Սեֆիլյանի և մյուսների գործով ամբաստանյալները դատապարտվել են երկուսից տասուկես տարվա ազատազրկման

«Հիմնադիր խորհրդարանի» նախագահ Ժիրայր Սեֆիլյանի և մյուսների դատավարությունը Երևանի ընդհանուր իրավասության դատարանի Շենգավիթի նստավայրում ավարտվեց:
Ժիրայր Սեֆիլյանը դատապարտվեց տասը տարի հինգ ամսվա ազատազրկման: Դատարանն ապացուցված համարեց այն մեղադրանքը, որ Սեֆիլյանը 2015 թվականի ապրիլի 24-ին 200-300 հոգանոց կազմակերպված խմբերի միջոցով մայրաքաղաքում մտադիր է եղել զանգվածային անկարգություններ կազմակերպել և կատարել է դրանց նախապատրաստությանն ուղղված գործողություններ: Բացի խմբեր կազմելուց, Սեֆիլյանն ու աջակիցները ձեռք են բերել նաև զենք և ռազմամթերք, մտադիր են եղել գրավել ռազմավարական նշանակության շենքեր, մասնավորպես՝ Երևանի հեռուստաաշտարակը և Նուբարաշենի զորամասը, նաև նախատեսել են, իշխանության ներկայացուցչին զինված դիմադրություն ցույց տալով, բռնություն գործադրելով, գույք ոչնչացնելով, իշխանության ներկայացուցիչներին որոշակի գործողությունների պարտադրել:
Դատաքննության ընթացքում Ժիրայր Սեֆիլյանն այդպես էլ չկարողացավ ոչ ցուցմունք տալ, ոչ էլ հանդես գալ պաշտպանական ճառով, քանի որ նա մտադիր չէր ոտքի կանգնած խոսել, դատավորն էլ արգելեց անհարգալից վերաբերվել դատարանի նկամամբ: Սեֆիլյանն անգամ վերջին խոսքը չկարողացավ ասել՝ նույն հիմնավորմամբ: Այդ խոսքը կարդաց նրա շահերի պաշտպանը:
Դատավճիռը հրապարակելիս Սեֆիլյանը հայտարարել է, որ «սա ոչ թե դատավարություն է, այլ հաշվեհարդար, պատվիրված քաղաքական հալածանք և բռնություն, թատերական բեմականացում ու ֆարս, որտեղ այսպես կոչված մեղադրող կողմի հրապարակած դատարկաբանությունը պարզապես վատ հորինված հեքիաթ է, որը դատավորի դերակատարմամբ հանդես եկող անձն իր ջղաձիգ և բացահայտ ապօրինի գործողություններով փորձում է ամեն գնով ներկայացնել որպես իրականություն»:

Ամբաստանյալ Գևորգ Սաֆարյանը դատապարտվեց 5.5 տարվա ազատազրկման: Դատավորը հաշվարկեց մեկ այլ՝ «տոնածառի» գործով Սաֆարյանի՝ արդեն կրած երկու տարվա պատժաչափը: Այսինքն՝ այսօր Գևորգ Սաֆարյանը դատապարտվեց 3.5 տարվա ազատազրկման: Հիշեցնենք՝ խոսքն այն միջադեպի մասին է, երբ Գևորգ Սաֆարյանը փորձել էր տոնածառ տեղադրել Ազատության հրապարակում, իսկ ոստիկանը խոչընդոտել էր:

Այս գործով անցնող մյուս մեղադրյալներ Սասունիկ Կիրակոսյանը և Ներսես Պողոսյանը դատապարտվեցին 3.5-ական, Գալուստ Գրիգորյանը և Հրայր Թոփչյանն էլ՝ 3-ական տարվա ազատազրկման:

Ամենամեղմ՝ 2 տարվա ազատազրկման դատավճիռը մեղադրյալ Հովհաննես Պետրոսյանինն էր: Նա միակն էր, ով դատարանում ոտքի էր կանգնում, երբ դատավորը ներս էր մտնում: Նա է դատարանում Սեֆիլյանի դեմ ցուցմունք տվել: Հովհաննես Պետրոսյանը ընդամենը երկու ամսից ազատ կարձակվի:

Պետրոսյանն իր ցուցմունքում ասել է, որ «Հիմնադիր խորհրդարանի» առաջնորդի հետ ծանոթացել է Ֆեյսբուքով ու ներգրարվվել զինված գործողությունների նախապատրաստության մեջ:

Մյուս ամբաստանյալները և նրանց պաշտպանները ամբողջ դատաքննության ընթացքում պնդել են, որ գործը շինծու է, բարձրաձայնել են, որ ճնշումների են ենթարկվել քննիչների կողմից, իրավապահները փորձել են ցուցմունքներ կորզել Սեֆիլյանի դեմ, ոմանք հայտարարել են, որ անձամբ չեն ճանաչում Սեֆիլյանին, միայն հեռուստացույցով են տեսել, սակայն ըստ մեղադրանքի՝ նրանք համարվում են Սեֆիլյանի զինված խմբի անդամներ: