Լիլիթ Մակունցը՝ նախարարությունում կոռուպցիոն ռիսկերի ու չարաշահումների մասին

ՀՀ մշակույթի նախարար Լիլիթ Մակունցից լրագրողները հետաքրքրվեցին՝ իր պաշտոնավարման 100 օրվա ընթացքում ինչ կոռուպցիոն բացահայտումներ են եղել: Նախարարը հիշեցրեց՝ մշակույթի նախարարի պարտականությունները ստանձնելով՝ իր առաջ իբրև առաջին գերակա խնդիր դրել է չարաշահումների բացառումը: Մակունցն ընդգծեց՝ կան համապատասխան գերատեսչություններ՝ կառավարությունում ու կառավարությունից դուրս, որոնք զբաղվում են չարաշահումների բացահայտմամբ, կոռուպցիոն ռիսկերի գնահատմամբ և համապատասխան իրավաչափ գործողություններ ձեռնարկելով, պատասխանատվության ենթարկելով, և բոլոր այդ գերատեսչությունները, նախարարի գնահատմամբ, իրենց աշխատանքը կատարում են պրոֆեսիոնալ կերպով:

Նախարարը նշեց, որ իրենք կապի մեջ են այդ գերատեսչությունների հետ ու մշտապես ահազանգում, տեղյակ են պահում, որ դիմել են համապատասխան գերատեսչությունների, որ նրանք գործողություններ իրականացնեն և միջոցներ ձեռնարկեն՝ արձագանքելով մամուլում շրջանառվող բացահայտումներին:

«Եթե մենք սկսենք զբաղվել բացառապես կոռուպցիոն ռիսկերի, չարաշահումների բացահայտմամբ, պարզապես ի վիճակի չենք լինի կատարել այն աշխատանքները, որոնք ուզում ենք անել՝ միտված Մշակույթի նախարարության առողջացման գործընթացին, տարբեր ոլորտների զարգացմանը, այդ ոլորտում արվեստագետների կարիքների բավարարմանը և այլն, սակայն սա չի նշանակում, որ այն, ինչին բախվում ենք աշխատանքներ իրականացնելու ընթացքում, անտեսում ենք: Ո՛չ, այն ահազանգերը, որ ստանում ենք, և խնդիրները, որ ներկայացվում են, դրանց մենք ահազանգում ենք»,- ասաց նա:

Մակունցը նաև կոնկրետ օրինակներ նշեց: Նա ասաց, որ իր մոտ հայտնվել էր մի գրություն՝ փաստաթուղթ, համաձայն որի՝ Մշակույթի նախարարության համապատասխան ՊՈԱԿ-ը՝ փորձագիտական կենտրոնը, Սարյանի կտավների հետ կապված եզրակացություն էր տվել, որ դրանք բնօրինակ են, և որ այնտեղ դրված է Ռուզան Սարյանի ստորագրությունը՝ համապատասխան կնիքով, սակայն եղել է նաև մեկ այլ փաստաթուղթ, ըստ որի՝ Ռուզան Սարյանը տեղեկացնում էր, որ ոչ միայն կտավներն են կեղծ, այլև իր ստորագրությունը: Նախարարը տեղեկացրեց, որ այս գրությունից հետո անմիջապես փաթեթն ուղարկել են դատախազություն, գործին ընթացքը տրված է և հարցաքննություններ են անցկացվում:

Չարաշահումների ու կոռուպցիոն ռիսկերի բացահայտման հարցում նախարարությանն օգնության է եկել նաև լրագրողական հետաքննությունը:

«Քանի որ այդ ժամանակը և ռեսուրսը չկա, քանի որ մենք նախարարությունում ընդամենը երկու աուդիտոր ունենք և 70 ՊՈԱԿ, ֆիզիկապես հնարավոր չէ ողջ աշխատանքը հավուր պատշաճի իրականացնել, երբեմն աուդիտորական աշխատանքը տևում է ամիսներ, ուստի մենք օգտվեցինք մամուլի հրապարակումներից՝ այն հոդվածները, որտեղ կային կոնկրետ թվեր, փաստեր, որոնցով կարելի էր տալ իրավական ձևակերպում, հավաքել ենք, ուղարկել դատախազություն՝ ընթացք տալու համար: Բոլոր այն հուշարձանների և հուշարձանային գոտիների դեպքում, որոնց առնչությամբ տեղի են ունենում օրենքի խախտումներ, դրանց ևս ընթացք է տրվում, գործերը դատախազությունում են»,- հայտնեց նա: