Ուկրաինայի հաջող հակահարձակումը, ե՞րբ է կանխատեսվում պատերազմի ավարտը

Ուկրաինայում Ռուսաստանի ծավալած ռազմական գործողությունների մեկնարկից անցել է 201 օր։ Վերջին օրերի ընթացքում ուկրաինական կողմը պարբերաբար տեղեկություններ է հաղորդում ռազմաճակատում գրանցած հաջողությունների մասին։ Ըստ Ուկրաինայի զինված ուժերի գլխավոր հրամանատարի՝ սեպտեմբերի սկզբից ազատագրվել է 3000 քառակուսի կմ տարածք, այդ թվում՝ ռազմավարական նշանակություն ունեցող Իզյում քաղաքը։

The latest map update from @criticalthreats and @TheStudyofWar shows that Ukraine's counteroffensive has driven Russian forces almost entirely out of Kharkiv Oblast. pic.twitter.com/gGXLVPMlTH

— Brady Africk (@bradyafr) September 12, 2022

Իր հերթին Ուկրաինայի զինված ուժերի գլխավոր շտաբն առավոտյան տեղեկագրում հայտնել է Խերսոնի ուղղությամբ հաջող գործողությունների, ինչպես նաև այլ հատվածներում բնակավայրերի ազատագրման մասին։

«Լուգանսկի մարզում ռուս զինվորականները և նրանց ընտանիքները լքել են Սվատովո քաղաքը։ Մնացել են միայն, այսպես կոչված, «ժողովրդական միլիցիայի» զինվորները և տեղի բնակիչները։ Ընդհանուր առմամբ, վերջին օրվա ընթացքում պաշտպանության ուժերին հաջողվել է հակառակորդին դուրս հանել ավելի քան 20 բնակավայրերից»,- տեղեկացրել է Ուկրաինայի ԶՈՒ ԳՇ խոսնակ Ալեքսանդր Շտուպունը։

Մեծ Բրիտանիայի պաշտպանության նախարարությունն իր հերթին հայտնել է, որ ուկրաինական առաջխաղացման պատճառով Ռուսաստանն, ամենայն հավանականությամբ, կարգադրել է զորքերի դուրսբերում Խարկովի մարզից՝ Օսկիլ գետից արևմուտք։

«Ուկրաինայի արագ հաջողությունները զգալի հետևանքներ են ունեցել ռուսական գործողության ընդհանուր ծրագրի վրա։ Ուկրաինայում գտնվող ռուսական ուժերի մեծ մասը, ամենայն հավանականությամբ, ստիպված է առաջնահերթություն տալ պաշտպանության կազմակերպմանը»,- նշված է Բրիտանիայի հետախուզության տրամադրած վերջին տեղեկագրի մեջ։

Latest Defence Intelligence update on the situation in Ukraine – 12 September 2022

Find out more about the UK government's response: https://t.co/IISQBW8TQK

🇺🇦 #StandWithUkraine 🇺🇦 pic.twitter.com/QFOzJpanUr

— Ministry of Defence 🇬🇧 (@DefenceHQ) September 12, 2022

Ռուսաստանի պաշտպանության նախարարությունն ավելի վաղ հաղորդել էր, որ Դոնբասի ազատագրման ռազմական հատուկ գործողության նպատակներին հասնելու համար ռուսական ուժերը Բալակլեայից և Իզյումից տեղափոխվել են Դոնեցկի Ժողովրդական Հանրապետության տարածք։

Իսկ արդեն այսօրվա տեղեկագրում Ռուսաստանի պաշտպանական գերատեսչությունը հայտնել է ուկրաինական կողմին հասցրած հարվածների մասին։

«Կուպյանսկ և Իզյում բնակավայրերի շրջանում ոչնչացվել է կենդանի ուժ և զինտեխնիկա։ Հակառակորդի կորուստները կազմել են մինչև 250 զինծառայող և 20 միավոր ռազմական տեխնիկա։ Նիկոլաևի մարզի Վոզնեսենսկ բնակավայրի շրջանում ոչնչացվել է զինամթերքի պահեստ, որում պահվում էր Ուկրաինայի զինված ուժերի 45 հազար տոննա սպառազինություն։ Հակաօդային պաշտպանության համակարգերի կողմից մեկ օրում խոցվել է 5 անօդաչու թռչող սարք։ Բացի դրանից՝ օդում խոցվել է «ՀԱՅՄԱՐԶ» և «Օլխա» համազարկային կրակի ռեակտիվ համակարգերի 8 արկ»,- նշել է ՌԴ ՊՆ պաշտոնական ներկայացուցիչ Իգոր Կոնաշենկովը։

Պատերազմի ուսումնասիրման ամերիկյան ինստիտուտի փորձագետները Կիևի հաջողությունները պայմանավորում են, այդ թվում, արևմտյան սպառազինության առավելագույն օգտագործմամբ։ Չնայած Կիևի հաջող հակահարձակմանը՝ պատերազմն, ամենայն հավանականությամբ, կտևի մինչև 2023 թվականը։ Ինստիտուտի փորձագետները նշում են, որ ռուսները կվերականգնեն պաշտպանական գիծը, որոշ տեղերում, գուցե, հակահարձակման անցնեն։ Հետևաբար, Ուկրաինան ստիպված կլինի հակահարձակման նոր գործողություններ ձեռնարկել իր տարածքն ազատագրելու համար, ուստի՝ պատերազմը կձգձգվի մինչև հաջորդ տարի։