Գործադիրը փոփոխություններ է առաջարկում «Ոստիկանությունում ծառայության մասին» օրենքում

Առաջարկվում է ոստիկանությունում ծառայության անցնելու տարիքային սահմանափակումը հանել՝ հնարավորություն տալով ոստիկանությունում ծառայության անցնել նաեւ 35 տարին լրացած ՀՀ այն քաղաքացիներին, որոնք իրենց անձնական հատկանիշներով, գործնական կարողություններով, կրթությամբ, ֆիզիկական պատրաստականությամբ եւ առողջական վիճակով կարող են կատարել ոստիկանության գործառույթները: Արական սեռի դիմորդների պարագայում անփոփոխ են թողնվում պարտադիր զինվորական ծառայության անցած լինելու վերաբերյալ կարգավորումները:

Վերոնշյալ փոփոխություններն ԱԺ պաշտպանության եւ անվտանգության հարցերի մշտական հանձնաժողովի նիստում ներկայացրել է ՀՀ ներքին գործերի նախարարի տեղակալ Արմեն Մկրտչյանը «Ոստիկանությունում ծառայության մասին» օրենքում նախատեսվող նոր կարգավորումները ներկայացնելիս:

Առաջարկվում է ոստիկանությունում առաջին անգամ պաշտոնի նշանակված ծառայողին ատեստավորել ոչ թե պաշտոնի նշանակվելուց վեց ամիս անց, այլ երկու ամիս հետո: Առնվազն բակալավրի որակավորում ունեցող եւ ՆԳ նախարարության կրթահամալիրում համայնքային ոստիկանի արհեստագործական կրթություն ստացած անձինք կնշանակվեն համայնքային ոստիկանի պաշտոնում, իսկ ոստիկանության ստորաբաժանումների առնվազն բակալավրի որակավորում ունեցող ծառայողները համայնքային ոստիկանության միջին, ավագ եւ գլխավոր խմբերի պաշտոններում կնշանակվեն կրթահամալիրի վերապատրաստման դասընթացն ավարտելուց հետո:

Համայնքային ոստիկանի արհեստագործական կրթություն ստացած շրջանավարտներին կշնորհվի առնվազն ոստիկանության լեյտենանտի կոչում: Այդ շրջանավարտները եւ վերապատրաստումը հաջողությամբ հաղթահարած ոստիկանության ծառայողները կհամարվեն ատեստավորում անցած եւ բացի աշխատավարձից կստանան նաեւ ատեստացիայի արդյունքում ձեւավորված հավելավճարները: Միջին խմբի պաշտոնում նշանակվելու, լեյտենանտի կոչում ստանալու եւ գերազանց ատեստավորվելու դեպքում աշխատավարձը կկազմի շուրջ 500.000 դրամ:

Նախաձեռնությամբ նախատեսվում է Սահմանադրությանը հակասող եւ անվավեր ճանաչված որոշ դրույթների վերանայում: Խոսքը վերաբերում է ոստիկանության ծառայողի՝ կրոնական կազմակերպությունների անդամակցելու արգելքին, ինչպես նաեւ տարբեր պատճառներով, բայց անհիմն աշխատանքից ազատված եւ հետագայում վերականգնված լինելուն: Այս ժամանակահատվածի համար գործող կարգավորմամբ միայն առաջին երեք ամիսն է փոխհատուցվում: ՍԴ-ն գտնում է, որ ամբողջ ժամանակահատվածը պետք է վճարվի: Արմեն Մկրտչյանի խոսքով գործնականում այդպես էլ արվում է, եւ այժմ օրենքը համապատասխանեցվում է Սահմանադրությանը:

Հարակից զեկույցում հանձնաժողովի նախագահի տեղակալ Արմեն Խաչատրյանը նշել է, որ հատկապես համայնքային ոստիկանությունում կադրերի համալրման խնդիր կա, եւ տարիքային շեմի վերանայմամբ հնարավորություն է տրվում մարդկանց համակարգում անցնելու ծառայության: Պատգամավորն առաջարկել է ոստիկանության համակարգի ծառայողների վերին շեմի տարիքային փոփոխություն եւս կատարել, ինչպես քաղաքացիական ծառայության համակարգում է:

Նախարարի տեղակալը հավաստիացրել է, որ առաջարկը կքննարկվի:

Քննարկված նախագիծն արժանացել է հանձնաժողովի դրական եզրակացությանը: