Իրանի սահմանին` Արցախից ոչ հեռու, թուրք-ադրբեջանական զորավարժություններ են անցկացվում

Ադրբեջանում մեկնարկել են թուրք-ադրբեջանական հերթական զորավարժությունները: Բացման արարողությանը մասնակցելու համար Բաքու է ժամանել բարցրաստիճան թուրք գեներալների պատվիրակությունը: Որտե՞ղ են անցնում այդ զորավարժությունները և ի՞նչ նպատակ են հետապնդում:

Թեմային «Հորիզոնի» տաղավարում անդրադարձել է հեռուստամեկնաբան Արտյոմ Երկանյանը:

«Ադրբեջանի ՊՆ-ի տարածած հաղորդագրության համաձայն՝ այդ զորավարժությունների նպատակն է կատարելագործել ադրբեջանաթուրքական այդ համատեղ զինված ուժերի համագործակցությունը, փոխանակվել փորձով, և այլն:

Ադրբեջանի պաշտպանության նախարար Զաքիր Հասանովի հրավերով այսօր Բաքու է ժամանել Թուրքիայի պաշտպանության նախարար Հուլուսի Աքարը, ԶՈւ-ի գլխավոր հրամանատարը և մի շարք գեներալներ, որոնք մասնակցելու են, հետևելու են այդ զորավարժությունների ընթացքին, և նաև Հուլուսի Աքարը երկկողմ հանդիպումներ է ունենալու Բաքվում, հավանաբար, այդ թվում՝ Իլհամ Ալիևի հետ:

Այդ զորավարժություններն աննախադեպ մասշտաբային են, մասնակցում են տարբեր զորամիավորումներ: Հիշատակվում է, որ մասնակցելու են ցամաքային ինժեներական հրթիռահրետանային միավորումներ, ավիացիա, հատուկ ջոկատներ, սակրավորներ և այլն:

Զորավարժություններն անցկացվելու են տարբեր շրջաններում, այդ թվում՝ Բաքվում, Աստարայի, Ջաբրայիլի(Ջրական) և Իշմիլիի շրջանում: Հետաքրքիր է, որ թվարկածներից վերջին երեքը Իրանի սահմանին են և ոչ հեռու Արցախից, և դա, իհարկե, պատահական չէ:

Տարածված հաղորդագրության մեջ չի նշվում, թե ինչ սցենարով են իրականացվելու զորավարժանքները, որքա՞ն են տևելու, և որքա՞ն զինվորական է ներգրավված:

Ի՞նչն է շատ հետաքրքիր. այդ (Ադրբեջանի խմբ.) ՊՆ հաղորդագրության մեջ նշվում է , որ խոշոր գետի տարածքով փորձարկելու են  տանկերի համար նախատեսված պանտոնային կամուրջներ գցելու այդ աշխատանքը: Միակ հարևան պետությունը, որի հետ սահմանն անցնում է մեծ գետով, դա Իրանն է, Հայաստանից Ադրբեջանը մեծ գետ չի առանձնացնում: Այսինքն՝ ակնհայտ է, որ այս զորավարժությունները, այդ պանտոնային կամուրջները տանկերի համար արվում են՝ զգուշացնելու Իրանին:

Ի դեպ, ամիսներ առաջ Իրանը նույնպես Ադրբեջանի հետ սահմանին անցկացրել էր մեծ զորավարժանք, և նույնպես Արաքսի վրայով պանտոնային կամուրջներ գցելու այդ աշխատանքն էր փորձարկում՝ ակնարկելով, որ անհրաժեշտության դեպքում Իրանը պատրաստ է տանկեր մտցնել դեպի Ադրբեջան: Այժմ ադրբեջանցիներն այս քայլով հուշում են Թեհրանին, որ իրենք առաջինը կարող են տանկային օպերացիա իրականացնել Իրանի տարածքում»,- ասաց Արտյոմ Երկանյանը:

Պատերազմից հետո ավելի հաճախակի՞ են դարձել թուրք-ադրբեջանական զորավարժությունները, և ինչպե՞ս են դրանք մեկնաբանում Իրանում. Արտյոմ Երկանյանն անդրադարձել է նաև այս հարցերին:

Մանրամասները՝ ամբողջական հարցազրույցում: