարարության վերոնշյալ հաղորդագրությունը: Բայց դեռ հարց է՝ արդյոք դա իրականում արդարացումներ չէին խոստացված ներդրումների փոխարեն: