Մշակույթի նախարարն ամփոփում է պաշտոնավարման 100 օրը

ՀՀ մշակույթի նախարար Լիլիթ Մակունցը, աշխատանքային 100 օրն ամփոփելիս, հայտնեց, որ նախարարությունը մեծ թվով ու ծավալով աշխատանքներ է իրականացրել: Նա առանձնացրեց այդ աշխատանքներից 15-ը:

Մակունցի պաշտոնավարման օրոք 7 կառույց ստացել է նորահայտ հուշարձանի կարգավիճակ, Շիրակի մարզի երկրագիտական թանգարանին 30 տարի հետո նոր շենք է տրամադրվել, վերանայվել, այն է՝ նվազել է դահլիճների վարձակալման վճարը, դպրոցականների՝ մշակութային հաստատություններ այցելելու աբոնեմենտային համակարգն է մշակվել, որը կներդրվի հոկտեմբերին: Նախարարը հայտնեց, որ դարձյալ հոկտեմբերից կսկսի գործել կրթական և մշակութային հաստատությունների կապն ապահովող դրամաշնորհային «Քո արվեստը դպրոցում» ծրագիրը, նաև մշակվել է ՀՀ մշակույթի նախարարություն ներկայացվող նախագծերի նոր հայտաձև:

Մակունցն ասաց, որ լրամշակվել է կինոնախագծերի մրցույթների անցկացման և ֆինանսավորման կանոնակարգը, բացի այդ, «Հայֆիլմ» կինոստուդիայի ժառանգությունը փոխանցվել է իրավահաջորդ Ազգային կինոկենտրոնին, «Ստեղծարար Հայաստան»-ի հետ համաձայնագիր է կնքվել, ստեղծվել է գրականության հանրահռչակման բաժին Հայաստանի ազգային գրադարանում, միջամտություն է ցուցաբերվել և կանխվել է թվով 32 հուշարձանների վտանգումը, այդ թվում՝ դադարեցվել են «Հին Երևան»-ի տարածքում իրականացվող անօրինական շինաշխատանքները, Արամի 32 հասցեում կանխվել են հուշարձան-շենքի փոփոխման աշխատանքները և չեղյալ հայտարարվել 2017թ. տրված թույլտվությունը, կանխվել են Լոռու մարզում պահպանական գոտուց ավազահանման դեպքերը, դադարեցվել և իրավապահ մարմիններին են ներկայացվել Խնձորեսկում շինարարական աշխատանքները:

Նախարարը հայտնեց, որ նախատեսվել է հատկացնել 30 մլն դրամ՝ երկրաշարժի 30-րդ տարելիցին ընդառաջ Գյումրու Ամենափրկիչ եկեղեցու վերջնական նորոգումն իրականացնելու և դեկտեմբերի 7-ին այն բացելու համար: Նա նշեց, որ այս նախաձեռնությունը հնարավոր եղավ իրականացնել կրկին խնայողությունների հաշվին, քանի որ բավական ժամանակ էր աշխատանքներն ավարտին հասցնել չէր հաջողվում: Մակունցը տեղեկացրեց, որ պայմանավորվածություն է ձեռք բերվել Գյումրիում ստեղծարար կենտրոն ստեղծելու շուրջ. այն, ըստ նախարարի, առաջիկա երեք տարիների ամենամեծ նախագծերից է լինելու, հովանավորները սփյուռքահայ եղբայրներ են: Նախարարը նշեց նաև, որ մշակվել են առաջիկա 5 տարիների համար Մշակույթի նախարարության ռազմավարության գերակա ուղղությունները, նաև մշակվել է նոր կազմակերպական կառուցվածքի նախագիծը:

Մակունցը տեղեկացրեց, որ աշխատանքներ են տարվում՝ կապված նաև օրենսդրական դաշտի կարգավորման հետ, պատրաստվում են Ֆրանկոֆոնիայի շրջանակներում միջոցառումների կազմակերպմանը: Նախարարն ասաց նաև, որ առաջիկա ծրագրերի մեջ է մտնում Նյու Յորքի մետրոպոլիտենում կայանալիք «Հայկական հուշարձանների և նմուշների ներկայացմանը» պատրաստվելը: