Մեկ ժամ առանց էլեկտրականության. քիչ անց Հայաստանն արդեն 10-րդ անգամ կմասնակցի «Մոլորակի ժամը» նախաձեռնությանը

60 րոպե առանց էլեկտրաէներգիայի: Հենց այս կերպ հարյուրավոր երկրներ ու ավելի քան 2 միլիարդ մարդ անջատում են էլեկտրաէներգիան և միանում «Մոլորակի ժամը» նախաձեռնության նպատակին: Համաշխարհային այս ակցիան առաջին անգամ մեկնարկել է 2007-ին Ավստրալիայի Սիդնեյ քաղաքում, որին միացել էր 2 միլիոն մարդ: Մասնակիցների թիվը տարեցտարի ավելացավ: Այս տարի շուրջ 180 երկիր է միացել նախաձեռնությանը։

«Մոլորակի ժամը» սիմվոլիկ ակցիա է համարվում: Դրա նպատակը ոչ թե էլեկտրաէներգիայի խնայողությունն է, այլ մարդկության ջանքերը կլիմայի փոփոխության դեմ մղվող պայքարում միավորելը, մեր մոլորակի կենսական պայմանների և ռեսուրսների պահպանությունը: Էլեկտրաէներգիայի անխնա օգտագործումը բացասաբար է անդրադառնում բնության և կլիմայի վրա։ Ակցիայի թեման է «Բնության հանդեպ մարդու պատասխանատվությունը», իսկ կարգախոսը՝ «Փոխիր քեզ և ոչ բնությունը»:

Բնակչության շրջանում անցկացվող նման ակցիաները նպատակ ունեն նաև օգնել գիտակցել այն փաստը, որ մոլորակը մեր տունն է, իսկ սեփական տունն աղտոտելը բանական մարդու մտահորիզոնից վեր է: Յուրաքանչյուր երկիր մոլորակի իր ժամը յուրովի է անցկացնում: Մեկ ժամ առանց հոսանքի են մնում ողջ աշխարհի հայտնի հուշարձանները, որոնց շարքում են Նյու Յորքի The Empire State Building-ը, Սան Ֆրանցիսկոյի «Ոսկե դարպասներ» կամուրջը, Հռոմի Կոլիզեումը, Սիդնեյի Օպերային թատրոնը, Փարիզի Էյֆելյան աշտարակը և այլն:

Սա էլ արդեն մեր Երևանն է՝ «Մոլորակի ժամ»-ին: Այսօր էլ՝ ուղիղ ժ. 20:30-ին, քաղաքը կընկղմվի մթության մեջ և արդեն 10-րդ անգամ մասնակից կդառնա «Մոլորակի ժամին»: Մեկ ժամ ոչ միայն Երևանը, այլև բազմաթիվ այլ քաղաքներ հոսանքազրկվում են և ուղերձ հղում աշխարհին, որ Հայաստանն էլ բնության պահպանությանը միտված ծրագրերի առաջամարտիկներից է:

Սովորաբար մարտի վերջին շաբաթ օրն է աշխարհը ձեռնամուխ լինում այս ակցիային: Այս տարի նշվում է մարտի նախավերջին շաբաթ օրը, քանի որ մարտի 30-ին երկրներից շատերն անցնում են ամառային ժամանակի:

Ի դեպ, «Մոլորակի ժամը» նախաձեռնությունը համարվում է ամենամեծ ու հեղինակավոր ակցիաներից մեկն աշխարհում: