Ալիևը մեղադրում է ֆրանսիացիներին Ալժիրում ցեղասպանություն իրականացմելու մեջ․ ինչո՞վ կպատասխանի Փարիզը

Իլհամ Ալիևը կրկին Ֆրանսիային սադրող հայտարարություններով է հանդես եկել: Այս անգամ Ադրբեջանի նախագահը մեղադրել է ֆրանսիացիներին մարդկության դեմ հանցանքներ կատարելու և ցեղասպանություն գործելու մեջ:  Ի՞նչն է Ալիևը մարդկության դեմ հանցանք համարում: Թեմայի շուրջ «Հորիզոնի» տաղավարում մանրամասներ է հայտնել Արտյոմ Երկանյանը:

«Իլհամ Ալիևը մեկնել է Ալժիր, ուր այսօր իր աշխատանքն է սկսել արաբական երկրների լիգայի 31-րդ գագաթնաժողովը: Թեև Ադրբեջանը արաբական պետություն չէ, ադրբեջանցիները արաբներ չեն, այնուամենայնիվ, Ալիևը որոշել է մեկնել Ալժիր՝ հավանաբար պարզապես նպատակ ունենալով օգտագործել գագաթնաժողովի բարձր ամբիոնը՝ հակահայկական, այդ թվում նաև հակաֆրանսիական հայտարարություններ հնչեցնելու համար: Ալժիր, քանի որ Ֆրանսիայի հետ ժամանակին խնդիրներ ունեցած պետություն է: Ալիևն առաջին հերթին այցելել է  ալժիրցի շահիդների հուշարձան, ծաղկեպսակ է դրել, այնուհետ համագումարի բացման արարողության ժամանակ հանդես է եկել ելույթով, որում ասել է հետևյալ բառերը. «Ալժիրի ժողովրդի դեմ ոճրագործությունները կատարել է Ֆրանսիան: Այդ ջարդերից 1.5 մլն մարդ է մահացել: Աշխարհը չպետք է մոռանա ֆրանսիացիների արածը: Բաքվի մամուլն էլ, այդ թվում նաև իշխանամեդ լրատվամիջոցներում այժմ լի է հրապարակումներով, որտեղ ֆրանսիացի ժողովրդին մեղադրում են Ալժիրի ժողովրդի ցեղասպանություն իրականացնելու մեջ: Պատճառը պարզ է. բանն այն է, որ նոյեմբերի 15-ին Ֆրանսիայի Սենատը քվեարկության է դնելու մի բանաձև, որը ենթադրում է շատ կոշտ գնահատականներ Ադրբեջանի հասցեին՝ մասնավորապես դատապարտելու են ադրբեջանական ագրեսիան՝ Հայաստանի դեմ, և ենթադրվում է, որ մեղադրելու են Ադրբեջանի իշխանություններին՝ Արցախում մարդկության դեմ կատարած հանցագործությունների համար: Եվ նաև սենատորները պատրաստվում են դիմել երկրի կառավարությանը՝ կոչ անելով ոչ միայն հրաժարվել ադրբեջանական նավթից և գազից, այլ նաև հասնել դրան, որ Եվրամիությունը նույնպես հրաժարվի ադրբեջանական էներգակիրներից: Եվ ահա այսպես է Ադրբեջանը փորձում պատասխանել ֆրանսիացիներին, թեև վստահ եմ, որ Ադրբեջանի իշխանությունների այս քայլերի արդյունքում Ֆրանսիայի Սենատի այդ բանաձևը ընդունման շատ ավելի մեծ շանսեր կունենա»,- ասաց Արտյոմ Երկանյանը:

Ֆրանսիան ինչպե՞ս է գնահատում Ալժիրում տեղի ունեցած իրադարձությունները, և ինչպե՞ս են վերաբերվում Ալիևի հայտարարություններին Ալժիրի իշխանությունները: Արտյոմ Երկանյանը խոսել է նաև այս հարցերի շուրջ:

Մանրամասները՝ ամբողջական հարցազրույցում: