Գյումրին ժամանակավոր կացարաններից ազատելու գործընթաց կսկսվի փոխհատուցում ստացած ընտանիքների տնակների ապամոնտաժումով

Կառավարությունը հոկտեմբերի 14-ին ընդունել է «Աղետի գոտու բնակավայրերի պետական և համայնքային սեփականություն հանդիսացող հողամասերը երկրաշարժից հետո տեղադրված կամ կառուցված ոչ հիմնական շինություններից ազատելու կարգը հաստատելու մասին» որոշումը։ Այն ենթադրում է աղետի գոտու բնակավայրերի տնակներում ապրող ընտանիքների բնակարանային հարցի լուծում փուլային եղանակով։ Իսկ վերջնաժամկետը 2027 թվականն է։ Որոշումը վերաբերում է տնակներում ապրող գրեթե բոլոր ընտանիքներին և իրավական հիմքեր է ստեղծում չբնակեցված տնակներն ապամոնտաժելու համար։

2019-ին իրականացված հաշվառման արդյունքում Գյումրիում կար մոտ 2900 տնակ։ 3 տարիների ընթացքում տնակների ապամոնտաժման գործընթացը դանդաղ, բայց շարունակվել է, արդյունքում տնակների թիվը պակասել է 157-ով և հիմա 2743-ն է։ Ո՞ր տնակներն են ապամոնտաժման ենթակա։ Այս հարցի պատասխանը պատկան մարմինները թեև գիտեին, բայց իրավական հիմքեր չկային ապամոնտաժելու համար։ Քանդման ենթակա են այն տնակները, որոնք բնակեցված չեն և նրանք, որոնց տերերը բնակարանային փոխհատուցում ստացել են ու նոր բնակարանում են ապրում։Կառավարության նոր որոշմամբ այս ընտանիքներին տնակները քանդելու հստակ ժամկետներ են տրվում։

« Այն քաղաքացիները, որոնք բնակարանային փոխհատուցում են ստացել և մինչ օրս չեն սեփականաշնորհել բնակարանը և չեն քանդել տնակը, պետք է ապամոնտաժեն։ Այսինքն, ունեն 6 ամիս ժամանակ։ Այդ տնակների մեծ մասը փակ է, որոնք քաղաքացիները դեռ պահում են կամ տվել են վարձով։ Որոշման մեջ հստակ գրված է, որ քաղաքացին ունի 6 ամիս։ Եթե դեռ չի  քանդել, ապա պետք է 6 ամսում ապամոնտաժի, եթե ոչ, ապա 1 ամիս ժամանակ է տրվում, որ համայնքն իր լիազորությունները լիարժեք կատարի»,- SHANTNEWS-ին ասել է Գյումրիի քաղաքապետարանի համայնքի անշարժ գույքի կառավարման բաժնի պետի ժամանակավոր պաշտոնակատար Գևրոգ Գրիգորյանը։

Եթե տնակը հաշվառման պահին փակ է եղել, արդյո՞ք նշանակում է, որ այն բնակեցված չէ։ Այս հարցին քաղաքապետարանի համայնքային անշարժ գույքի կառավարման բաժնում միանշանակ չեն պատասխանում։ Իսկապես, չբնակեցված տնակներն առանձնացնելու համար դեռ էլի պետք է ուսումնասիրություններ կատարեն։

ԲԳՎ-ների տրամադրման գործընթացը սկսվելու է 6 ամսից, երբ կլրանա տնակների ապամոնտաժման վերջնաժամկետը։ Դեռ հստակ չէ, թե քանի ընտանիք է Գյումրիում վկայագրի շահառու լինելու։ Նախատեսվում է վկայագրեր տրամադրել մինչ այս տարբեր պատճառներով բնակապահովման ծրագրերից դուրս մնացած, տունը վաճառած ու տնակում հայտնված ընտանիքներին և բազմանդամ ընտանիքներին, որոնց մի մասը դեռ տնակում է։ Վկայագիրը ստանալու դեպքում  տնակն ապամոնտաժելու մեկամսյա ժամկետ է սահմանված։

Կառավարության որոշումն առանձին կետով անդրադառնում է նաև այն ընտանիքներին, որոնք չեն ուզում տնակի տարածքից հրաժարվել ու պատրաստ են իրենց միջոցներով տուն կառուցել։

«Եթե բնակիչը համաձայնում է այդ կետով, ապա հողատարածքը անհատույց տրամադրվում է նրան՝ 3 տարում քաղաքաշինական նորմերին համապատասխան տուն կառուցելու պայմանով։ Հողատարածքը ստանալուց հետո 3 տարի ժամանակ է տրվում։ Եթե չի կառուցում, հողատարածքը ետ է վերցվում»,- ասել է Գևորգ Գրիգորյանը։

Բոլոր դեպքերում տնակի ապամոնտաժումը կարևոր պայման է։ Փոխհատուցում ստացած ընտանիքների տնակներն ապամոնտաժելու 6 -ամսյա ժամկետը հաշվարկվում է հոկտեմբերի 14-ից։ 6 ամսից հետո քաղաքապետարանը կսպասի ևս 1 ամիս և այն տնակները, որոնք չեն ապամոնտաժվել, արդեն քաղաքապետարանի միջնորդությամբ կքանդվեն։

Այս ընթացքում քաղաքապետարանն էլի հաշվառելու է և մինչև փետրվարի 10-ը տվյալներ է ներկայացնելու, թե քաղաքում քանի տնակ կա, դրանցից քանիսն են բնակեցված, քանիսը՝ փակ դուռ։ Ի դեպ, ապամոնտաժման որոշումը վերաբերում է ոչ միայն փակ տնակներին, այլև տաղավարներին, կրպակներին, որոնք չունեն պայմանագրեր և համայնքային հողատարածքներն ապօրինի են զբաղեցնում։