Տեսչական մարմինը կայացվող որոշումների չկատարման փաստն արձանագրելու դեպքում պետք է դիմի լիազորված մարմին. նախագիծ

Առաջարկվում է սահմանել, որ Տեսչական մարմնի տված կարգադրագրերի, եզրակացությունների եւ կայացվող որոշումների՝ դրանցով սահմանված ժամկետում չկատարման դեպքում, այն ստուգվող սուբյեկտի կողմից, որի սնանկ ճանաչվելու մասին վճիռն օրինական ուժի մեջ է մտել կամ սկսվել է լուծարման գործընթաց եւ այն պարագայում, երբ դրա արդյունքում առկա է քաղաքացիների կյանքին, առողջությանը սպառնացող անմիջական վտանգ, ինչպես նաեւ բնական կամ տեխնածին բնույթի արտակարգ իրավիճակի առաջացման վտանգ, Տեսչական մարմինը կարգադրագրերի, եզրակացությունների եւ կայացվող որոշումների՝ չկատարման փաստն արձանագրելու պահից երեք աշխատանքային օրվա ընթացքում պետք է դիմի լիազորված մարմին՝ վերջինիս ներկայացնելով առաջարկություն Տեսչական մարմնի կողմից իրականացված վերահսկողական գործողությունների արդյունքում արձանագրված եւ սահմանված ժամկետում չվերացված խախտումները վերացնելու վերաբերյալ:

Այս մասին հայտնել է ՀՀ վարչապետի աշխատակազմի տեսչական մարմինների աշխատանքների համակարգման գրասենյակի ղեկավարի պարտականությունները կատարող Արմեն Դանիելյանը՝ Ազգային ժողովի՝ մայիսի 2-ի նիստում քննարկման ներկայացնելով Կառավարության հեղինակած ««Սնանկության մասին» օրենքում փոփոխություններ եւ լրացումներ կատարելու մասին», ««Հրդեհային անվտանգության մասին» օրենքում լրացումներ կատարելու մասին» եւ ««Տեխնիկական անվտանգության ապահովման պետական կարգավորման մասին» օրենքում լրացումներ կատարելու մասին» օրենքների նախագծերի փաթեթը:

«Լիազորված մարմինը սահմանված առաջարկությունը ստանալու պահից՝ հինգ աշխատանքային օրվա ընթացքում, Տեսչական մարմնին պետք է ներկայացնի տեղեկություն՝ Տեսչական մարմնի կողմից իրականացված վերահսկողական գործողությունների արդյունքում արձանագրված եւ սահմանված ժամկետում չվերացված խախտումներն իր կողմից վերացնելու հնարավորության կամ անհնարինության վերաբերյալ, խախտումներն իր կողմից վերացնելու հնարավորության պարագայում ներկայացնելով համապատասխան գործողությունների, դրանց կատարման համար անհրաժեշտ ժամկետների, ինչպես նաեւ դրանց կատարման նախնական ծախսերի հաշվարկի, իսկ անհնարինության պարագայում՝ անհնարինությունը հիմնավորող փաստերի վերաբերյալ: Լիազորված մարմինը սահմանված գործողությունների կատարման ավարտից հետո՝ երեք աշխատանքային օրվա ընթացքում, Տեսչական մարմնին ներկայացնում է տեղեկություն՝ կատարված գործողությունների արդյունքների վերաբերյալ, իսկ ստուգվող սուբյեկտին ներկայացնում է արձանագրված խախտումների վերացման արդյունքում կատարված ֆինանսական ծախսերի փոխհատուցման պահանջ»,- նշել է հիմնական զեկուցող Արմեն Դանիելյանը:

Օրենքի նախագծերի փաթեթով առաջարկվում է ամրագրել, որ փոխհատուցման պահանջը ստուգվող սուբյեկտի կողմից մեկամսյա ժամկետում չկատարելու դեպքում գանձումը պետք է իրականացնել դատական կարգով:

Ամփոփելով՝ զեկուցողը նշել է նաեւ, որ օրենքով սահմանվում է՝ միայն ՀՀ վարչապետի համաձայնության առկայության դեպքում սնանկության գործընթացում գտնվող կազմակերպություններում իրականացնել տեխնիկական եւ հրդեհային անվտանգության, ինչպես նաեւ բնապահպանության ոլորտներում վերահսկողություն, ու առաջարկել ամրագրել, որ մորատորիումը չպետք է տարածվի «Հրդեհային անվտանգության մասին» եւ «Տեխնիկական անվտանգության ապահովման պետական կարգավորման մասին» օրենքներով սահմանված՝ արձանագրված խախտումների վերացման արդյունքում լիազոր մարմնի կողմից կատարված ֆինանսական ծախսերի փոխհատուցման պահանջի վրա:

«Քաղաքացիական պայմանագիր» խմբակցության պատգամավոր Մարիամ Պողոսյանը հետաքրքրվել է՝ օրենքը գործո՞ւմ է սնանկ չճանաչված ընկերությունների վրա, եթե ոչ, ապա ինչո՞ւ: Ի պատասխան՝ Արմեն Դանիելյանը տեղեկացրել է, որ որեւէ սահմանափակում չկա, եթե, ըստ Տեսչական մարմնի, կա սպառնացող վտանգ, որը պետք է վերացվի, ու կազմակերպությունը դա չի անում, ապա դրա իրավասությունն անցնում է լիազոր մարմնին:

Հարակից զեկուցող, Պետական-իրավական հարցերի մշտական հանձնաժողովի անդամ Ալխաս Ղազարյանը խորհրդարանականներին հայտնել է, որ նախագծերի փաթեթն ամբողջությամբ քննարկվել է հանձնաժողովում ու ստացել դրական եզրակացություն:

Պատգամավորը կոչ է արել կողմ քվեարկել: