Ալիևը մեղադրում է Ֆրանսիային ցեղասպանություն գործելու մեջ. ինչո՞վ կպատասխանի Փարիզը

Իլհամ Ալիևը ելույթ է ունեցել «Չմիավորված պետությունների շարժման կոնտակտային խմբի» գագաթնաժողովին, որն իր աշխատանքը սկսել է այսօր,  Բաքվում: Ադրբեջանի նախագահն ամբիոնն օգտագործել է՝ անհեթեթ մեղադրանքներ հնչեցնելու համար ոչ միայն Հայաստանի, այլև Ֆրանսիայի հասցեին: Նա մեղադրել է Ֆրանսիային ոչ ավելի, ոչ պակաս՝ ցեղասպանություն գործելու մեջ: Սա առաջին դեպքը չէ, երբ Ալիևը նման մեղադրանքներ է ուղղում Ֆրանսիայի դեմ: Եվ ի՞նչն է Ալիևը Ֆրանսիայի գործողություններում ցեղասպանություն համարում:

Թեմային հետևել է Արտյոմ Երկանյանն ու «Հորիզոնի» տաղավարում զրուցել հեռուստամեկնաբան Վահագն Հակոբյանի հետ.

«Չնայած՝ չմիավորված երկրների շարժման այս կոնֆերանսը նվիրված էր Քովիդ 19-ի հաղթահարման խնդիրներին, Իլհամ Ալիևը գրեթե իր ողջ ելույթը նվիրել է տարբեր անհեթեթ մեղադրանքներին՝ Հայաստանի, Ֆրանսիայի և ՄԱԿ-ի հասցեին:

Ֆրանսիայի մասին խոսելով՝ նա ասել է, որ այդ երկիրը նեոգաղութացման փորձեր է անում և հիշեցրել է այդ երկրի պատմության «մութ» էջերը՝ մեղադրելով ֆրանսիայի ժողովրդին Աֆրիկայում ցեղասպանություն գործելու մեջ:

Ալիևը ֆրանսիացիներին կոչ է արել ներողություն խնդրել Ալժիրի ժողովրդից և խոստովանել ու ճանաչել, որ ցեղասպանություն են գործել Աֆրիկայի հյուսիսում:

Հավանաբար, նա նկատի ունի անցած դարի կեսերին Ալժիրում անկախության համար պատերազմի շրջանում տեղի ունեցած մարդկային զոհերը, բայց հիշեցնեմ, որ այդ շրջանում մարդկության դեմ հանցագործություններ են կատարել ոչ միայն առանձին ֆրանսիացի գեներալներ և զինվորականներ, այլև տեղի արաբ ապստամբների առաջնորդները ևս բազմաթիվ անմեղ քաղաքացիական ֆրանսիացիների են սպանել, ինչի վերաբերյալ կոնկրետ վկայություններ կան, բայց կարևորը դա չէ, այլ այն, թե ինչո՞ւ է հենց այսօր Իլհամ Ալիևը որոշում, որ իրավունք ունի Ֆրանսիային նման մեղադրանքներ ուղղելու:

Պարզ է, որ դա պատասխանն է Ֆրանսիայի կողմից Ադրբեջանի պահվածքին ադեկվատ գնահատականի. Ֆրանսիայի նախագահը մի քանի անգամ ընդգծել է, որ Ադրբեջանի արածն ագրեսիա է Հայաստանի դեմ, հայտարարել է, որ անհրաժեշտ է հարգել Արցախում ապրող հայերի իրավունքները, դե իսկ Ֆրանսիայի խորհրդարանի երկու պալատներն անգամ կոչ են արել ճանաչել Արցախի պետականությունը»,- ասաց Արտյոմ Երկանյանը:

Որքանո՞վ են արդյունավետ Ալիևի նման հարձակողական քայլերը. Ալիևը գագաթնաժողովում մեղադրանքներ է ուղղել նաև ՄԱԿ-ին: ՄԱԿ-ից ինչո՞ւ է դժգոհ:

Մանրամասները՝ ամբողջական հարցազրույցում: