Գյումրիի ԲՈՒՀ-երում դիմորդների թիվն ավելացել է

Գյումրիի պետական ԲՈՒՀ-երն այս տարի, նախորդի համեմատ, ավելի շատ դիմորդներ ունեն։ Սա ցույց են տալիս դիմում-հայտերի ընդունման արդյունքները։

Գյումրիի պետական ԲՈՒՀ-երի շարքում ամենաշատ հայտագրած մասնագիտությունները, ըստ այդմ, նաև ամենաշատ հատկացված տեղերը Շիրակի պետական համալսարանն ունի։ Բայց արդեն որերորդ տարին դիմորդների թիվն ավելի պակաս է, քան հատկացված տեղերը։ 421 անվճար ու վճարովի տեղեր ունի համալսարանը, իսկ դիմորդների թիվը 103-ով պակաս է, սակայն այս ցուցանիշն աճ է գրանցել  նախորդ տարվա համեմատ։

«Շիրակի պետական համալսարանն ունեցավ 318 դիմորդ։ Անցյալ տարի մոտ 40-ով քիչ էր դիմորդների թիվը։ Ունենք մասնագիտություններ, որտեղ ունենք մրցույթ։ Ցավոք սրտի ունենք մասնագիտություններ, որտեղ մեր ուզածից քիչ էր դիմորդների թիվը, բայց ընդհանուր առմամբ արդյունքները գոհացուցիչ են»,- SHANTNEWS-ին ասել է ՇՊՀ ռեկտոր Երվանդ Սերոբյանը։

Շիրակի պետական համալսարանում պահանջված մասնագիտությունների ցանկն անփոփոխ է։ Դիմորդները նախընտրում են անգլերեն-հայերեն թարգմանչական գործ, նաև հոգեբանություն բաժինները։ Իսկ օրինակ, մաթեմատիկայի բաժնում մրցույթ չի լինելու։ Այստեղ դիմորդների և հատկացված տեղերի քանակը հավասար է։ Սա մաթեմատիկայի բաժնի համար լավ ցուցանիշ է համարվում, որին նպաստել է մանկավարժական մասնագիտությունների համար նախատեսված պետական կրթաթոշակի ծրագիրը, որը գործելու է նոր ուսումնական տարվանից։

Հայաստանի պետական տնտեսագիտական համալսարանի Գյումրիի մասնաճյուղում պետական կրթաթոշակի ծրագիրը չի գործելու։ Այդուհանդերձ, Գյումրիի մասնաճյուղում բոլոր 4 մասնագիտություններում ընդունելությունը մրցութային է լինելու։ Հատկացված 135 տեղի համար 156 դիմորդ ունեն։

«Ամենամեծ մրցույթը մեր համալսարանում կառավարում բաժնում է։ Անցած տարի ֆինանսներ բաժնում էր։ Մրցույթի ծավալն աճել է նաև մյուս մասնագիտություններում։ Պետական կրթաթոշակի ծրագիրը անհավասար պայմաններ է ստեղծում մասնագիտությունների միջև։ Նման տարբերակված մոտեցումներից առաջ պետք է քննարկվեր բոլոր շահառուների հետ։ Մեզ հետ էլ պետք է քննարկվեր, մենք էլ մեր փաստարկները պետք է ներկայացնեինք»,- SHANTNEWS-ին ասել է ՀՊՏՀ Գյումրիի մասնաճյուղի տնօրեն Կարեն Պետրոսյանը։

Վերջին 9 տարիների տվյալներով նաև Ազգային պոլիտեխնիկական համալսարանի Գյումրիի մասնաճյուղում այս տարվա դիմորդների թիվն ամենամեծն է։ 6 մասնագիտություններ են հայտարարագրել, որոնց 101 տեղ է հատկացված, իսկ դիմորդների թիվը 97 է՝ ընդամենը 4-ով պակաս հատկացված տեղերի թվից։ Ամենապահանջվածը Գյումրիի պոլիտեխնիկական ինստիտուտում տեղեկատվական տեխնոլոգիաների բաժինն է։

«Ամենաշատ դիմորդ ունենք տեղեկատվական տեխնոլոգիաների բաժնում։ Երևանի կրթահամալիրում էլ է նմանատիպ տենդենցը պահպանվում։ Ցավոք, ամենաքիչը ունենք «Շինարարություն» մասնագիտությունում։ Սա կարևոր, առանցքային մասնագիտություն է Գյումրիի մասնաճյուղում։ Բայց, ցավոք, դիմորդները գնում են մոդայիկ մասնագիտությունների հետևից»,- SHANTNEWS-ին ասել է ՀԱՊՀ Գյումրիի մասնաճյուղի տնօրենի ժ/պ Արթուր Կոստանդյանը։

Շինարարական բաժնում անգամ անվճար հատկացված երկու տեղերը չեն համալրվելու՝ ընդամենը մեկ դիմորդ ունեն։ Ընդհանուր առմամբ, Գյումրիի պետական բոււհերի բնագիտամաթեմատիկական բաժիններում այս տարի անվճար տեղերի քանակը ավելացել է։ Այս տարի էլ շատ բաժիններ ընդունվելու համար դիմորդներին բավարար կլինի անցողիկ շեմը հաղթահարել։ Իսկ տարկետման իրավունքը, որը ներդրվեց այս տարի, Գյումրիի ԲՈՒՀ-երին չի վերաբերում։ Թե որ ԲՈՒՀ-երում պետք է կիրառվի տարկետման իրավունքը, ընտրվել է հաստատությունների վարկանիշավորմամբ և պետության համար ռազմավարական նշանակության բաժիններում կրթություն ապահովելու հնարավորությամբ։