Գյումրեցի գորգագործների աշխատանքները ցուցադրության են ներկայացվել ԱՄՆ-ում

Գյումրիի ծայրամասային՝ Բուլվարային և Մուշ թաղամասերի մեջտեղում, ամայի ու լքված տարածքը, որտեղ անգամ ճանապարհ չկա, տանում է դեպի մի կառույց, որն անգույն ու ամայի տարածքի ճիշտ հակադրությունն է։

Այստեղ միայն գույներ են ու ստեղծագործ միտք։ Գորգագործության փոքրիկ արտադրամասում գյումրեցի գորգագործ վարպետների պատկերացումներն են իրականություն դառնում։ 2020 թվականին, երբ աշխարհը համընդհանուր լոքդաունի մեջ էր, արտադրամասի բացումը շատերին է անհեթեթ թվացել։ Անորոշ իրավիճակում ներդրումներ անել միայն ռիսկային գործարարը կարող էր։ Երկու տարի է Հեղինե Ադամյանն աշխատում ու գորգեր է ստեղծում դժվարությունները հաղթահարելով։

«12 մարդ այստեղ նստեցինք աշխատելու։ Դա թվում էր մի փոքր ոչ նորմալ, որովհետև ամբողջ աշխարհում գործարաններ էին փակվում, իսկ մենք գործարան էինք ստեղծում՝ հույսով, որ չենք փակվի՝ աշխատեցինք։ Մեր վարպետների ձեռքի աշխատանքները ունիկալ են, բարձր մակարդակ ունեն»,- SHANTNEWS-ին ասել է «Կումայրի կարպետ» ընկերության հիմնադիր տնօրեն Հեղինե Ադամյանը։

12 հոգանոց աշխատակազմը 2 տարիների ընթացքում կրճատվեց։ Հիմա արտադրամասում երկու գորգագործ է աշխատում, համագործակցում են ևս երկու կարպետագործ տնայնագործների հետ։ Իսկ արտադրանքը ոչ միայն տան համար նախատեսված գորգեր ու կարպետներ են, այլև հուշանվեր-գորգեր։ Գյումրիի Սուրբ Յոթ վերք, Ամենափրկիչ եկեղեցիները, նաև հայոց այբուբենն ու Տերունական աղոթքը վարպետները թելերով նկարում են գորգերի վրա։

Հայկական գորգերի առանձնահատկությունը  գունային համադրությունն ու ազգային զարդանախշերի հյուսվածքն է։ Ամեն զարդանախշ ունի իր նշանակությունը։ Արտադրամասի գորգագործները գորգերի նախկին գործարանում են սովորել, հետո աշխատել։ Բայց Գյումրիում գորգագործության ավանդույթներն ավելի երկար տարիների պատմություն ունեն։

«Ցանկացած գյումրեցու աղջիկ հարս գնալիս անպայման օժիտ պետք է տաներ իր ձեռքով գործած գորգը կամ կարպետը։ Խորհրդային շրջանում, երբ բացվեց «Հայ գորգը», բավական շատ գորգագործներ կային քաղաքում, և գորգագործությունը համարվում էր հարգալից մասնագիտություն կնոջ համար։ Մենք ԱՄՆ-ում հիմա ցուցահանդեսի ենք մասնակցում։ Կարպետից պատրաստված մեր պայուսակները Կալիֆոռնիայում մեծ արձագանք են ստացել։ Այդ ցուցահանդեսում ներկայանալուց հետո, կարծես թե արձագանք ունենք, որ մեզ հետ պայմանագիր կապելու ցանկություն հայտնած ընկերություն կա և եթե դա հաջողի, ուրեմն մեր 12 գորգագործները կվերադառնան»,- ասել է Հեղինե Ադամյանը։

Արտադրամասի ցուցափեղկերը գրեթե դատարկ են։ Գյումրեցի վարպետների աշխատանքներն այս օրերին Ամերիկայի Միացյալ Նահանգներում են ցուցադրվում։ Հայ-ամերիկյան բիզնես ֆորումին մեծ հետաքրքրություն են առաջացրել գյումրեցի վարպետների ձեռքի աշխատանք կարպետից պատրաստված պայուսակները, բարձերը, նաև 20 գորգեր են ցուցադրության ներկայացրել։ Սա ոչ միայն հայկական գորգագործության նմուշները օվկիանոսից այն կողմ ցուցադրելու, այլև արտադրամասի համար զարգանալու, նախկին ծավալները վերականգնելու, գուցե նաև դրանք ավելացնելու հնարավորություն է։

Իսկ մինչ այդ  փոքրիկ արտադրամասում դազգահները դատարկ չեն, կտուտելու  գործիքների աղմուկը թեև պակասել է, բայց չի դադարել։ Երկու գորգագործները շարունակում են աշխատել։ Նրանց համար գորգագործությունն ավելին է, քանի բիզնեսը։ Այն հայկական մշակույթի խորհրդանիշներից մեկն է։