Վանաձորում մեկնարկել է «ԴԱՇԻՆՔ՝ հանուն կայուն և կանաչ կառավարման» ծրագիրը․ Վանաձոր և Գյումրի համայնքները հնարավորություն կունենան ստեղծելու աշխարհագրական տեղեկատվական համակարգեր

Եվրոպական միության ֆինանսավորմամբ և Լեհաստանի եվրոպական գործընկեր քաղաք Պիլայի աջակցությամբ Վանաձոր և Գյումրի համայնքներում «ԴԱՇԻՆՔ՝ հանուն կայուն և կանաչ կառավարման» (ԿԿԿ Դաշինք) ծրագրի շրջանակներում կիրականացվի «կայուն և կանաչ կառավարում»՝ մատուցվող ծառայությունների որակի բարելավմամբ:

Ծրագրի աջակցությամբ Վանաձոր և Գյումրի համայնքները հնարավորություն կունենան ստեղծելու աշխարհագրական տեղեկատվական համակարգեր: Տվյալների պահպանման և կառավարման ընդհանուր համակարգի միջոցով համայնքի կառավարման համար պատասխանատու կառույցներին հասանելի կլինի ենթակառուցվածքների, կոմունալ համակարգերի, կապի ցանցերի, տարածական պլանավորման, շրջակա միջավայրի պահպանության վերաբերյալ անհրաժեշտ ցանկացած տեղեկատվություն:

Ծրագրի բացման արարողությանը մասնակցում էին Լոռու մարզպետի տեղակալ Գոռ Ասրյանը, ՀՀ Տարածքային կառավարման և ենթակառուցվածքների նախարարության տեղական ինքնակառավարման քաղաքականության վարչության պետ Աշոտ Գիլոյանը, ԵՄ պատվիրակության համագործակցության բաժնի ղեկավարի տեղակալ Սիլյա Կասմանը, «ԿԿԿ Դաշինք» ծրագրի ղեկավար Նատալյա Լափաուրին, մարզային իշխանությունների ներկայացուցիչներ, Վանաձորի և Գյումրու համայնքապետարանների աշխատակիցներ, հյուրեր։

Գոռ Ասրյանն իր խոսքում հաջող ընթացք մաղթեց ծրագրին ՝ հատկապես կարևորելով ծրագրի արդյունքում ենթակառուցվածքների բարելավմանն ուղղված քայլերը և ավելի քան 15 աշխատատեղի ստեղծումը։

– Ծրագիրը մեծ աջակցություն է ինչպես Վանաձորի, այնպես էլ՝ խոշորացված համայնքի կազմում ընդգրկված բնակավայրերի համար։ Ենթակառուցվածքների զարգացումն իր հերթին կնպաստի բնակչության կենսամակարդակի բարձրացմանը,- իր խոսքում նշեց  մարզպետի տեղակալը։

Ծրագիրն ունի երեք հիմնական բաղադրիչ՝ քաղաքաշինություն, հանրային տրանսպորտ և աղբի կառավարում, վերամշակում։ Այն ենթադրում է կոնկրետ ոլորտներում կիրառվող գործիքակազմերի բարելավում և կահավորանք։

Վանաձորի և Գյումրու համայնքապետարանները կկարողանան իրականացնել հանրային տրանսպորտի խելացի կառավարում՝ կիրառելով նաև տոմսերի էլեկտրոնային վավերացման համակարգ:

Կներմուծվեն էկոլոգիապես մաքուր առաջին 10 էլեկտրական հանրային ավտոբուսները, որոնք հարմարեցված կլինեն նաև հենաշարժողական խնդիրներ ունեցող անձանց համար։ Համայնքներում կստեղծվի նոր տեխնոլոգիաներով պլաստիկ աղբի վերամշակման 2 հոսքագիծ, կներդրվեն ընդհանուր աղբի և աղբի տեսակավորման աղբամաններ, մամլիչներ, ավլող մեքենաներ։