Ադրբեջանի հանցագործություններ, ԱԳՆ-ների հանդիպում և Ադրբեջանի պահանջներ. զրույց Էդմոն Մարուքյանի հետ

Ադրբեջանի կողմից իրականացված պատերազմական հանցագործությունների, Հայաստանի և Ադրբեջանի արտաքին գործերի նախարարների հանդիպման և Ադրբեջանի ներկայացրած պահանջների շուրջ «Հեռանկարի տաղավարում հեռուստամեկնաբան Վահագն Հակոբյանը զրուցել է ՀՀ հատուկ հանձնարարություններով դեսպան Էդմոն Մարուքյանի հետ:

«Միջազգային իրավունքի տեսանկյունից այն հստակ պատերազմական հանցագործություն է կոչվում, այսինքն՝ ռազմական ագրեսիայի ժամանակ ագրեսոր կողմը թույլ է տվել պատերազմական հանցագործություն, այսինքն՝ ռազմական ագրեսիան մեկ իրավական կատեգորիա է, դրա ընթացքում տեղի ունեցածն ունի հետևյալ բնորոշումը: Էս իմաստով միջազգային քրեական հետապնդման առարկա է սա, ինչպես նաև համընդհանուր իրավազորության ներքո:

Եթե մենք հետևողականորեն զբաղվենք, իսկ մենք դա պետք է անենք անպայման, Ադրբեջանի համապատասխան պաշտոնատար անձինք, ովքեր որ կնույնականացվեն, բնականաբար, կարող են միջազգային քրեական հետապնդման ենթարկվել այն երկրներում, որտեղ կա համընդհանուր իրավազորություն: Տվյալ պարագայում ունենք միջազգային արձագանք տարբեր երկրների, տարբեր ինստիտուտների կողմից, առ այն, որ սա հստակ պատերազմական հանցագործություն է և պետք է քննության ենթարկվի:

Ադրբեջանը հիմա փորձում է ինքը ներկայացնել այլ տեսանյութեր, որ այ տեսեք՝ Հայաստանն էլ է նման բաներ արել, մինչդեռ հայկական կողմից երբևէ տեղի չեն ունեցել:  Ավելին, Ադրբեջանի կողմից արվածը խաղաղության պայմանագրի բանակցությունների ընթացքում տեղի ունեցած պատերազմական հանցագործություն է և դրան գումարված ռազմական ագրեսիան, ինչը բնավ համեմատելի չէ լայնածավալ պատերազմի ժամանակ տեղի ունեցած որևէ դրվագի հետ, չնայած դրան, հայկական կողմը, կրկնում եմ, նման որևէ միջադեպ չունի թույլ տված:

Ինչ վերաբերում է, թե ինչու՞ տեսանյութը հրապարակվեց.․․ Ադրբեջանի կառավարությունը չէ, որ հրապարակել է, հստակ է, եթե նրանք կարողանային վերահսկողության տակ պահել, չէր հրապարակվի,  բայց պետք է նայենք դրա մյուս կողմը: Ինչու՞ է Ադրբեջանում դա հերոսանալու բան, որովհետև նախկինում Ադրբեջանի իշխանությունները հերոսացրել են պատերազմական հանցագործությունների իրականացնողներին՝ սկսած Ռամիլ Սաֆարովից, նաև հետագայում՝ 44-օրյա պատերազմի դեպքերով, և նաև վերջին դեպքերով և հետևաբար գիտեք՝ նման դեպքը լինում է, զինվորները նկարահանում են և մեկը մյուսին է փոխանցում ՝ գլուխ գովելու, հերոսանալու համար և ինչ-որ մի տեղից սպրդվել է: Լավ է, որ սպրդվել է, որովհետև սա հստակ ապացույց է՝ ընդդեմ Ադրբեջանի»,- ասաց Էդմոն Մարուքյանը:

Մանրամասները՝ ամբողջական հարցազրույցում: