Քննարկվում է Գյումրիի մոր և մանկան ավստրիական հիվանդանոցի օպտիմալացման հարցը․ ոլորտի պատասխանատուները խոսել են համընդհանուր առողջապահական ապահովագրական համակարգի ներդրումից 

Հայաստանում այսօր բուժհաստատությունների հավասարաչափ հասանելիություն չկա։ Անվճար բուժսպասարկումից օգտվում են արտոնություններ ունեցողները, իսկ նրանք, որոնք չունեն արտոնություններ, բուժծառայություններից՝ այդ թվում դժվարամատչելի, օգտվում են այնքան, որքան գրպանի պարունակությունն է թույլ տալիս։ Սա այսօր Երկխոսությունների մեդիա կենտրոնում անցկացված քննարկման ժամանակ  նշել են իրենք՝ բուժաշխատողները։

Պետպատվերի շրջանակներում բուժսպասարկումից օգտվում են սոցիալական առանձին խմբեր, որոնց թվում են մասնավորապես հաշմանդամության կարգ ունեցողները, զինվորականները, ժամկետային զինծառայողներն ու նրանց ընտանիքները։ Մյուս բոլոր դեպքերում, եթե անգամ հիվանդը բուժհաստատություն է դիմել շտապ օգնության կանչով, որոշակի ծառայությունների ու հետազոտությունների համար պետք է վճարի։ Արդյունքում ստացվում է, որ բուժծառայությունները հասանելի են ոչ բոլորին։

«Ունենք լիքը խնդիրներ հասանելիության առումով։ Կան խմբեր, որոնց համար առողջապահությունը հասանելի է, և կան խմբեր, որոնց հասանելի է այնքանով, որքանով իրենց գրպանը թույլ կտա։ Կարծում եմ, երբ ապահովագրական համակարգը ներդրվեց, կլինեն տարբեր փաթեթներ, ըստ նախնական մուծումների կամ աշխատավարձից հետպահվող գումարների, կլինեն ծառայություններ, որոնք չեն էլ մտնի ապահովագրության մեջ։ Կլինեն նաև ծրագրեր, որոնք կընդգրկվեն ապահովագրական փաթեթներում»,- ասել է «Գյումրի» ԲԿ փոխտնօրեն Արմեն Խաչատրյանը։

Կառավարության որոշմամբ հաստատվել է բժշկական ապահովագրության հայեցակարգը, որը ենթադրում է, որ փուլային եղանակով ապահովագրությունը պետք է ներդրվի մինչև 2027 թվականը։ Մինչ այդ հստակեցվելու են, թե որ փուլում, ում համար է ապահովագրությունը լինելու պարտադիր, ինչ բուժծառայություններ ու հետազոտություններ են ընդգրկվելու ապահովագրական փաթեթներում, և, ի վերջո ինչքան է կազմելու ապահովագրավճարը։

Իսկ երբ հասանելի դառնան գրեթե բոլոր բուժծառայություններն, արդեն բուժառուն ինքն է որոշելու, թե դրանք որ բուժհաստատությունում է իրացնելու։ Այսինքն՝ ապահովագրության ներդրումը պահանջում է նաև որակյալ բուժսպասարկում։ Այստեղ առաջ է գալիս Գյումրիի բուժհաստատությունների վերազինման ու մասնագետներով համալրման խնդիրը։

Գյումրիի պոլիկլինիկաներում և բուժհաստատություններում մասնագետների, նաև տարբեր հետազոտությունների անցկացման խնդիր կա, մասնավորապես, մանկական հիվանդանոցում շատ ծառայություններ չեն իրականացվում և հիվանդ երեխաներին ուղեգրում են Երևանի բուժհաստատություններ։ Շիրակի մարզպետարանի առողջապահության վարչության պատասխանատուն՝ Լեյլի Ասլանյանը, նշում է՝ հարցի լուծումը նորից օպտիմալացումն է։

«Քննարկում ենք հաջորդ փուլում մանկական ավստրիական հիվանդանոցի օպտիմալացման խնդիրը։ Այնտեղ կա մանկաբարձագինեկոլոգիական բաժանմունք, և «Գյումրի» ԲԿ-ում կա մանկաբարձագինեկոլոգիական բաժանմունք։ Բացի դրանից, ունենք շատ լավ մանկական բաժանմունք և օպտիմալացման նպատակը նաև նեղ մասնագիտական ծառայությունների ներդնելն է։ Խնդիրը դրել ենք երկար տարիներ։ Երբ տնօրեններ էին փոխվում, ցանկացած տնօրենի հետ մենք շատ խիստ այդ հարցը դրել ենք, որ պետք է ունենանք մանկական ծառայությունների առաջընթաց, բայց մենք մանկական  ծառայությունների առաջընթաց չունենք»,- ասել է Շիրակի մարզպետարանի առողջապահության վարչության պետի պարտականությունները կատարող Լեյլի Ասլանյանը։

Մոր ու մանկան ավստրիական հիվանդանոցը Գյումրի բժշկական կենտրոնին միավորելու վերջնական որոշում դեռ չկա։ Հարցը  քննարկումների փուլում է։ Ըստ Լեյլի Ասլանյանի, մանկական հիվանդանոցում բուժծառայությունների զարգացման և ավելացման հարցը վաղուց է քննարկվում, ու քանի որ դա տեղի չի ունեցել, որոշել են միավորել բժշկական կենտրոնին, որտեղ հագեցվածությունը շատ ավելին է։

Մոր ու մանկան ավստրիական հիվանդանոցի շենքն, ըստ պատասխանատուի, պահպանվելու է։ Օպտիմալացված մյուս հիվանդանոցների նման վարչական որոշ աշխատողների կրճատումներ են հնարավոր։ Ստացվելու է, որ Գյումրիում կգործի միայն մեկ բուժհաստատություն՝ «Գյումրի բժշկակական կենտրոն» անվանումով և արդեն օպտիմալացված հիվանդանոցների անունները կրող բաժանմունքներով։ Հիշեցնենք, մի քանի փուլով բժշկական կենտրոնին միացան Գյումրիի ծննդատունը, պաթոլոգաանատոմիական լաբորատորիան, ուռուցքաբանական դիսպանսերը և ինֆեկցիոն հիվանդանոցը։