Գյումրիում փողոցաշինական մեծ ծրագիրը որոշ հատվածներում կանգ է առել նախագծային թերությունների պատճառով

Գյումրիում փողոցաշինական աշխատանքները որոշ հատվածներում կանգ են առել։ Երկրաշարժից հետո անկանոն եղանակով անցկացված ստորգետնյա ենթակառուցվածքները խնդրներ են ստեղծել շինարարների համար: Փորման աշխատանքների ընթացքում  պարզվում են, որ էլեկտրամալուխների ու ջրակոյուղատարների խորությունները չեն համապատասխանում նախագծերին՝ որոշ տեղերում էլ դրանք կան, բայց նախագծում չկան:

Նախագծային ու ենթակառուցվածքային թերությունները շինարարության ավարտի ժամկետների հետաձգման պատճառ կարող են դառանալ: Սա Գյումրիում իրականացվող փողոցաշինական 2 խոշոր ծրագրերին է վերաբերում, որոնք ֆինանսավորում են Վերակառուցման և զարգացման եվրոպական բանկը և Համաշխարհային բանկը:

Վառ օրինակը Տիգրան Մեծ փողոցում է, որտեղ շինաշխատանքները դեռ հունի մեջ չմտած, արդեն դադարեցվել են: Շինարարը փորելու ընթացքում մեկը մյուսի հետևից ջրագծեր ու կոյուղագծեր է վնասել։ Վթարների մի մասը վերացրել են, բայց ժամանակավոր, իսկ մեկ այլ հատվածում գործը 15 օր է, տեղից չի շարժվում:

«Սիսիանի բոատ» շինկազմակերպության աշխատանքային տեղամասի պետ Սարիկ Բեկոյանը նշում է, որ նախագծում սահմանված 1 մետր 70 սանտիմետր խորության փոխարեն ջրագծերը 1 մետր 40 սանտիմետրի վրա են, դրա համար էլ շինաշխատանքների ժամանակ  ջրատարներ են վնասվում: Նույնը էլեկտրական մալուխների պարագայում է: Շինարարը փաստի առաջ է կանգնել նախագծային անհամապատասխանությունների պատճառով։

Վերահսկողության համակարգման աշխատանքային խումբը ևս բազմաթիվ թերություններ է հայտնաբերել: Նախագծային թերությունների, լուրջ բացթողումների պատճառով որոշ շինընկերություններ ժամկետներից հետ են ընկել ( դիմելու են, որ շինարարության ժամկետը երկարաձգվի):

Գյումրիի ստորգետնյա ենթակառուցվածքների, ջրակոյուղատարների ու էլեկտրական մալուխների տեղակայման ճիշտ քարտեզներ կազմված չկան, մոտավոր գծագրումների արդյունքում եղած նախագծերը լուրջ շեղումներով են: Աշխատանքների ձգձգումը, սակայն,  միայն տեխնիկական թերություններով չէ, որ պայմանավորված է: Օրինակ՝ Տիգրան մեծ փողոցում շինարարը մայթերին շարել է նորմատիվներին չհամապատասխանող եզրաքարեր:

Գյումրիի քաղաքապետ Սամվել Բալասանյանի խոսքով՝ դրանք, միանշանակ, քանդվելու են: Ծրագրով բարդ ինժեներական աշխատանքներ են պահանջում նաև կամուրջների, ստորգետնյա անցումների շինարարությունը։

Շինարարության դանդաղ տեմպի պատճառներից մեկն է բանվոր-շինարարների պակասը: Առնվազն 1000 աշխատող է պետք աշխատանքները ժամանակին ավարտելու համար, ինչը համալրել չի հաջողվում:

Ճանապարհաշինական ծրագրերի ժամկետը 7 ամիս է: Փողոցներից մեծ մասում շինարարությունը մեկնարկել է օգոստոսին, իսկ Գյումրիում շինարարության սեզոնը շատ կարճ է: Ուշ սկսված շինարարությունը փողոցներում դադարներով է իրականացվում նախագծային թերությունների, հանրային ծառայությունների օպերատորների հետ չհամաձայնեցված աշխատանքի պատճառով: Նախագծային փոփոխություններ են սպասվում, ինչն էլ հավանաբար բուն ասֆալտապատումը կուշացնի: