Նիդերլանդների կառավարությունը հետևողական է Ադրբեջանի ռազմական հանցագործությունները հետաքննելու հարցում

Նիդարլանդների դեսպան Նիկոլաս Յակոբ Սխերմերսն այսօր մի խումբ հոլանդացի դիվանագետների հետ այցելել է Ջերմուկ: Նրանք տեղում ծանոթացել են ադրբեջանական ագրեսիայի հետևանքներին:

Ի՞նչ մանրամասներ են հայտնի, և ինչո՞ւմ է դրսևորվում Հոլանդիայի հատուկ ուշադրությունը՝ ադրբեջանական ագրեսիայի նկատմամբ:

«Հորիզոնի» տաղավարում թեմային անդրադարձել է Արտյոմ Երկանյանը:

«Հոլանդիայի դեսպանը, նրան ուղեկցող անձինք, շրջել են քաղաքով, ծանոթացել են իրավիճակին: Այնտեղ դեռևս ամբողջությամբ չէ, որ վերացրել են ադրբեջանական ագրեսիայի հետևանքները: Նրանց ուղեկցել է Ջերմուկի փոխքաղաքապետը: Հատկանշական է, որ դեսպանի հետ Ջերմուկ էր ժամանել նաև Նիդերլանդների թագավորության արտգործնախարարության բարձրաստիճան մի պաշտոնյա՝ Ջ. Մարիա Կլաինան, ով հատուկ է Երևան եկել՝ ադրբեջանական ագրեսիայի հետևանքով ստեղծված իրավիճակին ծանոթանալու, և ընդհանրապես՝ հայ-ադրբեջանական հակամարտության ընթացքին ծանոթանալու:

Հայտնի չէ, թե Երևանից հետո նա արդյո՞ք այցելելու է նաև Բաքու, բայց պետք է հիշեցնեմ, որ Ամստերդամի և Բաքվի միջև վերջին օրերին բավական լարված է իրավիճակը:

Նիդերլանդներն առաջին պետություններից էր, որ գնահատական տվեցին Ադրբեջանի սեպտեմբերյան ագրեսիայից հետո Ադրբեջանի ռազմական հանցագործություններին: Երբ Եվրամիության ներկայացուցիչ Տոյվո Կլաարը տարածեց այդ հայտնի տեսանյութը, որն արձանագրում էր, թե ինչպես են ադրբեջանցի զինվորականներն անզեն հայ ռազմագերիներին գնդակահարում, Նիդերլանդների արտգործնախարարն իր մոտ էր հրավիրել Ադրբեջանի դեսպանին և պահանջել էր անկախ, անկողմնակալ հետաքննություն իրականացնել: Դրան հետևեց այն, որ նոյեմբերի 4-ին Նիդերլանդների արտգործնախարարը, ով նաև երկրի փոխվարչապետն է, պաշտոնական նամակով դիմեց երկրի խորհրդարանին՝ տեղեկացնելով, թե ինչ քայլեր են ձեռնարկվում ադրբեջանական այս ենթադրյալ հանցագործությունները հետաքննելու նպատակով: Վստահեցրել է, որ այդ հարցում Նիդերլանդների կառավարությունը հետևողական է լինելու և շարունակելու է պահանջել Ադրբեջանի կառավարությունից, որպեսզի մեղավորները պարզվեն և պատժվեն, և որ այս հարցում համագործակցելու է միջազգային իր գործընկերների հետ:

Այս ամենը դիվանագիտական լուրջ լարվածություն առաջացրեց Ամստերդամի և Բաքվի միջև հարաբերություններում և Հոլանդիայի դեսպանը Բաքվում կանչվեց արտգործնախարարություն, և այնտեղ նրան բողոքի նոտա ներկայացրին՝ ընդգծելով, որ Հոլանդիան աջակցում է մեջբերում եմ՝ «Հայաստանի ռևանշիստական ուժերին, փոխանակ նպաստի խաղաղության հաստատմանը տարածաշրջանում»:

Նշեմ, որ Ամստերդամի և Բաքվի միջև հարաբերությունները ժամանակ առ ժամանակ լարվում են, և դրա համար լինում են տարբեր առիթներ, օրինակ՝ ժամանակին, երբ Նիդերլանդների ֆինանսավորմամբ Ադրբեջանում վերանորոգվեց ուդիական գյուղերից մեկի եկեղեցին, ադրբեջանցիներն օգտվեցին այդ հնարավորությունից և վերանորոգման աշխատանքների ընթացքում եկեղեցու ճակատից ջնջեցին բոլոր հայերեն գրառումները:

Դա լրջագույն դիվանագիտական սկանդալ առաջացրեց Նիդերլանդների և Ադրբեջանի միջև հարաբերություններում: Դրանից հետո և մինչ օրս իրադարձություններն այդ հետքը թողնում են հարաբերությունների վրա»,- ասաց Արտյոմ Երկանյանը:

Հնարավո՞ր է՝ պաշտոնական Ամստերդամը ադրբեջանական ագրեսիան դատապարտող կոնկրետ քայլեր ձեռնարկի. հարցի պատասխանը դիտեք ամբողջական տեսանյութում: