Միջազգային դերակատարներն ու Լեմկինի անվան Ցեղասպանության կանխարգելման ինստիտուտն ահազանգում են 4000-ամյա քաղաքակրթության վերացման մասին

ԱՄՆ սենատորն ու Ֆրանսիայի նախագահը, դատապարտելով Ադրբեջանին, հայտնել են, որ հայ ժողովրդի կողքին են լինելու, նշել, որ վերահաստատում են իրենց աջակցությունը Հայաստանի տարածքային ամբողջականությանը:

«Ո՞ւմ է հետաքրքրում, որ 4000-ամյա քաղաքակրթությունն ընդմիշտ վերանում է». դատապարտող հայտարությամբ է հանդես եկել Ցեղասպանության կանխարգելման Լեմկինի ինստիտուտը:

Երեկ ԱՄՆ սենատոր Գերի Փիթերսը դեսպան Քվինի հետ այցելեց Վայոց Ձոր և Սյունիքի մարզեր։ Նրանք տեղի պաշտոնյաների և ԵՄ դիտորդական առաքելության ներկայացուցիչների հետ քննարկել են Լեռնային Ղարաբաղի հումանիտար ճգնաժամի ազդեցությունը մարզերում։ Սենատոր Փիթերսը մտահոգություն է հայտնել Լեռնային Ղարաբաղում տիրող խիստ ծանր հումանիտար իրավիճակի վերաբերյալ և ընդգծել այդքան անհրաժեշտ հումանիտար օգնությունը, այդ թվում՝ սնունդ, դեղորայք և այլ էական պաշարներ տեղ հասցնելու անհրաժեշտությունը։ Գերի Փիթերսը նաև վերահաստատել է Միացյալ Նահանգների աջակցությունը Հայաստանի տարածքային ամբողջականությանը:

Ֆրանսիայի նախագահ Էմանուել Մակրոնը BFM հեռուստաընկերությանը տված հարցազրույցում ասել է, որ Ֆրանսիան շատ աչալուրջ է Հայաստանի տարածքային ամբողջականությանը վերաբերող հարցերում և սատարելու է հայ ժողովրդին։

«Ֆրանսիան այսօր շատ զգոն է Հայաստանի տարածքային ամբողջականության հարցում, որովհետև հենց դա է վտանգված։ Այժմ կա Ռուսաստան, որը մեղսակից է Ադրբեջանին, կա Թուրքիա, որը միշտ աջակցել է Ադրբեջանի գործողություններին: Ֆրանսիան կանգնած է հայ ժողովրդի և միջազգային իրավունքի կողքին: Մենք նաև քաղաքական աջակցություն ենք տրամադրում, որպեսզի հնարավոր լինի բանակցությունների միջոցով հասնել տևական խաղաղության»,-ասել է Ֆրամսիայի նախագահ Էմանուել Մակրոնը:

Ցեղասպանության կանխարգելման Լեմկինի ինստիտուտն X-ի իր էջում դատապարտել է համաշխարհային ղեկավարների լռությունը Լեռնային Ղարաբաղի իրադարձությունների հարցում՝ ընդգծելով, Լեմկինի ինստիտուտը երբեք թույլ չի տա, որ այսօրվա համաշխարհային առաջնորդները մոռանան իրենց մեղսակցությունն Արցախում 4000-ամյա ժողովրդին ու քաղաքակրթությանը ոչնչացնելու հարցում։

«Չկա «ցեղասպանության կանխարգելում» ԱՄՆ-ում, ԵՄ-ում, ՆԱՏՕ-ում կամ ՄԱԿ-ում, չնայած բոլոր դասընթացներին, սիմպոզիումներին, գրքերին և ելույթներին: Մենք հույս ունեինք, որ այս մեկ օրինակում՝ Ցեղասպանության կանխարգելման այս կատարյալ փոթորիկում, կգտնվի լուրջ իշխանություն ունեցող խիզախ ձայն, որը ճիշտ քայլ կանի: Բայց այսօր մենք աշխարհում իրական առաջնորդներ չունենք։ Նրանք չեն վախենում, որ մի օր կհայտնվեն այս սարսափի թիրախում, ուստի դա նրանց այնքան էլ չի հետաքրքրում: Նրանք քնում են ինքնագոհ հարմարավետության մեջ: Հասարակ մարդիկ չեն շահում ցեղասպանությունից։ Նույնիսկ եթե նրանց հանցագործ ղեկավարներն ասում են, որ շահում են, այդպես չէ: Ո՞ւմ է հետաքրքրում, որ 4000-ամյա քաղաքակրթությունն ընդմիշտ վերանում է: Մենք բոլորս պետք է միավորվենք այս հավասարումը փոխելու համար, և դա պետք է անենք արագ»,-ասվում է դատապարտող գրառման մեջ:

Այսօր Թուրքիայում սկսել են հետապնդել 3 օր առաջ ԼՂ-ում Ադրբեջանի ցեղասպան քաղաքականության մասին բարձրաձայնած մտավորականներին:

Մանրամասները՝ ռեպորտաժում: